ارزگان مرکزی ترینکوت شهری یشاوچیسی بولمیش ۵۵ یاشر محمدنبی، اصلاح بولگن اوروغلردن فایدهلنیلگن و ایکینچیلیک ریاستی آرقهلی قطارلب ایکیلگن بوغدای ایکینزارینی پرورش قیلیش بیلن شغللنگن.
اونینگ ایتیشیچه، اوشبو ینگی اصول حاضرگچه ایجابی نتیجه بیریب و یخشی حاصل قولگه کیلیشی کوتیلهدی. محمدنبینینگ سلاموطندار گه ایتیشیچه: «بو ییل قیلگنیمیز ایکین، یخشی نتیجه بیرگن. اقلیم اوزگریشلری برابریده یخشی حاصل قولگه کیلتیره آلیشیمیز اوچون ایکینچیلیک ریاستی هر مرتبه بیزلردن حمایت قیلگن.»
ارزگان ایکینچیلیک، سووغاریش و چاروهچیلیک ریاستی معلوماتی اساسیده، بو ییل اوشبو ولایتده قطارلب ایکیلگن نمایشی ۲۶ ایکینزار توزهتیلگن. مسئوللرنینگ ایتیشلریچه، اوشبو ایکینزارلرگه تورلیخیل اصلاح بولگن اوروغلر سینهب کوریلیب و سیزیلرلی نتیجه بیرگن.
ارزگان ایکینچیلیک ریاستی مسئوللریدن بیری قدرتالله حمیدینینگ ایتیشیچه، زراعتی ستندرد اسلوبلر و اصلاح بولگن چیدهملی اوروغلردن فایدهلنیش، عادی اوروغلرگه نسبت نیچه برابر محصول بیریشی ممکن.
اونینگ کوپهیتیریشیچه، اقلیم اوزگریشلری و سوو تنقیصلیگی توجه قیلیش بیلن، سوو کمراق صرفلنیشی همده چیدهملی اوروغلرنینگ یخشی حاصل بیریشی مقصد، ولایت بویلب استه-سیکین عنعنوی بوغدای ییتیشتیریشنی قطارلب ایکیش سیستمیگه اوتکزیش اوچون سعیوحرکت قیلماقدهلر. «بو ییل تورلیخیل واریتهلرنی سینهب کوردیک و جوده یخشی نتیجه قولگه کیلدی. منظم ایکین دهقانلر تولیدینی اوچ برابر کوپهیتیره آلهدی.»
لیکن ازرگان دهگی دهقانلر اوچون اصلاح بولگن اوروغلر و قطارلب ایکیش اهمیتی یالغیز حاصلنی آشیریش بیلن چیکلنمهیدی. سونگی ییللردهگی قوروقچیلیک، یاغینگرچیلیک کمهیگنی و سوو منبعلری کملیگی، توغری شکلده بوغدای ایشلب چیقریلیشیگه تاثیر قوییب و دهقانلردن قطارینی اقتصادی قیینچیلیکلر بیلن روپهره قیلگن.
باشقه بیرتاماندن، دهقانلردن قطاری هم اصلاح بولگن اوروغلر و قطارلب ایکیش فایدهلریدن رضایتلرینی بیلدیرهدیلر. اولرنینگ ایتیشلریچه، بو سیستمده ایکیش و قرهش قولی بولیب، آزراق زحمت و خرهجت ایستهیدی و شونینگدیک کوپ حاصل بیرهدی.
ارزگان دهگی دهقانلردن شاهمحمدنینگ سلاموطندار گه ایتیشیچه: «مذکور ایکیشلر جودهیم یخشی دیر، یاردم بیرگن، بوغدای خوشهلری توله و ساغلام کوریلهدی و حاضر ییغیم-تیریم وقتی هم یقین بولهمیز.»
شونینگدیک ارزگان دهگی دهقانلردن باشقه بیری سیدنبینینگ ایتیشیچه: «قطارلب ایکیش و اصلاح بولگن اوروغلر بیزلر اوچون جودهیم فایدهلی بولیب و یخشی حاصل بیرگن.»
شوندهی بیرحالده، ایکینچیلیک ایش بیلرمانلرینینگ ایشانچیگه کوره، افغانستان اقلیم اوزگریشلریدن اینگ کوپ زیان کورگن مملکتلردن دیر. اولرنینگ ایتیشلریچه، ایسیقلیک درجهسی کوپهیشی، یاغینگرچیلیک موسومیده ترتیبسیزلیک و سوو منبعلری کمهیشی، مملکت آزیق-آوقت خوفسیزلیگی اوچون جدی تهدیدلرنی یرهتگن.
ایکینچیلیک ایش بیلرمانلریدن لونگ خپلواکنینگ ایتیشیچه، اصلاح بولگن اوروغلر قوروقچیلیک و جزیرمه ایسیقلیک برابریده چیدهملی بولیب و حتا آزراق سوو بیلن هم مناسب محصول بیرهدی. «قطارلب ایکیش سوونینگ حددن تشقری صرفلنیشی کمهیشی، کود و اوروغدن یخشی شکلده فایدهلنیش و اوسیملیک اوچون یخشی رشد شرایطی یرهتیلیشیگه سبب بولهدی.»
ارزگان ایکینچیلیک، سووغاریش و چاروهچیلیک ریاستی معلوماتی اساسیده، بو ییل اوشبو ولایتده ۲۸ مینگ هکتاردن آرتیق ییرگه بوغدای ایکیلگن.
مسئوللر، اصلاح بولگن اوروغلر و زمانهوی زراعتی اصوللردن فایدهلنیش آرقهلی بوغدای ایشلب چیقریش حجمینینگ سیزیلرلی درجهده آشیشی همده دهقانلرنینگ محصوللریدن یخشیراق درآمد قولگه کیلتیریشلری توغریسیده امیدوارلیک بیلدیرهدیلر.
