بیرلشگن ملتلر تشکیلاتینینگ آزیق-آوقت و ایکینچیلیک دستوری، ینگیلشتیریشنی رواجلنتیریش، قیشلاق ساحهلرده ایش فرصتلرینی یرهتیش همده اقلیم اوزگریشلریگه چیدهملیراق ایکینچیلیک زنجیرلرینی شکللنتیریش گه قرهتیلگن ینگی ریجهنی ایشگه توشیرگنینی معلوم قیلگن.
اوشبو اداره، بوگون (۲۲ سنبله/۱۳ سپتمبر، یکشنبه) وبسایتیده ترقهتگن گزارشیده مذکور ریجهنی عملگه آشیریش آرقهلی آزیق-آوقت خوفسیزلیگی، اقلیم اوزگریشی خوفلری و چیکلنگن اقتصادی امکانیتلر گه دوچ کیلهیاتگن ضعیف عایلهلر جملهدن وطن گه قیتگنلر، اولرنی قبول قیلگن جماعهلر همده ایچکی آوارهلرنی اینیقسه عیاللر و بالهلرنی قوللب-قوتلش کوزده توتیلگن.
بیرلشگن ملتلر تشکیلاتینینگ آزیق-آوقت و ایکینچیلیک دستوری، بو ریجه اروپا اتفاقی یاردمی بیلن ایشگه توشیریلگن و اونی اوچون بیش میلیون یورو سرمایه کیریتیلگنینی قوشیمچه قیلگن.
گزارشنینگ بیر قسمیده قید ایتیلیشیچه، اوشبو ریجهنی عملگه آشیریش دایرهسیده تورته خذمت کورسهتیش مرکزی تشکیل ایتیلهدی. بو مرکزلر دهقانلر و تدبیرکار لرگه بازارلر، ایکینچیلیک بوییچه مصلحتلر، اختصاصلشتیریلگن خذمتلر همده ایکینیچلیک ساحهسیده تجارت امکانیتلریدن فایدهلنیش امکانینی بیرهدی.
بیرلشگن ملتلر تشکیلاتینینگ آزیق-آوقت و ایکینیچلیک دستوری، شونینگدیک اوشبو ریجه عملگه آشیریلیشی نتیجهسیده ایکی مینگ هکتار بوزیلگن اورمان و ییلاولر قیته تیکلنیشی همده عیاللر باشچیلیگیده ۲۵۰ ته اوسیملیک کوچت ییتیشتیریش مرکزی قوللب-قوتلنیشینی معلوم قیلگن.
