«اوزوم» قندوز ولایتینینگ زراعتی مهم محصوللریدن بیری بولیب، ولایت بازارلریدن تشقری قوشنی ولایتلرنینگ ایریملریگه هم یوباریلهدی. بیراق اونی سقلش اوچون امکانیت یوقلیگی و ییریک بازارلر گه چیقریش امکانیتینینگ آزلیگی، اوشبو محصولات ساتیشنی قیینلشتیرگن.
قندوزدهگی باغدارلردن بولگن عبدالملک سلاموطندار بیلن صحبتده ایتیشیچه، اوزوم حاصلی اوتگن ییل گه قرهگنده کوپهیگن، بیراق ساووقخانه و یخشی بازار یوقلیگی سببلی مناسب نرخده ساته آلمهگنلر. او شوندهی دییدی: «حاصل یخشی اما بازار یوق، مناسب نرخده ساتیلمهیدی. کود و باشقه خرهجتلرنی حساب گه آلگنده دهقان گه هیچ نرسه قالمهیدی. بازار یوق و یشاوچیلرنینگ اقتصادی ضعیف و ساتیب آلیشگه قوربلری ییتمهیدی. خارج یا کی باشقه جایگه انتقال بیریلسه دهقانلر بیر آز درآمد قیلیشی ممکن.»
قندوزدهگی اوزوم باغدارلریدن باشقه بیری زکریانینگ ایتیشیچه، اوزوم نرخی پس توشیشی و ساووقخانهلر یوقلیگی سببلی، یخشی درآمد قیله آلمهیاتگنینی ایتهدی. او حتا عایلهسینینگ احتیاجلرینی تأمینلهی آلمسلیک احتمالیدن هم تشویشده. او شوندهی دییدی: «بوگون اوزوم نرخی جوده پس. اینگ کتته معما ساووقخانه یوقلیگی دیر و دولتدن ایستهیمیز بو قیینچیلیکنی حل قیلسین و ساووقخانه قوریش بولیمیده همکارلیک قیلسین.»
اوزوم سوداگرلری هم، ییغیم-تیریم فصلیده یخشی بازار بولمسه و مناسب نرخده ساتیلمهگن حالده، ساتیش جریانیگه سلبی تأثیر قوییشینی ایتهدیلر.
قندوز ولایتیده اوزوم سوداگرلریدن بولگن جیلانی گه کوره، جاری ییلده بو ولایتده اوزوم یخشی حاصل بیرگن، بیراق یشاوچیلرنینگ ساتیب آلیش گه قوربی ییتمسلیگی، ساووقخانهلر یوقلیگی و دنیا بازارلریگه صادر قیلینمسلیگی، اولرنی ایریم قیینچیلیک بیلن دوچ قیلگن. اونینگ ایتیشیچه: «بو ییل حاصل کوپ بیراق سودا یوق، اوتگن ییل گه نسبتن بو ییل نرخلر پست، اکثریت یشاوچیلر حسینی اوزومنی یاقتیرهدی اما بازار یوق.»
قندوزده اوزوم سوداگرلریدن بولگن عبداللهنینگ ایتیشیچه، اوزوم نرخی پسلیگی سببلی کیریتگن سرمایهسینی قیته آلالمسلیگیدن خواطرده.
او، افغانستاننینگ میوهلری اوچون بازار قیدیریلیشی و باشقه ولایتلر گه هم انتقال بیریلیشینی سورهیدی. او شوندهی دییدی: «مسئوللردن ایستهیمیز افغانستان میوه محصولاتلرینی باشقه ولایتلر همده قوشنی مملکتلر گه صادر قیلیش زمینهسینی یرهتسین. بوندهی بولسه هم دهقانلر یخشی درآمد قیلهدی هم سوداگرلر.»
قندوز ولایتی ایکینچیلیک ریاستی مسئوللرینینگ ایتیشیچه، جاری ییلده ایکی مینگ ۵۰۶ هکتار اوزوم باغیدن ۷۸ مینگ تُن اوزوم حاصل آلینگن – اوتگن ییل گه قرهگنده تورت فایز کوپهیشنی کورستهدی.
قندوز ایکینیچلیک ریاستینینگ رواجلنتیریش مدیری فریدالله توتاخیل، ستندرد ساووقخانهلر قوریلیشی اوچون سعی-حرکت قیلینماقده دییدی. اونگه کوره، جاری ییلده سبزهواتلرنی سقلش اوچون ستندرد بیر ساووقخانه قوریلگن و اوزوم محصولاتی اوچون علیحده ساووقخانه قوریلیشی ریجهلشتیریلگن. او شوندهی دییدی: «قندوز ولایتیده اوزوم حاصلی اوتگن ییل گه نسبتن تورت فایز کوپهیگن. بو ییل دییرلی ایکی مینگ ۵۰۶ هکتار ییرده اوزوم باغی بار، بو باغلردن قریب ۷۸ مینگ تُن اوزوم حاصل آلینیشی کوتیلهدی.»
شو بیلن بیرگه، قندوز ولایتی سودا و سرمایه کیریتیش اتاقینینگ خذمتلر بوییچه اورین باسری نسیم رسولی، بو اتاق اوزوم قوشنی اولکهلر گه صادر قیلینیب و مملکت ایچیده هم ستندرد ساووقخانهلر قوریلیشی اوچون سعی-حرکت قیلینهیاتگنینی بیلدیرهدی. اونینگ فکریچه: «سودا اتاقی هردایم اوزوم بازاری یخشیلنیشی، قوشنی مملکتلر گه صادر قیلینیشی و ایچکریده سقلنیش اوچون ساووقخانه قوریش گه سعی-حرکت قیلگن. انشاءالله کیلهجکده اوزومنی سقلش اوچون ستندرد ساووقخانهلر قوریلهدی و دهقانلرنینگ بوتوغریده بولگن قیینچیلیگی حل ایتیلهدی.»
ایسلهتیب اوتهمیز، قندوزده حاضرگچه اوزومنی سقلش اوچون هیچ ساووقخانه قوریلمهگن و باغدارلر هر ییلی حاصللریدن کوپ قسمینی سقلش امکانیتی یوقلیگی و قیمتلر پسلیگی سببلی، ارزان نرخده ساتیش گه مجبور بولهدیلر.
