طالبان جنگریلری ایکی کون آلدین قندوز ولایتی نینگ خان‌آباد تومنی‌نی نوآباد اندرابی‌ها و عکس داوود منطقه‌سیده هجوم قیلیب امنیتی پوسته‌لردن ایکی ته‌سینی سقوط بیریب و ملی اردو ایکی عسکرینی اولدیرگن ایدی.
قندوز ولایتیدن محلی منبع‌لرنینگ ایتیش‌لریچه، ملی اردو کوچلری نوآباد اندرابی‌ها منطقه‌سینی قوییب عکس داوود منطقه‌سیگه جایلشگن. منبع گه کوره، ملی اردو حربی‌لری نینگ کیینگه قیتگنی سبب، طالبان جنگریلری اوتگن کونی اوشبو قتناو یول‌نی باغله‌گنلر.
مذکور قتناو یولدن اوتیب قیته‌دیگن بیرقطار هیداووچی‌لر و یولاوچی‌لرنینگ ایتیش‌لریچه، قتناو یول‌لرده امنیتی تهدیدلر سبب، ۱ ساعت‌لیک یولده ۴ ساعت‌گه ییتیشه‌دیلر.
کابل-خان‌آباد قتناو یولی هیداوچی‌لریدن بیری عتیق‌الله نینگ سلام‌وطندارگه ایتیشیچه، قتناو یول‌لرنینگ یاپیق‌لیگی اولرگه قرشی کوپینچه قیین‌چیلیک یره‌تگن.
بدخشان ولایتیدن قندوز ولایتی‌گه کیلگن یولاوچی‌لردن بیری محمد نسیم نینگ ایتیشیچه، حکومت قتناو یول‌لرنینگ خوفسیزلیگی‌نی تامین‌لش اوچون سعی و حرکت قیلمه‌یدی.
اونینگ ایتیشیچه، اوشبو قتناو یول نیچه پیت آلدین طالبان قولیگه توشگن، بیراق حکومت بو منطقه‌لرینی طالبان وجودیدن تازه‌لش اوچون هیچ‌بیر ایش قیلمه‌گن.
بوتوغریده قندوز محلی مسووللری نینگ فکرینی آلیش‌گه موفق بولمهدیک، لیکن ملی مدافعه وزیرلیگی سوزلاوچیسی نینگ اورین باسری فواد امان نینگ ایتیشیچه، تیزلیککه قتناو یول‌لرنینگ وضعیتی عادی حالت‌گه اوزگره‌دی.
قندوز ولایتیدن امنیتی بیرمنبع نینگ معلوماتیگه کوره، طالبان گروهی اوشبو قتناو یول‌لردن امنیتی کمربندلرنی کوتاریب و خان‌آباد تومنی‌نی نظارتی‌گه آلیش‌نی ایسته‌یدی. منبع گه کوره، کمکی کوچلر یوباریلمه‌گن صورتده، اوشبو تومن نینگ طالبان قولیگه سقوط قیلیشی ممکن.