غور ده ییلاولرگه کوچیش یالغیز موسومی بیر عادت ایمس، بلکیم چاروهچیلرنینگ اقتصاد و تیریکچیلیگی بوییچه مهم بولیم حسابلنهدی. چاروهچیلرنینگ ایتیشلریچه، مذکور آز مدتده سنتی لبنیات ییغیش و تیارلش بیلن عایلهلرینینگ ییللیک نیازلری بیر بولیمینی تامین قیلهدیلر.
حاضر ییلاوده تیریکچیلیک قیلهدیگن غور ولایتی تقهتمور قیشلاغیدهگی چاروهچیلردن بیری حاجی امیرباینینگ ایتیشیچه: «قریب ۸۰ باش قوی و ایچکیمیز بار که ۴۰ تهسی ساغین دیر. کونده ۲۰ کیلوگرام سوت قولگه کیلتیرهمیز. سوتیدن قتیق، چلاو، ماست، قوروت و سریق یاغ تیارلهیمیز. قیش موسومیده ایسه ساتیلیش اوچون بازار گه چیقرهمیز. ایکی آی جریانیده اوشبو ییلاودن قولگه کیلهدیگن درآمد، عایلهمیزنینگ ییللیک صرف-خرهجتی بیر بولیمینی تامین قیلهدی.»
اوشبو قیشلاقدهگی چاروهچیلردن باشقه بیری معصومباینینگ ایتیشیچه: «۶۰ باش قوییمیز بار و کونده قریب ۳۰ کیلوگرام سوت آلهمیز. سوتدن کوپ قسمینی چلاو و قوروت اوچون فایدهلنهمیز، چونکه سقلهنیشی آسان دیر. بو محصوللر ساتیلیشی حیاتنینگ کیرهکلی نیازلری تیارلنیشیگه یاردم بیرهدی.»
شونینگدیک بو آرهده، عیاللر هم لبنیات تیارلش و پروسس قیلیشده مهم اورینگه ایگهلر. اوشبو قیشلاق یشاوچیلریدن بیبی گلنینگ ایتیشیچه: «قیشلاقده لبنیات تیارلنیش ایشلریدن کوپینچهسینی بیز عیاللر عملگه آشیرهمیز. ایرتنگدن آخشمگچه سوت ییغهمیز و اوندن ماست، قتیق و سریق یاغ توزتهمیز. بو محصوللر ساتیلیشیدن قولگه کیلهدیگن درآمد عایلهمیز اوچون جودهیم مهم دیر. اصلی قیینچیلیگیمیز محصول سقلهنیشی امکانیتی یوقلیگی و اونینگ بازارگه انتقال بیریلیشی توغریسیدهگی قیینچیلیک دیر.»
باشقه بیرتاماندن، چاروهچیلیک ایش بیلرمانلرنینگ ایشانچیگه کوره، چاروه محصوللری صفتی یخشیلنیشی و مناسب بازار یرهتیلیشی توغریسیده ایشلنگنی صورتده، غور ییلاولری چاروهچیلر اوچون مهم درآمد منبعلردن بیریگه اَیلهنیشی ممکن.
چاروهچیلیک ایش بیلرمانلریدن ضیاءالحق هنرمندنینگ ایتیشیچه: «غور ده ییلاولر جوده مهم اقتصادی امکانیتگه ایگه دیر. چاروهچیلر چاروهلرنینگ یخشی سقلهنیش و آوقتلنیش اصوللریدن فایدهلنگنلری صورتده سوت تولید بولیش میزانی کوپهیهدی. حاضر ایسه منظم بازار یوقلیگی، وترینری خذمتلر کملیگی و پاکتلنیش سنتی اصوللری اوشبو بولیمنینگ اینگ مهم قیینچیلیکلریدن دیر. لبنیات ییغیلیش مرکزلری یرهتیلیشی و چاروهچیلرگه ایش اورگهتیلیشی چاروهلر محصوللری ارزشینی کوپهیتیره آلهدی.»
شوندهی بیرحالده، غور ایکینچیلیک، سووغاریش و چاروهچیلیک ریاستی مسئوللرینینگ اورغولشیچه، چاروهچیلیک بو ولایتنینگ قیشلاقلیک اقتصادی بوییچه اساسی ستونلردن دیر.
غور ایکینچیلیک ریاستی سوزلاوچیسی ملارمضان وافینینگ ایتیشیچه: «چاروهچیلیک غورنینگ اینگ مهم اقتصادی بولیملریدن بولیب و مینگلب عایله اوشبو یول آرقهلی حیات خرهجتلرینی تامین قیلهدیلر. سونگی قوروقچیلیکلر و اقلیم اوزگریشلری ییلاولر و چاروهلر سانیگه سلبی تاثیر قویگن، بیراق وترینرلیک خذمتلر و حمایتی برنامهلر نی رواجلنتیرماقچینمیز. ییلاولر ظرفیتیدن درست فایدهلنیش لبنیات ایشلب چیقریلیشی و چاروهچی عایلهلر درآمدینی کوپهیتیره آلهدی.»
غور ییلاولری حاضرگچه بو ولایت اهالیسینینگ اینگ مهم تیریکچیلیک و اقتصادی مهم بولیمینی تشکیل بیرهدی. اوشبو طبیعی ظرفیتنینگ کوپراق قوللب-قوتلنگنی صورتده، یوزلب چاروهچی عایلهنینگ تیریکچیلیگی یخشیلنیشی بوییچه امکانیت یرهته آلهدی.
