غزنی ولایتی بوییچه خبرچی‌لر جمغرمه‌سی باشلیغی و الجزیره و اسوشیتیدپرست خبرچیسی رحمت‌الله نیکزاد، اوتگن “یکشنبه” کونی شام چاغیده، اویی نینگ یقینی‌ده ناتانیش قورالی کیشی‌لر تامانیدن اولدیریلگن.
رحمت‌الله نیکزاد نینگ اولیمی، یینه‌بیر مرته خبرچی‌لر و میدیالردن حمایت قیلووچی نهادلرنی خواطرگه سالگن.
افغانستان ایرکین رسانه‌لریدن حمایت قیلووچی نهاد یا-ده نَی تشکیلاتی حکومت تامانیدن خبرچی‌لر امنیتی تأمین ایتیلمسلیگی خصوصیده عکس‌العمل کورستیب ایتیشیچه، حکومت توجه‌سیزلیگی باعث، افغانستان خلقی نینگ دشمن‌لری هرکون خبرچی‌لردن قربان‌لیک آله‌دی.
خبرچی‌لر خوفسیزلیگی‌نی سقلش کمیته‌سی بیر اعلامیه ترقه‌تیب، خبرچی‌لر خوفسیزلیگی‌نی سقلش حکومت نینگ بیرینچی ایشی بولیشی لازم و اوشبو توغریده دقت‌سیزلیگی قبول قیلینمه‌سلیگی نی بیلدیرگن.
عین‌حالده، قطار خبرچی‌لر، ژورنالیست‌لر اولدیریلیشی خصوصده خواطر بیلدیریب، خبرچی‌لر اولدیریلیشی ایرکین سوز گه زیان ییتیشتیره‌دی دیگنلر.
شونینگدیک، جوزجان ولایتی بوییچه خبرچی‌لر جمغرمه‌سی باشلیغی محمدجان تمکین، خبرچی‌لرگه قرشی هجوم‌لر کوپه‌یگنیدن خواطر بیلدیرگن.
عین‌حالده، ملی مصالحه کینگشی بیر اعلامیه ترقه‌تیب، افغانستان خبرچی‌لری نینگ ترور ایتیلیشینی بشرگه قرشی بیر جنایت عنوان قیلگن.
طالبان گروهی نینگ سوزلاوچیسی ذبیح‌الله مجاهد توییتر صحیفه‌سی آرقه‌لی، رحمت‌الله نیکزاد نینگ اولیمی‌نی جدی صورتده قاره‌لب و اونینگ تعهدلی بیر خبرچی عنوان قیلگن؛ لیکن جمهورلیک ریاستی ایسه رحمت الله نیکزاد اولیمی برابریده طالبان گروهی نی عامل بیلگن.
اوتگن ایکی آی جریانیده یما سیاووش، الیاس داعی، رفیع‌الله صدیقی، میلالی میوند و فردین امینی هدف‌لی ترورلر، مقناطیسی ماین‌لر و باشقه واقعه‌لر آرقه‌لی اولدیریلگن.