۷ جون، خلقارا آزیق-آوقت خوفسیزلیگی کونی مناسبتی بیلن، بیرقطار عایلهلر سلاموطندار بیلن صحبتده، آزیق-آوقتنی توغری سقلش اصوللریدن خبردار ایمسلیکلری همده تازه ایچیملیک سوودن فایدهلنه آلمسلیک سببلی جملهدن آوقت هضم قیلیش تیزیمی کسللیکلریگه دوچ بولگنلرینی ایتگنلر.
غور یشاوچیسی زینب و کاپیسالیک صبرینا، تازه ایچیملیک سوو یوقلیگی و یاز موسمیده آوقتلرنی موزلتگیچده سقلش اوچون دایمی برق یوقلیگی سببلی، بالهلری آوقت هضم قیلیش تیزیمی کسللیکلریگه دوچ بولگنلرینی معلوم قیلهدیلر.
زینب گه کوره: «بیز پیشیرگن آوقت عادتده توشلیکدن کیچگه یا کی کیچدن ایرتهلبگچه قالهدی، کیین اونی قیته ایسیتیب ییمیز. برق یوق، موزلتگیچ یوق. سبزهواتنی هم بیر-ایکی مرته یووهمیز تازه بولهدی سوونی قینته آلمهیمیز چونکی اوتین یوق. قودوقدن سوو تارتیب ایچهمیز بالهلریمیز ایچکیتدی بولهدی.»
صبرینا هم شوندهی دییدی: «هوا ایسیگن حالده آوقتنی قویهدیگن جاییمیز یوق، کیچهدن قالگن آوقتنی استعمال قیلسک کسل بولهمیز.»
بیرلشگن ملتلر تشکیلاتی بیلرمانلرینینگ معلوماتیگه کوره، آزیق-آوقت خوفسیزلیگی – بو انسانده کسللیک کیلتیریب چیقریشی ممکن بولگن هر قندهی عامللردن خالی بولگن آزیق-آوقت دیر. بو عامللر باکتریا، ویروسلر، خوفلی کیمیاوی یا کی توپراق، چنگ و بیگانه جسملر کبی جسمانی افلاسلنیشلرنی اوز ایچیگه آلهدی.
شونینگدیک، آزیق-آوقت ساحهسیده بیلرمانلر هم، بوزیلگن آزیق-آوقتلرنی استعمال قیلیش و تازه ایچیملیک سوودن فایدهلنه آلمسلیک، آزیق-آوقت خوفسیزلیگینی سیزیلرلی درجهده کمهیتیریشی ممکنلیگینی ایتیشهدی، چونکی بوندهی شرایطلر آزیق-آوقت گه کسللیک قوزغهتووچی عامللرنینگ کیریب کیلیشی و ترقهلیشی اوچون قولی محیط یرهتهدی.
فراهلیک بهناز و تخار یشاوچیسی عیدیگل، آزیق-آوقت خوفسیزلیگی رعایه قیلینمسلیگی ایریم قیینچیلیکلر گه سبب بولگنینی ایتهدیلر.
بهنازنینگ ایتیشیچه: «اقتصاد شرایطی همه گه معلوم و سبزهواتنی یوویش مادهنی ساتیب آلالمهیمیز، عایله اعضالریمدن آتهم زهرلندی و شونینگدیک ایناغهم هم، چونکی هوا ایسیق دیر.»
عیدیگل هم شوندهی دییدی: «قالگن آوقتنی سایه گه قویهمیز، میوه و سبزهواتنی سوو بیلن یووهمیز بالهلریمیز ایچکیتدی بولهدی، هیچ کیم بوتوغریده خبردارلیک قیلمهگن.»
بیرلشگن ملتلر تشکیلاتی آزیق-آوقت دستوری بیر بیانیه ترقهتیب، خوفلی آوقتلر استعمال قیلینیشیدن کیلیب چیققن کسللرنی دنیا کتته معمالریدن دیب ایتیشیچه، بو معما کمیده ۲۰۰ دن آرتیق توردهگی کسللیکلرنینگ یوزه گه کیلیشیگه سبب بولیب، آدملرنینگ ساغلیغی، تیریکچیلیگی، تعلیمی و اقتصادیگه تأثیر قیلهدی.
شو بیلن بیرگه، آزیق-آوقت ساحهسیده بیلرمانلر، خوفسیز بولمهگن آزیق-آوقتلرنینگ خوفلریگه اشاره قیلیب، بو مسئله اینیقسه ضعیف گروهلر اوچون، انسانلر سلامتلیگیگه جدی تهدید بولیشی ممکنلیگینی ایتیشماقده.
آزیق-آوقت ساحهسیده بیلرمان محمدرضا جویا شوندهی دییدی: «بعضی آدملر کوپراق خوف آستیده بولهدی. اولر آرهسیگه حاملهدار عیاللر، قریلر و عموماً تیزیمی ضعیف بولگن بالهلر کیرهدی. اولر گه کوپراق اعتبار بیریش کیرهک، چونکی بو حالت حتا اولرنینگ حیاتینی هم خوف آستیگه قوییشی ممکن.»
تأکیدلش جایز کی، خلقارا آزیق-آوقت خوفسیزلیگی کونی میلادی ۲۰۱۸ ییلده بیرلشگن ملتلر تشکیلاتی عمومی ییغیلیشی تامانیدن ساغلام بولمهگن آزیق-آوقتلر کیلتیریب چیقرهدیگن خوفلر گه جهان اعتبارینی جلب قیلیش، آزیق-آوقت آرقهلی انسانلر گه یوقهدیگن کسللیکلر و افلاسلنیشلرنینگ آلدینی آلیش، اولرنی انیقلش و باشقریش، شونینگدیک، جماعت سلامتلیگی، آزیق-آوقت خوفسیزلیگی و برقرار رواجلنیشنی رواجلنتیریش مقصدیده بیلگیلنگن.
