لبنان و اسرائیل عملدارلری، امریکا واسطهچیلیگی بیلن بو ایکی مملکت اورتهسیدهگی صلح ۳ هفته گه اوزهیتیریلیشی گه قرار قیلیگنلر.
ییتکرمهلرنینگ معلوماتیگه کوره، امریکا جمهور باشلیغی دونالد ترامپ لبنان و اسرائیل اورتهسیدهگی صلح کیلیشووی اوچ هفته گه اوزهیتیریلگنینی معلوم قیلگن.
معلوم قیلینیشیچه، قرار آق اویده اوتکزیلگن یوقاری درجهدهگی مذاکرهلر یکونیده قبول قیلینگن.
ترامپ گه کوره، کیلیشوو زورهوانلیک درجهسینی کمهیتیریشگه آلیب کیلگن و تامانلر اورتهسیده احتمالی تینچلیک بیتیمیگه ایریشیش امکانیتی موجود. او یقین وقت ایچیده اسرائیل باش وزیری بنیامین نتانیاهو و لبنان جمهور باشلیغی جوزف عون بیلن اوچرهشوو اوتکزیش ریجهلشتیریلهیاتگنینی بیلدیرگن.
امریکا تامانی، لبنان گه حزبالله گه قرشی اوزینی حمایه قیلیشده یاردم بیریشینی معلوم قیلگن. مذکور گروه مذاکرهلرده اشتراک ایتمهی و اوز حرکتلرینی «باسقینچی کوچلر گه قرشیلیک» صفتیده بهالماقده.
اولگی ۱۰ کونلیک صلح، اوتگن هفته تامانلر ایلچیلری اورتهسیده ایریشیلگن بولیب، دستلب یکشنبه کونی یکونلنیشی کوتیلهیاتگندی. کیلیشوو زورهوانلیکنی کمهیتیرگنیگه قرهمی، جنوبی لبنانده توقنشوولر دوام ایتماقده.
لبنان تامانی کیینگی مذاکرهلرده اسرائیل قوشینلرینی آلیب چیقیش، قولگه آلینگن فقرالرنی قیتریش و دولتلر ارا قوروقلیک چیگرهسینی انیقلشتیریش مسئلهلرینی کوتریشنی ریجهلشتیرماقده.
اسرائیل ایسه، اساسی اعتبار حزبالله فعالیتینی چیکلش گه قرهتیلیشی کیرهکلیگینی تأکیدلهگن.
حزبالله وکیلی حسن فدالله صلحنی دوام ایتتیریش طرفداری ایکنینی بیلدیرگن، بیراق بو اسرائیل تامانیدن کیلیشوو تولیق بجریلیشیگه باغلیق ایکنینی تأکیدلهگن.
معلوماتلر گه کوره، اوشبو میلادی ییل ۲ مارچدن بویان دوام ایتهیاتگن حربی حرکتلر نتیجهسیده لبنانده قریب ۲.۵ مینگ کیشی هلاک بولگن. اسرائیل جنوبی حدودلرده ۵-۱۰ کیلومتر چقورلیکدهگی حدودنی نظارت قیلیب توریبدی و بو آرقهلی اوز شمالی حدودلرینی راکته هجوملریدن حمایه قیلیشنی مقصد قیلگن.
اسرائیل اردوسی، جنوبی لبنان اهالیسینی اوشبو حدودلرگه یقینلشمسلیک حقیده آگاهلنتیرگن.
