قندوز و بغلان ولایتیدن امنیتی منبع‌لرنینگ ایتیشلریچه، اوشبو ایکی ولایتده طالبان هجومی سبب، امنیتی کوچلردن ۱۸ ته‌سی هلاک و باشقه ۵ ته‌سی یره‌لنگن.
قندوز ولایتیدن کیم‌لیگی سیرقالیش‌نی ایسته‌گن امنیتی بیر منبع نینگ سلام‌وطندارگه ایتیشیچه، طالبان جنگریلری اوتگن کیچه ساعت ۱۲:۳۰ اوشبو ولایت نینگ دشت‌ارچی تومنیده امنیتی کوچلر ایکی پوسته‌سی اوستیگه هجوم قیلگن.
منبع نینگ کوپه‌یتیریشیچه، طالبان جنگریلری اوشبو ایکی پوسته‌نی اوز نظارت‌لریگه آلگن و آتیشمه نتیجه‌سیده ملی اردو ۱۱ عضوی و مردمی کوچلردن ۴ ته‌سی هلاک و باشقه ۳ حربی یره‌لنگن.
منبع گه کوره، طالبان جنگریلری مذکور پوسته‌لرینی اوت بیریب و بیر هاموی تانک شامل بوتون حربی تجهیزات‌لرنی اوزلری بیلن آلیب کیتگن.
دشت‌ارچی تومنی ولسوالی نبی کاکر، طالبان هجومی‌نی تصدیق‌لگن، لیکن تلفات خصوصیده معلومات بیرمه‌گن.
عین‌حالده، ملی مدافعه وزیرلیگی بیر اعلامیه آرقه‌لی طالبان هجومی نی تصدیق‌لگن. اعلامیه‌گه کوره، قندوز ولایتیده امنیتی کوچلر و طالبان جنگریلری آره‌سیده یوز بیرگن آتیشمه‌ده ملی اردو کوچلردن ۴ ته‌سی و طالبان جنگریلریدن ۱۵ ته‌سی هلاک ایتیلگن، بیراق طالبان گروهی، جنگریلریدن ۱ ته‌سی نینگ هلاک ایتیلگنی‌نی تصدیق‌لگن.
شو نینگدیک، بغلان ولایتی امنیتی منبع‌لرنینگ سلام‌وطندارگه ایتیشلریچه، پولیس ۲- حوزه‌سی اوستیگه طالبان تامانیدن اویوشتیریلگن هجوم نتیجه‌سیده پولیس کوچلریدن ۳ ته‌سی هلاک و باشقه ۲ ته‌سی یره‌لنگن.
منبع نینگ کوپه‌یتیریشیچه، اوشبو هجومده امنیتی کوچلردن ۵ ته‌سی طالبان قولیگه اسیر بولگن.
بو واقعه‌لر مسوولیتی‌نی طالبان گروهی بوینیگه آلگن.
