افغانستان قیته قوریلیشی اوچون آمریکا بیرلشمه ایالت‌لری نینگ خاص تیکشیرووچیسی یا-ده سیگار، بیر گزارش ترقه‌تیب، اشرف غنی نینگ افغانستان‌دن قاچیش جریانیده میلیون‌لر دالر نینگ انتقال بیریلگنی خصوصیده‌گی عیب نی یالغان دیگن. سیگار ایتگن که، غنی نینگ قاچیش چاغیده یانیده‌گی پول ۱ میلیون دالر ایمس ایدی.
سیگار بوگون (سه‌شنبه، ۱۷-جوزا) اوشبو گزارش‌ده غنی نینگ قاچیش جریانیده یانیده بولگن رسمی‌لری و شاهد‌لری بیلن اوتکزگنی صحبت‌لری نتیجه‌سیده، قولگه کیتیرگن موقتی معلومات‌لر اساسیده ایتگن که، میلیون‌لر دالردن توله تیک اوچرلر بیلن افغانستان سابق جمهور رئیسی و ییریک مصلحت‌چیلری نینگ قاچیش حقیده‌گی گزارش‌لر درست ایمس.
بیزلرنینگ توییترده هم تعقیب قیلینگ!
گزارش‌ده کیلگن که، گرچند ارگ‌دن بیر مقدار نقد پول آلینیب و مذکور تیک اوچرلر گه قوییلگن، بیراق مدرک‌لر گه کوره، بو مقدار ۱ میلیون دالردن آز ایکن و بلکیم بو مقدار نینگ کمیده ۵۰۰ مینگ دالر بولیشی ممکن. سیگار گه کوره، غنی نینگ هم‌راه رسمی‌لری تامانیدن انتقال تاپگن پول‌لر هم میلیون گه ییتیشمه‌دی.
آمریکا خاص باش‌تیکشیرووچیسی جان ساپکو، اوشبو گزارش اساسیده، باشقه ۵ میلیون دالر هم چاقگن رسمی‌لردن کیین ارگ‌ده قالگن که، نیردن و نیمه اوچون مصرف بولگنی بیللی ایمس و حاضر ایسه اونینگ نیمه بولگنی خصوصیده هیچ بیر خبر یوق. گزارش‌دن نقل قیلینیشیچه، اوشبو پول‌لر حاضرگچه مناقشه‌ده دیر، بیراق جمهورلیک ریاستی‌دن حفاظت قیلووچی قطعه ایشلاوچیلری تامانیدن، تیک اوچرلر کیتگنیدن کیین، تقسیم بوگنی ممکن.
گزارش‌ده بیان بولیشیچه، یاشیریلگن میلیون‌لر دالر نینگ عیبی نی اشرف غنی گه وارد قیلیش قیین دیر. سیگار نینگ ایتیشیچه، قولگه کیلگن معلومات‌لر اساسیده، تیک اوچرلرده آلدین‌دن یولاوچیلر و یانغین ماده‌لر جایلنگن ایکن و اضافی وزن بیلن پرواز قیله آلمه‌یدی. شونینگدیک تیک اوچرلر جمهوررئیس نینگ سفرلری اوچون زرهی بولگن ایکن که، اولر نینگ یوک ظرفیتی نی کوپراق کمه‌یتیره‌ر ایکن.
افغانستان سابق جمهور رئیسی اشرف غنی نینگ قاچگنیدن بیر کون سونگ، کابل ده روسیه ایلچی‌خانه‌سی اونینگ تامانیدن بیر میلیون دالر انتقال بیریلگن ادعاسی نی ترقه‌تدی. مذکور ایلچی‌خانه روسی رسانه‌لر گه ایتگن که، اشرف غنی ۴ موتر و ۱۶۹ میلیون دالر ارزشی‌ده‌گی پول بیلن توله تیک اوچر آرقه‌لی مملکت نی ترک قیلگن.
بیزلرنینگ فیسبوک صحیفه‌میزگه باش اورینگ!
اوشبو عیب‌لر تاجیکستان ده افغانستان ایلچیسی تامانیدن منعکس بولدی. بیراق جمهوررئیسی مذکور عیب‌لر خصوصیده‌گی بیانیه‌لر نی رد قیلیب و اونی یالغان دیگن ایدی. تاجیکستان ده افغانستان ایلچیسی سیگار بیلن اوتکزگن صحبت‌لریده بو زمینه ده سند ارایه قیلمه‌گن.
سیگار نینگ اورغولشیچه، اوشبو گزارش‌لر حاضرگچه موقت دیر و اشرف غنی‌دن هیچ قنده‌ی توضیح آلینمسدن ترقه‌تیلگن و شونینگدیک حاضرگچه بیر قطار سوراق‌لر بی‌جواب قالگن.
