ننگرهار ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، اوشبو ولایت ۲۲ تومنیده، سوو منبعلری تامینلنیشی و زراعتی ییرلرگه سوو ییتیشتیریلیشی اوچون بیر قطار سوو توغانلری قوریلیب و باشقه بیر قطاری توغریسیده ایشنینگ دوامی بار. مسئوللرگه کوره، اوشبو سوو توغانلری سوونینگ یخشیراق باشقریلیشی، توپراق بوزیلیشی آلدی آلینیشی و سوو تاشقینلر طفیلی زیانلر کمهیشی مقصد قوریلگن.
ننگرهار ایکینچیلیک ریاستینینگ ییتکرمهلر بولیمی مسئولی اجمل سبحانینینگ سلاموطندار گه ایتیشیچه، جلالآباد شهری شامل مذکور ولایتنینگ ۲۲ تومنیده، ۲۷ ته سوو توغانی قوریلیب و بو جریاننینگ دوامی بار. اونگه کوره، اوشبو سوو توغانلری قوریلیشی توپراققه سوونینگ استه-سکین جذب بولیش امکانیتینی یرهتهدی که بو جریان، ییر آستی سوولر سطحی کوپهیشیگه یاردم بیریب و اهالینینگ سوو کملیگی قیینچیلیگینی بیراز کمهیتیرهدی.
سبحانینینگ کوپهیتیریشیچه: «ننگرهار ده ۲۷ سوو توغانی قوریلگن و ینه بیر توغان ایسه جلالآباد شهرینینگ بیشینچی ناحیهسیده قوریلماقده. مذکور توغانلر ییر آستی سوولر تامینلیشی و یامغیر سوو ذخیره بولیشی اوچون قوریلهدی که سوو تاشقینلر آلدینی آلسه و ییر آستی سوولر سطحی یوقاری کیتسه.»
ننگرهار ایکینچیلیک ریاستی مسئوللریگه کوره، سوو توغانلری قوریلیشی بو ولایتده سوو منبعلرینینگ یخشی مدیرت بولیشیده فایده بوله آلگن یوللردن بیری دیر. اولرنینگ کوپهیتیریشلریچه، سونگی ییللرده قوروقچیلیکلر کوپهیشی و منظم یاغینگرچیلیکلر کمهیشیگه توجه قیلیش بیلن، اوتمیش گه قرهگنده بو کبی لایحهلر گه احتیاج بارلیگی حس بولهدی.
شوندهی بیرحالده، ننگرهار یشاوچیلری سوو توغانلری قوریلیشیدن خورسندلیک قیلیب؛ بیراق اسلام امیرلیگی و همکار موسسهلردن، زراعتی ییرلر کوچلنیشی، سوو تاشقینلر آلدی آلینیشی و ییر آستی سوو منبعلری کوپهیشی مقصد، بو کبی لایحهلرنینگ باشقه تومنلرده هم عملگه آشیریلیشینی ایستهگنلر.
بو توغریده بتیکوت تومنیدهگی دهقانلردن عبدالرحماننینگ ایتیشیچه: «ایکینچیلیک ریاستی مسئوللریدن شونی ایستهیمیز که یالغیز بتیکوت ایمس، بلکیم ننگرهارنینگ برچه تومنلریده توغان قوریلسه؛ چونکه یامغیر سوونی اونگه ییغیلهدی و قوروقچیلیک وقتیده دهقانلر و ایکینچیلر ییرلری سووغاریلیشی اوچون اوندن فایدهلنه آلهدیلر.»
شونینگدیک بتیکوت تومنیدهگی دهقانلردن باشقه بیری محمد رئوفنینگ ایتیشیچه: «بوندن آلدین یامغیر سوولری شو رقم ناحق کیتهر ایدی؛ لیکن حاضر توغانلرگه ذخیره بولهدی. بو ایش بیلن سوو تاشقینلر آلدین آلینگن و بیزلر اوچون هم کوپ یخشی بولگن؛ چونکه ایکینزارلریمیزنی سووغاره آلهمیز و قوروقچیلیکده دهقانلر اوچون کوپ فایدهلی دیر.»
مذکور دهقانلرنینگ ایتیشلریچه، اوتگن ییللرده سوو کملیگی یا-ده سووتاشقینلر سبب زراعتی ییرلردن کوپ قطاری زیان کورهردی؛ لیکن سوو توغانلری قوریلیشی بیراز بو قیینچیلیکنی کمهیتیریب و زراعتی فعالیتلر یخشیلنیشیگه امکانیت یرهته آلهدی.
باشقه بیرتاماندن، سوو حوزهسی ایش بیلرمانلرینینگ اورغولشیچه، سوو توغانلری توپراق بوزیلیشی آلدینی آلیب و یشیل ساحهلر کوچهیشیگه سبب بولهدی.
سوو مدیریت بولیشی بولیمی متخصصی وحید اسلامنینگ ایتیشیچه، بو کبی لایحهلر اقلیم اوزگریشلری سلبی اثرلری کمهیشیده مهم اورینگه ایگه دیر. اونگه کوره، سوو تاشقینلر چاغیده سوو جریانی سرعتی کنترول بولیشی، اویلر، سرکلر و زراعتی ییرلرگه زیانلر کمهیشیگه سبب بولیب و نتیجهده، اهالی اقتصادی زیانلری هم کمهیهدی.
اونینگ کوپهیتیریشیچه: «توغان بولگن منطقهلرده، سوو بارلیگی نتیجهسی کوپ مثبت دیر. ییر آستی سوولر او ییرده اوی ییرلریده قالهدی و سطحی اونچه پس توشمهیدی؛ چونکه سوولر توغانلرده سقلنهدی و ییرگه جذب بولهدی. شونینگدیک ینه بیر فایدهسی شو که توغانلر سوو تاشقینلر جریانی سرعتینی کنترول قیلهدی و توغانلر قوریلگن منطقهلرده، اونینگ سوویدن زراعت اوچون هم فادیهلنیش ممکن.»
سوو بولیمی ایش بیلرمانلرینینگ ایتیشلریچه، ننگرهار و افغانستاننینگ باشقه ولایتلریده سوو توغانلری قوریلیشی دوام قیلگنی و بو لایحهلرنینگ درست شکلده مدیریت بولگنیده، کیلهجکده سوو کملیگی و طبیعی واقعهلر طفیلی زیانلر، بیراز کنترول بولیشی ممکن. اولرنینگ ایشانچیگه کوره، بو کبی لایحهلر رواجلنیشی، سوو منبعلری درست مدیریت بولیشی یانیده، زراعت بولیمی رواجلنیشی همده اهالی تیریکچیلیگی وضعیتی یخشیلنیشیده هم مهم اورینگه ایگه بوله آلهدی.
