امریکا نینگ افغانستان نی قیته قوریش اوچون مخصوص تیکشیریش اداره‌سی (سیگار)، اوتگن کون کیچ قورون ترقه‌تگن ینگی گزارشی‌ده، افغانستان گه دنیا جماعه‌سی اینیقسه امریکا یاردملری نینگ قنده‌یلیگینی تیکشیرگن.
مذکور گزارش‌ده سیگار، بیرلشگن ملت‌لر تشکیلاتی نینگ افغانستان گه انسان‌پرورلیک یاردم‌لر یوباریلیشی خصوصیده اراده‌لی بولگنی گه تاکید‌لب اعلام قیلیشیچه، بو یاردم‌لر نینگ مذکور مملکت گه کمه‌یشی ممکن.
بیزلرنینگ «ایکس» ترماغی ده هم تعقیب قیلینگ!
اوشبو گزارش نینگ بیر بولیمی‌ده کیلیشیچه: «گرچند بیرلشگن ملت‌لر تشکیلاتی افغانستان گه یاردملری نی یوباریشی خصوصیده دوام ایتیش‌نی کوته‌یاتگن بولسه هم، بیراق کیله‌جک‌ده افغانستان ده نقد پول انتقال بیریلیشی، اوتکزیلیشی و ساتیب آلینیش مقدارینی کمه‌یتیره‌دیگن بیر قنچه سبب‌لر هم بار. بیرینچی‌ده افغانستان اوچون بیرلشگن ملت‌لر تشکیلاتی نینگ مالی یاردملری کمه‌یماقده دیر.»
ترقه‌تیلگن معلومات‌لر اساسیده، سیگار نینگ اوشبو گزارشی‌ده اوتگن ایکی ییل‌ده ۲.۹ میلیارد دالر نقدی یاردم یالغیز افغانستان گه یوباریلگن که بو آره‌ده، ۲.۶ میلیارد دالری بیرلشگن ملت‌لر تشکیلاتی گه تیگیشلی یاردم بیرووچی تشکیلات‌لر اختیاری‌ده قرار تاپیب و صرفلنگن.
شونینگدیک سیگار بو گزارشی‌ده ادعا قیلیشیچه، بیرلشگن ملت‌لر تشکیلاتی نینگ یاردملری اسلام امیرلیگی کنترولی آستیده بولگن افغانستان مرکزی بانکی سرمایه‌سی گه میلیون‌لر دالر فایده‌سی بولگن که، بو توغریده افغانستان مرکزی بانکی مذکور گزارش نینگ یازیلگونگه قدر سلام‌وطندار نینگ سوراقی گه جواب قیترمه‌گن.
بولر گه علاوه، سرپرست حکومت اقتصاد وزیرلیگی، افغانستان اهالی‌سی نینگ اقتصادی وضعیتی یخشی‌لنیشی اوچون انسان‌پرورلیک یاردم‌لر ارائه‌سی یانیده، دنیا‌دن کوپینچه همکارلیک نی کوتیب تورگن.
بو توغریده اقتصاد وزیرلیگی سوزلاوچیسی عبدالرحمان حبیب نینگ ایتیشیچه: «بیرلشگن ملت‌لر تشکیلات و دنیا جماعه‌سی افغانستان نینگ اقتصادی اوستون‌لیک‌لری اساسیده، ایش زمینه‌سی یره‌تیلیشی گه سبب بوله‌دیگن رواجلنیش برنامه‌لر خصوصیده تمرکز قیلگنی صورت‌ده، استه-سیکین شکلده افغانستان اهالی‌سی نینگ اقتصادی وضعیتی یخشی‌لنیشی خصوصیده یاردم بیریشی ممکن.»
شونده‌‌ی بیرحالده، اقتصادی مسئله‌لر بیلرمانی عبدالنصیر رشتیا، قشاق‌لیک طفیلی یوزگه کیلگن انسانی بحران‌نی برطرف قیلیش خصوصیده دنیا جماعه نینگ افغانستان اوچون بولگن انسان‌پرورلیک یاردملری قندی ترقه‌تیلیشی جریانی قیته کوریب چیقیلیشی‌گه تاکید قیلگن.
بیزلرنینگ فیسبوک صحیفه‌میزگه باش اورینگ!
جناب رشتیا نینگ کوپه‌یتیریشیچه: «پول فزیکی شکلده افغانستان نینگ مارکیتی گه کیرگنی یا-ده بو یاردم‌لر پولی‌دن افغانستان ایچکی تولید‌لری ساتیب آلینگنی صورت‌ده، مذکور انسان‌پرورلیک یاردم‌لر نینگ فایده‌لی بولیشی ممکن، عکسینچه حالده، ماده‌لر ساتیب آلینه‌دیگن مملکت‌لر کوپراق فایده کوره‌دی.»
عین حالده، افغانستان ده بیرلشگن ملت‌لر تشکیلاتی ترقیاتی دستوری نینگ سونگی گزارش اساسیده، حاضر ایسه افغانستان ده اون کیشی‌دن ییتی‌ته‌سی یامان اقتصادی وضعیت سبب، حیات‌لری نینگ دستلبکی نیازلری نی تأمین‌لش گه کوچلری ییتیشمه‌یدی.
