افغانستان تینچلیک پروسه‌سی بوییچه آمریکا تشقی ایشلر خاص نماینده‌سی زلمی خلیل‌زاد نینگ ایتیشیچه، افغانستان سابق جمهوررئیسی محمداشرف غنی نینگ قاچیب کیتیشی، بو مملکتده قدرت نی انتقال بیریش پروسه‌سینی بوزگن.
افغانستان تینچلیگی بوییچه آمریکا خاص نماینده‌سی بریتانیالیک فایننشال تایمز کونده‌لیگی بیلن اوتکزگن خاص سوزلشووده ایتیشیچه، محمداشرف غنی نینگ افغانستان دن قاچمه‌سی و طالبان نینگ کابل گه کیرمه‌سیدن نیچه ساعت آلدین، تامانلر کیله‌جک حکومت توغریسیده بیر کیلیشوو گه قول تاپگونگه قدر، جناب غنی نینگ جمهوررئیس صفتیده قالیب و ایش گه دوام بیریشی حقیده کیلیشگن ایکنلر.
جناب خلیل‌زاد مذکور سوزلشووده کوپه‌یتیریشیچه، اوشبو ریجه اساسیده طالبان هم ایکی هفته و افغانستان کیله‌جک حکومتی تشکیل ایتیلگونگه قدر کابل گه کیرمه‌سی ممکن ایدی. افغانستان تینچلیک پروسه‌سی بوییچه آمریکا خاص نماینده‌سی نینگ اورغولشیچه، غنی نینگ افغانستان دن چیقیب قاچیشی افغانستان امنیتی کوچلری نینگ وظیفه‌لرینی ترک قیلیشی گه سبب بولدی و کیین ایسه طالبان هم کابل شهری گه کیردی.
بیزلرنینگ فیسبوک صحیفه‌میزگه باش اورینگ!
شونینگدیک زلمی خلیل‌زاد نینگ ایتیشیچه، افغانستان تینچلیک پروسه بوییچه آمریکا تشقی ایشلر وزیرلیگی خاص نماینده‌سی صفتیده وظیفه‌سینی کوپ یخشی بیر شکلده انجام بیرگن.
طالبان ۲۴- اسد کابل گه کیریب و کیین ایسه جمهوررئیس‌لیک سرایی نی نظارتگه آلدی. مذکور گروه ۱۶- سنبله ده سرپرست کابینه‌سینی اعلام قیلدی. طالبان کابینه‌سی نینگ رویخطی اساسیده، ملا محمدحسن آخند رئیس‌الوزرا سرپرستی و ملا عبدالغنی برادر و عبدالسلام حنفی ایسه اونینگ اورین‌باسرلری صفتیده تعیین‌لندی.
