افغانستان ده شیعه و هزاره یشاوچیلر نینگ اولدیریلیشی دوامی و توخته‌یشی آره‌سیده، اوتگن ایکی ییلده مملکت‌ده یوز بیرگن اینگ مهم سکیز ترور واقعه‌لریده، ۱۶۳ کیشی اولیب و ۳۳۳ کیشی ایسه یره‌لنگن. اوتگن ییل‌لر گه قره‌گنده اسلام امیرلیگی دوریده یشاوچیلر نینگ فیزیکی امنیتی کوپه‌یگنی بیرحالده؛ بیراق شیعه و هزاره یشاوچیلر گه هدف‌لی هجوم‌لر نینگ حاضرگچه دوامی بار که، ینگیلیکده اوتگن هفته پنج‌شنبه کیچه، کابل غربی دشت برچی منطقه‌سیده جایلشگن «ملت» اسملی بیر سپورت سالونی‌ده پارتلش یوز بیردی.
بیرلرمان‌لر، بو کبی هجوم‌لرده شیعه و هزاره یشاوچیلر نینگ هدف قرار بیریلیشی خصوصیده خواطر بیلدیریب ایتیشلریچه، بو وضعیت نینگ دوام قیلگنی مملکت‌ده قومی قیین‌چیلیک‌لر نینگ کوپه‌یتیریشی ممکن. بو توغریده حربی و خوفسیزلیک مسئله‌لر بیلرمانی صادق شینواری نینگ سلام‌وطندار گه ایتیشیچه: «سونگی هجوم‌لر اسلام امیرلیگی نینگ خوفسیزلیک و کشفی سازمان‌لری نینگ مکمل غفلت قیلگنی نی کورسته‌دی و بو واقعه‌لر عامل‌لری نینگ تانیش اوچون سازمان‌لر نینگ سعی و حرکت قیلیشی کیره‌ک.»
اوتگن ایکی ییلده شیعه و هزاره یشاوچیلر برابریده اویوشتیریلگن اینگ جدی هجوم، ۱۴۰۱-ییل ۸-میزان، کابل غربی‌ده جایلشگن کاج تعلیمی مرکزی گه اویوشتیریلگن هجوم ایدی که، ۵۳ کیشی اولیب و ۸۰دن آرتیق کیشی یره‌لنگن. شونینگدیک، ۱۴۰۱-ییل ۳۰-حمل کابل غربی‌ده عبدالرحیم شهید مکتب اوقووچیلری، مکتب‌دن چیقیشلری پیتده پارتلش هجومی آستیده قالگنلر که نتیجه‌ده، آلتی کیشی اولیب و ۱۱ کیشی یره‌لنگن ایدی که، اولردن کوپینچه‌سی اوقووچی ایدی.
بیزلرنینگ فیسبوک صحیفه‌میزگه باش اورینگ!
شونینگدیک ۱۴۰۱-ییل ثور آیی نینگ بیرینچی و ایکینچی کونلری‌ده بلخ و قندوز ولایتی‌ده شیعه مذهبی گه تیگیشلی ایکی مسجد‌ده ایکی قانلی واقعه یوز بیرگن ایدی. بلخ مرکزی مزارشریف شهری‌ده جایلشگن «سه‌دکان» مسجدی‌ده یوز بیرگن بیرینچی واقعه‌ده، ۳۰ شیعه نماز اوقووچی اولیب و کمیده ۸۰ نماز اوقووچی ایسه یره‌لنگن. بوندن کیین، ۱۴۰۱-ییل ۲-ثور، قندوز ولایتی امام صاحب تومنیده شیعه مذهبی گه تیگیشلی خانقاه مسجدی‌ده پارتلش یوز بیرگن ایدی که، اوشبو پارتلش نتیجه‌سیده ۱۲ باله شامل ۳۶ کیشی اولیب و ۵ باله شامل ۴۷ کیشی یره‌لنگنلر.
شو رقم، ۱۴۰۱-ییل ۱۲-حمل شیعه مذهب یشاوچیلری نینگ حیات کیچیره‌دیگن هرات شهری نینگ جبرئیل شهرچه‌سی اطرافیده «توحید ۱۸» سرکی‌ده، یوز بیرگن پارتلش عاقبتیده ۵ تینچ اهالی اولیب و ۲۵ کیشی یره‌لنگن. اوشبو هجوم‌دن قریب بیر آی اوتگنی‌دن کیین، ۱۴۰۱-ییل، ۸-ثور بلخ مرکزی مزارشریف شهری‌ده هزاره‌لر نینگ مینگن ایکی موتر، ییرلشگن ماین طفیلی ایکی پارتلشی گه دوچ کیلیب نتیجه‌ده، ۹ کیشی اولیب و ۱۳ کیشی یره‌لنگن.
اوتگن ایکی ییلده شیعه مذهب یشاوچیلر برابریده اویوشتیریلگن خوفسیزلیککه قرشی اونملی واقعه‌لردن کوپینچه‌سی، ۱۴۰۱-ییلده یوز بیرگن و اونگه قره‌گنده جاری ییلده هزاره یشاوچیلر برابریده آزراق واقعه‌لر یوز بیرگن؛ بیراق سونگی بیر آی‌ده، هزاره یشاوچیلری برابریده خوفسیزلیککه قرشی جدی ایکی واقعه یوز بیرگن که، بیر قطار کیشی نینگ اولیب و یره‌لنیشی گه سبب بولگن دیر.
بیرینچی واقعه ۱۴۰۲-ییل ۲۱-میزان، بغلان مرکزی پلخمری شهری‌ده امام زمان مسجدی‌ده هزاره یشاوچیلریدن قطاری نینگ جمعه نمازی نی اوقیشلری پیتده یوز بیرگن که، مذکور هجوم نتیجه‌سیده، ۲۰ کیشی اولیب و ۴۰ کیشی یره‌لنگن. شیعه مذهب یشاوچیلری برابریده یوز بیرگن ینگی واقعه، اوتگن هفته پنج‌شنبه کیچه، ۴-عقرب کابل غربی دشت برچی منطقه‌سیده‌گی «ملت» اسملی سپورت سالونی‌ده دیر که مذکور پارتلش نتیجه‌سیده، حاضرگچه تورت کیشی اولیب و ییتی کیشی یره‌لنگنی گزارش بیریلگن. اوشبو هجوم مسئولیتی نی داعش گروهی تن آلگن.
بیزلرنینگ «ایکس» ترماغی ده هم تعقیب قیلینگ!
بو بیلن بیرگه، بیرلرمان‌لر هزاره یشاوچیلری نینگ حیات کیچیره‌دیگن بولیم‌لر اینیقسه شهرلر امنیتی تامین‌لنیشی اوچون، سرپرست حکومت تامانیدن جدی تدبیرلر قولگه آلینیشی خصوصیده تاکید قیلگن. بو توغریده حربی ایش بیلرمانی اسد‌الله ندیم نینگ ایتیشیچه: «قانونی، حقوقی، شرعی و وظیفوی اساسده، اوشبو یشاوچیلر امنیتی نی تأمین‌لش حاضرگی حکومت نینگ ایشی دیر. هزاره یشاوچیلری حیات کیچیره‌دیگن منطقه‌لر امنیتی نی تأمین‌لش بو حکومت مسئولیتی دیر.
افغانستان اسلام امیرلیگی ایچکی ایشلر وزیرلیگی مسئوللری، شیعه و هزاره یشاوچیلری برابریده اویوشتیریله‌دیگن هجوم‌لر نینگ افغانستان ده قومی بیرلیک نینگ اورته‌دن کیتکزیش مقصد صورت تاپیشی گه اشاره قیلیب و ایتیشیچه، آسیب ییتیشه‌دیگن منطقه‌لر امنیتی تأمین‌لنیشی اوچون کوپینچه سعی و حرکت قیلیشی ممکن. اوشبو وزیرلیک سوزلاوچی اورین‌باسری بسم‌الله حبیب نینگ ایتیشیچه: «ایچکی ایشلری وزیرلیگی، آسیب ییتیشه‌دیگن منطقه‌لرده جدی تدبیرلر آلگنی یانیده، اهالی‌دن هم خوفسیزلیک کوچلری بیلن همکارلیک قیلیشلری نی ایسته‌یدی.»
ایتیش کیره‌ک، اوشبو گزارش ده شیعه‌مذهب و هزاره‌لر گه قرشی اویوشتیریلگن اوچ هجوم مسئولیتینی داعش گروهی خراسان بولیمی تن آلگن؛ اسلام امیرلیگی سونگی ایکی ییل ده مذکور گروه نینگ یوق ایتیش اوچون افغانستان نینگ تورلی ساحه‌لری ده عملیات اوتکزگن؛ بیراق اوتگن ایکی ییل ده شیعه‌لر گه قرشی اویوشتیریلگن بیش هجوم مسئولیتینی هیچ بیر گروه تن آلمه‌گن.
