روسیه دولت رهبری ولادیمیر پوتین، غرب دولتلری آلیب بارهیاتگن سیاستنی قتیق تنقید قیلیب، اروپانی باشقه دولتلرنینگ ایچکی مسئلهلریگه ارهلشکنلیکده عیبلهدی.
اونینگ سوزلریگه کوره، غرب اوزینی دنیا گه ترتیب و قانون اورنتهیاتگن طرف صفتیده کورستهدی، اما اصلیده باشقه دولتلرنینگ ایچکی ایشلریگه ارهلشیب، اولر گه باسیم اوتکزیشگه حرکت قیلماقده.
او شوندهی دیگن: «غرب دولتلری دنیا قاعدهلرگه اساسلنگن بولیشی کیرهکلیگینی ادعا قیلهدی، لیکن بو گپلر آرتیده باشقه دولتلرنینگ مستقللیگینی حرمت قیلمسلیک، اولرنینگ ایچکی ایشلریگه ارهلشیش و تشقی سیاستینی اوزگرتیریشگه مجبورلش کبی نیتلر یشیرینگن. روسیه و دنیادهگی کوپلب مملکتلر بوندهی قاعدهلرنی مطلقا قبول قیلمهیدی.»
روسیه جمهور باشلیغی، دنیاده برچه دولتلر تینگ بولیشی، هر بیر مملکت اوز ترقیات یولینی مستقل تنلشی کیرهکلیگینی تأکیدلهگن. او خلقارا حقوق استوار بولیشی و بو قانونلر برچه دولتلر اوچون بیر خیل عمل قیلیشی لازملیگینی ایتگن.
پوتین، شونینگدیک بیرلشگن ملتلر تشکیلاتی خوفسیزلیک کینگشینینگ آبروسی و وکالتی سقلنیب قالیشی مهم ایکنینی هم قید ایتگن.
روسیه رهبری اول هم بیر نیچه بار دنیا بیر مرکز گه بویسونمسلیگی، عکسینچه کوپ قطبلی تیزیم شکللنیشی کیرهکلیگینی ایتگن. اونینگ فکریچه، کیلهجکدهگی دنیا ترتیبی فقط تینگلیک، اوزارا حرمت و برچه دولتلرنینگ منفعتلرینی حسابگه آلیش اساسیده قوریلگندهگینه عدالتلی بولهدی.
پوتیننینگ تأکیدلشیچه، حاضر ینگی دنیا ترتیبی شکللنماقده و اونده ملی مستقللیکنی قدرلهیدیگن دولتلرنینگ اورنی تاباره کوچهیب بارماقده.
