تورکیه دولت رهبری رجب طیب اردوغان، قزاقستان گه قیلگن رسمی سفریده، بو مملکتنی «آته مکان» دیب اتهگن.
ییتکرمهلرنینگ معلوماتیگه کوره، اردوغان جنابلرینی قزاقستان مستقللیک سراییده بو مملکت جمهور باشلیغی قاسم جومارت توقایف شخصاً کوتیب آلگن.
تورکیهنینگ یوقاری مرتبهلی مهمانی شرفیگه قزاقستان هوا مدافعه کوچلرینینگ قیروچی اوچاقلری نمایش پروازینی عملگه آشیرگن. اوچاقلر آرتیدن قیزیل و آق رنگلی توتون (دود) ایزلرینی قالدیریب، تورکیه بیراغینی عکس ایتتیرگنلر. شوندن سونگ، تار دایرهده اوتکزیلگن مذاکرهلرده توقایف ایردوغاننی «قدرلی برادر» دیه قرشی آلگن و اونینگ تشریفینی تاریخی واقعه دیب اتهگن.
او شوندهی دیگن: «قزاقستان و تورکیهنی دوستلیک، برادرلیک و ابدی شیریکلیک باغلب تورهدی. مملکتلریمیز اورتهسیده هیچ قندهی قرمه-قرشیلیک یوق.»
اوشبو اوچرهشووده اردوغان ایسه، قزاق خلقینینگ مهمان دوستلیگیگه منتدارلیک بیلدیریب، قزاقستاننی «آته مکان» دیب اتهگن.
کیینچهلیک ایکی دولت رهبرلری استراتیژیک همکارلیک بوییچه عالی درجهدهگی کینگشنینگ آلتینچی ییغیلیشینی اوتکزگن. بو ییغیلیشده توقایف جنابلری قزاقستان تورکیهنی قرداش دولت و ایشانچلی همکار صفتیده کوریشینی بیلدیریب، ایکی دولت اورتهسیدهگی تاریخی رشتهلر مستحکم دوستلیک پایدیواری ایکنینی قید ایتگن.
اونینگ سوزلریگه کوره، تورکیه قزاقستاننینگ اینگ ییریک سرمایه کیریتوچیلریدن بیری حسابلنهدی. حاضرگچه تورکیه ۶ میلیارد دالر سرمایه کیریتگن، قزاقستاننینگ تورکیه گه سرمایه کیریتیش مقداری ایسه ۲.۵ میلیارد دالر گه یقینلشگن. تورکیه، شونینگدیک قزاقستاننینگ اساسی بیش سودا همکاریدن بیری سنلهدی.
تامانلر، سودا-اقتصادی علاقهلرنی کینگهیتیریش، ایکینچیلیک، انرژی، ترانسپورت-لوجستیک، مدافعه صناعتی، رقملشتیریش و صنعی هوش ساحهلریدهگی همکارلیکنی محاکمه قیلگن.
