بدخشان ولایتی واخان تومنی ده کیچیک‌وکتته پامیر ده افغانستان نینگ آزچیلیک ایتنیک قیرغیزلر تیریکچیلیک قیلماقده، اولر دستلبکی طبی امکانیت، مخابرات و ترانسپورت دن فایده‌لنه آلمسلیکلریدن شکایت قیلماقده‌لر.
بدخشان پامیری ده قیرغیز یشاوچیلریدن سلطان‌محمد، کیچیک‌وبویوک پامیر یشاوچیلری نینگ ستندرد سرکی یوق‌لیگیدن نالیب ایتیشیچه، مذکور ایکی منطقه یشاوچیلری اوز کسل‌لرینی کوپ قیینچیلیک بیلن ساغلیک مرکز گه انتقال بیره‌دیلر.
اونینگ کوپه‌یتیریشیچه: «کوپ قیینچیلیک بیلن باریب کیله‌میز، ایچیملیک سوونی آت و باشقه حیوان‌لر آرقه‌لی تأمینله‌یمیز، کسل‌نی آلیب کیلگن پیت‌لری سوو تاشقینی بولگن آخشم دن ایرته‌لب گچه کوتگن‌میز.»
بیزلرنینگ فیسبوک صحیفه‌میزگه باش اورینگ!
قیرغیز یشاوچیلری گه کوره، طبی امکانیت دن فایده‌لنه آلمسلیکلری باعث، اولر آره‌سیده اولیم میزانی آشماقده.
قیرغیز یشاوچیلریدن عبدالحق نینگ سلام‌وطندار گه ایتیشیچه، قیرغیزلیک آنه‌لر و چقه‌لاق‌لر، طبی امکانیت دن فایده‌لنه آلمسلیکلری باعث قربان بوله‌دیلر. اونگه کوره: «حاضر برچه ساحه‌لرده قیینچیلیگیمیز بار، ۱۰ ولادت دن تورت یا بیشته‌سی قاله‌دی و قالگنی وفات ایته‌دی یا ده بیر ییل ده دنیا گه کیله‌دیگن ۱۰ چقه‌لاق دن، ایکی یا اوچ ته‌سی تیریک قاله‌دی.»
ایتیش کیره‌ک که، بدخشان ده پامیر یشاوچیلری نینگ احوالی آغیرلیگیدن گزارش‌لر ترقه‌لگن بولسه ده؛ بیراق افغانستان نینگ آزچیلیک ایتنیک یشاوچیلری، حاضر هم تورلی خیل قیینچیلیک بیلن حیات کیچیرماقده‌لر.
اوتگن هفته پنج‌شنبه کونی، ۲۹ جدی، قیرغیزستان تشقی ایشلر وزیری جانبیک کولوبایف، مطبوعاتی بیر ییغیلیشده بدخشان پامیری ده قیرغیزلر نینگ احوالی دن خواطر بیلدیرگن.
قیرغیزستان تشقی ایشلر وزیری نینگ ایشانچی گه کوره، افغانستان‌لیک قیرغیزلر آره‌سیده تصدیقلنمه‌گن بیرکسل‌لیک ترقه‌لگن که اولر نینگ اولیمی گه سبب بولماقده.
اونینگ ایتیشیچه: «بیر ویروس طفیلی پامیر قیرغیزلری نینگ توپلم اولیمی حقیده گزارش‌لر بیریلگن و بو موضوع نی افغانستان ده قیرغیزستان ایلچیخانه‌سی تیکشیره‌دی.»
افغانستان چیگره، قوم و قبیله‌لر وزیرلیگی نینگ ایتیشیچه، سونگی کون‌لرده ۱۶ قیرغیزلیک نامعلوم کسل‌لیککه چلینیش‌لری طفیلی قربان بولگنلر.
مذکور وزیرلیک سوزلاوچیسی حمدالله فطرت نینگ سلام‌وطندار گه ایتیشیچه: «قیینچیلیک کوپ مثال صورتده، هوا ساووق‌لیگی و آکسیجن آزلیگی دیر، شونینگدیک سونگی کون‌لرده اولر آره‌سیده نامعلوم بیر کسللیک ترقه‌لگن، اوشبو منطقه ده باله‌لر و خاتین‌لر شامل ۱۶ کیشی اوشبو کسللیک طفیلی هلاک بولگن و بیرقطاری بو ویروس گه چلینگن.»
بیراق ساغلیق‌نی سقلش وزیرلیگی بدخشان پامیری ده قیرغیزلر آره‌سیده ویروس ترقه‌لیشینی تصدیقلمه‌یدی، اما اولردن قطاری هوا کوپ ساووق بولیشی باعث هلاک بولگن دیه تأکید ایته‌دی.
بیزلرنینگ توییترده هم تعقیب قیلینگ!
عین‌حالده، سونگی نیچه آی ده ساغلیق‌نی سقلش وزیرلیگی نینگ ساغلیک ایکینچی تیمی شنبه کونی، ۱ دلو پامیر گه ییتیب بارگن. بوندن آلدین مذکور وزیرلیک تامانیدن بیر هیئت اوشبو منطقه گه یوباریلگن ایدی، مذکور منطقه ده ساغلیک مرکزلرنی فعال قیلگن.
ساغلیق‌نی سقلش وزیرلیگی سوزلاوچیسی شرافت‌زمان نینگ سلام‌وطندار گه ایتیشیچه، اولر پامیر یشاوچیلری نینگ قیینچیلیکلری حلی اوچون سعی‌وحرکت قیلماقده‌لر.
شرافت زمان گه کوره: «آلتی آی‌لیک طبی امکانیت نی اوشبو منطقه گه انتقال بیردیک، بو منطقه‌لرده کوچلی قار یاغیشی باعث یوللر توسیلگن شو بیلن هم حاضر ۵۰ فایز اهالی طبی امکانیت دن فایده‌لنه‌دی.»
ایتیش کیره‌ک که، افغانستان ده اسلام امیرلیگی حاکمیت نی قولگه آلیشیدن کیین، قیرغیزستان پامیر قیرغیزلرینی مذکور مملکت گه انتقال بیریش پروسه‌سینی باشله‌گن و نیچه کون آلدین، قریب ۴۰۰ قیرغیز یشاوچیسینی اوشبو مملکت گه انتقال بیرگن.
