مملکت نینگ بیرقطار ولایت‌لری ده بیلیم یورت اوقیتووچیلریدن بیرقطاری گه کوره، اوزبیک تیل و ادبیات دیپارتمنت‌لری گه طلبه‌لر نینگ علاقه‌سی کوپه‌یگن، بیراق اولر دن بعضی‌لری صنف آزلیگی، مناسب جای یوق‌لیگی، کمپیوتر، پروجکتور کبی تکنالوژی امکانیت‌لری یوق‌لیگیدن نالیدیلر.
افغانستان بویلب فاریاب، جوزجان، تخار، سرپل و بغلان ولایت‌لری اوزبیک تیلی و ادبیات دیپارتمنتی مسئوللری و اوقیتووچیلری، اسلام امیرلیگی حاکمیتی بیرینچی ییلی گه نسبتن بو ییل طلبه‌لر نینگ سانی سیزیلرلی درجه ده کوپه‌یگنیدن خورسندلیک قیله‌دیلر.
فاریاب بیلیم یورتی اوزبیک تیلی و ادبیات دیپارتمنتی مسئوللری گه کوره، اسلام امیرلیگی حاکمیتیدن کیین هم فعالیت‌لری گه نورمال شکلده دوام بیریب کیلماقده‌‌لر و اوشبو ییل کانکور سیناوی ده یوکسک اوقوو وزیرلیگی دن تکلیف قیلگن طلبه‌لری، مذکور بیلیم یورت اوزبیک تیلی و ادبیات دیپارتمنتی نی تنله‌گن‌لر.
بیزلرنینگ فیسبوک صحیفه‌میزگه باش اورینگ!
فاریاب بیلیم یورتی اوزبیک تیلی و ادبیات دیپارتمنتی آمری محمدعارف قادری نینگ ایتیشیچه: «اوزبیک تیلی و ادبیات دیپارتمنتی فاریاب بیلیم یورتی اینیقسه ادبیات و بشری بیلیم فاکولته‌سی نینگ چوکاتیده ۱۳۶۶-ییل دن بویان فعالیت قیلماقده، جمهوریت زمانیده بو بولیم علاقه‌مندلری یوزی گه آچیق ایدی و اسلام امیرلیگی حاکمیتی آستیده هم نورمال شکلده فعالیت قیلماقده، هر ییلی ۵۰ دن ۸۰ کیشی گچه ظرفیت طلب قیلینه‌دی، اوتگن ییل‌لرده قیز باله‌لر سانی گه قره‌گنده اوغیل باله‌لر سانی کم‌راغ ایدی. قوانرلی دیر که بو ییل ۸۰ کیشی ظرفیت کورسه‌تیلگن ایدی و اولردن ۷۳ کیشی ثبت نام قیلگن‌لر.»
شونینگدیک، مذکور ولایت استادلریدن بولمیش محمداشرف شریفی، افغانستان بویلب بیلیم یورت‌لر ده برچه اوزبیک تیلی و ادبیات دیپارتمنت‌لری ده بیر خیل معیار، بیر خیل نصاب و بیر خیل مفردات عملی بولیش اوچون سعی‌وحرکت قیله‌یاتگن‌لرینی معلوم قیله‌دی.
او نینگ ایتیشیچه، اسلام امیرلیگی نینگ سونگی بیر ییل ایچیده افغانستان تاریخی ده مثلی کوریلمه‌گن اینگ کتته بنیادی ایشلریدن بیری، افغانستان نینگ سکیز بیلیم یورتی ده اوزبیک تیلی و ادبیاتی دیپارتمنتی اوچون ینگی نصاب و مفردات توزه‌تیش زمینه‌سینی یره‌تگن. او نینگ کوپه‌یتیریشیچه، ۳۰۰ و ۴۰۰ بیتلی نصاب و مفردات دفترینی توزه‌تیب یوکسک اوقوو وزیرلیگی گه تاپشیریلگن، تصویب بولیشیدن کیین تطبیق بولیب و اوزبیک تیلی و ادبیات دیپارتمنت‌لری ده بیرخیل معیار، بیرخیل نصاب، بیرخیل مفردات عملی بوله‌دی.
جوزجان و تخار بیلیم یورت‌لری اوزبیک تیلی و ادبیات دیپارتمنتی اوقیتووچیلری نینگ ایتیشلریچه، سونگی ایکی ییل ده کانکور سیناوی گه ییگیت‌لر نینگ علاقه‌سی پسه‌ی‌گن ایدی، بیراق بو ییل بو بولیم نی تنله‌گن‌لر سانی قانیقرلی دیر. اونگه کوره، سونگی ایکی ییل ده‌گی وضعیت اوزبیک تیلی وادبیات دیپارتمنتی گه علاوه باشقه بولیم‌لر اوستیگه هم تاثیر قیلگن.
جوزجان و تخار بیلیم یورت‌لری اوزبیک تیلی و ادبیات دیپارتمنتی اوقیتووچیلری، اوشبو بولیم شامل برچه بولیم‌لر گه بوله‌یاتگن دقت نی ییترلی بیلمه‌یدی. چونکه اولر نینگ ایشانچی گه کوره، استادلر نینگ ماسترلیک و دکتوریا درجه‌سیده تحصیل آلیش گه احتیاج‌لری بار و چپتر اورنیده کیریتیلیشی اوچون یازگن کتاب و اثرلری اقتصادی قیینچیلیک باعث چاپ بولمه‌گن، اولر اسلام امیرلیگی رسمی‌لریدن بوتوغریده دقت قیلیشینی سوره‌یدیلر.
بیزلرنینگ «ایکس» ترماغی ده هم تعقیب قیلینگ!
جوزجان بیلیم یورتی اوزبیک تیلی و ادبیات دیپارتمنتی آمری سیدحسام‌الدین تویغون نینگ ایتیشیچه: «کیینگی اوزگریش‌لردن کیین ییگیت‌لر نینگ کانکوری سیناوی گه علاقه‌سی بیر آز پسه‌ی‌گن ایدی، بوتون بولیم‌لر گه بولگن تاثیر اوزبیک تیلی و ادبیات دیپارتمنتی اوستیگه هم تاثیر قیلگن، اما خورسندلیک بیلن ۱۴۰۲-ییل ده کانکور سیناوی ده اوتگن ییل گه نسبتن ییگیت‌لر نینگ بو بولیم گه علاقه‌سی سیزیلرلی درجه ده یخشی بولگن، بو ییل ۷۰ کیشی شاگرد جذب قیلیش درخواستینی بیرگن ایدیک، حاضرگچه ۴۰ و ۴۵ کیشی کانکور سیناوی گه قازانیب مراجعت قیلگن.»
شونینگدیک، تخار بیلیم یورتی اوزبیک تیلی و ادبیات دیپارتمنتی استادلریدن نجم‌الدین یولداش گه کوره: «اقتصادی قیینچیلیک باعث یازگن نثری توپلم‌لریمیزنی چاپ قیله آلمه‌ی میز، اوزبیک تیلی ده قیزیقه‌دیگن‌لر نینگ ترغیبی اوچون دولت ییریک رسمی‌لری و سوداگرلردن بوتوغریده یاردم بیریش‌لرینی ایسته‌یمیز.»
برچه‌سی بیلن، کابل و بلخ بیلیم یورت‌لری استادلری، اوشبو ییل کانکور سیناوی گه پیشنهاد قیلگن طلبه‌لر رویخطی حاضرگچه یوکسک اوقوو وزیرلیگی تامانیدن اولر گه تاپشیریلمه‌گنینی معلوم قیله‌دیلر. اولر اوشبو بولیم طلبه‌لری نینگ ترغیبی اوچون بو بولیم دن فارغ بولگن‌لر گه ایش زمینه‌سی یره‌تیلیب، خصوصی میدیالر، دولت اداره‌لری ده اوزبیک بولیمی آچیلیب و ملی تلویزیون قاشی ده بولگن اوزبیک بولیمی ایشلاوچیلری سانی کوپه‌‌یتیریلیب و مکتب‌لرده بیرینچی صنف دن ۱۲- صنف گچه اوزبیک تیلی ده درس‌لیک‌لری توزیع قیلینیشینی طلب قیله‌دیلر.
کابل بیلیم یورتی اوزبیک تیلی و ادبیات دیپارتمنتی استادی محمدعالم ایرکین گه کوره: «اوتگن سیناو ده اوزبیک تیلی و ادبیاتی نی تنلش ده بیز ۴۰ کیشی ظرفیت بیرگن ایدیک، ثبت نام اوچ عقرب ده باشلنه‌دی، لیکن اوزبیک تیلی و ادبیات دیپارتمنتی نی تنله‌گن‌لر رویخطی حاضرگچه یوکسک اوقوو وزیرلیگی تامانیدن بیز گه تاپشیریلمه‌گن. اوزبیک ییگیت‌لری اوتگن ییل گه نسبتن بو ییل بو بولیم نی کوپراق تنله‌گن بولسه‌لر دیب امید قیله‌من.»
عینی‌حالده، اوزبیک تیلی و ادبیات دیپارتمنت‌لری نینگ استادلری، اوتگن ایکی ییل گه نسبتن اوشبو بولیم گه ییگیت‌لر نینگ علاقه‌سی و سانی کوپه‌یشیدن خورسندلیک قیلسه‌لرده، لیکن استاد کمچلیگی، درس اوچون مناسب صنف‌لر یوق‌لیگی، کتابخانه یوق‌لیگی، اوزاق ولایت‌لردن کیلگن طلبه‌لر اوچون یاتاقخانه یوق‌لیگی، کمپیوتر کبی باشقه تکنالوژی امکانیت یره‌تیلمسلیگیدن نالیدیلر.
شونینگدیک اولر، استادلر نینگ ماسترلیک و دکتورا درجه‌سیگه قدر تعلیم آلیش گه ضرورت‌لری بارلیگی اوچون اوزبیکستان و تورکیه کبی مملکت‌لر گه یوباریلیشی اوستیگه تاکیدلب و محصل‌لر نینگ ظرفیتینی آشیریش و اوزبیک تیلی گه قیزیقه‌دیگن‌لر نینگ ترغیبی مقصدیده یازگن کتاب و توپلم‌لری چاپ و اوزبیکستان دن کتاب آلیب کیلیش اوچون زمینه یره‌تیلیشینی سوره‌یدیلر.
ایتیش کیره‌ک که، اوشبو ییل (۱۴۰۲) کانکور سیناوی اوتکزیلیشیدن آلدین، اوزبیک تیلی و ادبیات دیپارتمنت‌لری استادلری، سونگی ییل‌لرده مملکت بیلیم یورت‌لری نینگ اوزبیک تیلی و ادبیات بولیم‌لریده درس اوقیش اشتیاقی کمه‌یب باریشیدن خواطر بیلدیریب، بو وضعیت تاپگن حالده، اوزبیک تیلی و ادبیات دیپارتمنت‌لری یاپیلیشیدن آگاه‌لنتیرگن ایدیلر.
