تخمدان تنبل‌لیگی (تخمدان سندرومی)، عیاللر آره‌سیده کینگ ترقه‌لگن هورمونی قیین‌چیلیکلردن بیری دیر. اوشبو کسل‌لیک حیض کوریشده ترتیب‌سیزلیک، اضافی ساچلر چیقیشی، بخار چیقیشی و سیمیزلیککه سبب بوله‌دی.
شفاکارلردن قطاری، مذکور کسل‌لیک‌نینگ اصلی سببی‌نی ناتوغری طرز‌ده حیات کیچیریش دیب و ایتیشلریچه، پاکتلنگن آزیق-آوقت و شیرین‌لیک‌لردن کوپینچه قوللنیش، گازلی ایچیملیک‌لردن فایده‌لنیش، کوپینچه کیلو آلیش، ایرکک هورمون‌لری کوپه‌یشی و ژنتیکی تاثیرلر، بو کسل‌لیک‌نینگ اصلی عامل‌لریدن دیر.
اولرنینگ کوپه‌یتیریشلریچه، اوشبو کسل‌لیک اوزون مدت‌ده خاتین-قیزلر‌ده یوره‌ک کسل‌لیک‌لری، شکر کسل‌لیگی‌نینگ ایکینچی توری، بیپشتلیک و بچه‌دان سرطانی‌گه چلینیش خوفلری‌نینگ کوپه‌یتیریشی ممکن.
بیزلرنینگ فیسبوک صحیفه‌میزگه باش اورینگ!
شفاکارلر، انسولین برابریده وجود مقاومتی، وراثت، سیمیزلیک، استرس و اضطراب بیلن اشتها‌سیزلیک، ساچ توکیلیشی، اضافی ساچلر کوپه‌یشی، حیض کوریش دوره‌سیده قیینچیلیک و ایرکک خصوصیتلری تاپیلیشی کبی علایم‌لرنی، خاتین-قیزلردن ۷۰ فایزی‌نینگ تخمدان سندرومی‌گه چیلینیشی سببی عنوان قیلگنلر.
نسایی-ولادی شفاکاری مشعل بهار‌نینگ ایتیشیچه: «بو کسل‌لیک اصلی عاملی سیمیزلیک دیر و انه شوو سیمیزلیک انسولین برابریده مقاومت قیلیش‌گه سبب بوله‌دی. ایکینچی موضوع هم استرس و اضطراب دیر و ژنتیک سببی دیر که عایله اعضالریدن اوته‌دی و تخمدان تنبل‌لیگی‌گه سبب بوله‌دی. عیاللر آره‌سیده ساچ توکیلیشی و تیری‌نینگ قاره بولیشی‌گه سبب بوله‌دی. بو کسل‌لیک اورته گه کیلگنی‌ده، تشویش، افسرده‌لیک، کوپ آوقت ییش یا-ده اشتها‌سیزلیک، غیرطبیعی قان کیتیش، ساچ توکیلیشی تاپیله‌دی؛ مَنَی و لب یوقاری قسمی‌گه ساچ کوپه‌یشی، بخار چیقیشی، حیض کوریشده قیینچیلیک و ایرککلر خصوصیتلری دیر.»
شونینگدیک نسایی-ولادی شفاکارلریدن باشقه بیری عابده رها، حیات طرزی‌گه توجه قیلیش‌نی بو کسل‌لیککه چلینیش آلدی آلینیشی اوچون مناسب ییچیم یول عنوان قیلیب و ایتیشیچه، آوقت‌لنیش عادت‌لرینی توزه‌تیش، منظم شکلده سپورت قیلیش و استرس‌نی مدیریت قیلیش، تخمدان سندرومی اورته گه کیلیشی‌نینگ آلدی آلینیشی ممکن.
اونینگ کوپه‌یتیریشیچه: «مین یانیم‌گه مراجعت قیله‌دیگن تخمدان سندرومی‌گه چلینگن ۱۰ کسل‌دن برچه‌سی فست‌فود‌دن فایده‌لنه‌دی. مین اولرگه بیرینچی آدیم‌ده حیات طرزی و آوقت‌لنیش‌لری‌ده تغییر کیلتیریشلرینی توصیه قیله‌من، نرمال و طبیعی آوقت‌دن فایده‌لنسینلر و ایکینچی آدیم‌ده وزن‌لری کمه‌یشی اوچون سپورت قیلسینلر.»
عین حالده، سیمیزلیک، حیض کوریشده ترتیب‌سیزلیک و روحی قیینچیلیکلر کبی علایم‌لر بیلن اوچ آی تخمدان سندروم کسل‌لیگی‌گه چلینیب و شفاکارگه باریش اوچون قرار آلگن بلخ ولایتی یشاوچیسی ۲۵ یاشر نادیه گه کوره: «کوپ ناراحت ایدیم و روحی وضعیتیم کوپ خراب ایدی و کون اوتیشی بیلن وزنم کوپه‌یب کیته‌ر ایدی. حیض کوریشیم هم کوپ نامنظم بولگن ایدی؛ یوزیم و قوللریم‌گه کوپ ساچ چیققن ایدی. تخمدان تنبل‌لیگی بولگنی نی بیلمه‌یدیم. کسل‌لیک سبب وضعیتیم خراب بولگنی‌دن کیین شفاکار گه باردیم و او تخمدان تنبل‌لیگی‌‌نینگ تاپگن‌سین دیدی.»
شونینگدیک ناتوغری آوقت‌لنیش، استریس و افسرده‌لیک نی تجربه قیلیش سبب تخمدان سندرومی‌گه چلینگن ۲۱ یاشر عایشه‌نینگ ایتیشیچه، مذکور کسل‌لیک کونده‌لیک حیات و ساغلیگی‌گه کوپ تاثیر قویگن.
بیزلرنینگ «ایکس» ترماغی ده هم تعقیب قیلینگ!
اونینگ کوپه‌یتیریشیچه: «عادت‌لریم کوپ تغییر قیلگن ایدی و افسرده‌لیک تاپگن ایدیم. ساچیم‌نینگ رنگی تغییر قیلگن ایدی. آق بولگن ایدی و شونینگدیک باشقه قیینچیلیکلر تاپیلگن ایدی. شفاکار گه باردیم، تشویش‌نی اوزاق قیل و توغری آوقت‌لن دیدی. مکمل حیاتیم گه تاثیر قویگن ایدی و افسرده‌لیک‌دن اذیت چیکه‌ر ایدیم.»
باشقه بیر تاماندن، توی قیلگنیدن ایکی ییل اوتیب و تخمدان تنبل‌لیگی سبب حاضرگچه حامله بولمه‌گن کابل یشاوچیسی بولمیش ۲۱ صحرا، خواطرلری حقیده ایتیشیچه: «توی قیلگنیم‌دن ایکی ییل اوتگن؛ فرزندیم یوق؛ کوپ اوزوم‌نی ضعیف فکر قیله‌من. اشتهام یوق و فشارم پس و حیض کوریشیم هم منظم ایمس. شفاکار گه باردیم تخمدان تنبل‌لیگیم بارلیگی نی ایدی.»
خلق‌ارا ساغلیق‌نی سقلش تشکیلاتی آرقه‌لی ترقه‌تیلگن گزارشلر اساسیده، یاش جمعیت‌دن قریب ۱۷.۵ فایزی یا-ده آلتی کیشی‌دن بیر ته‌سی حیاتی‌ده بیپشتلیک بیلن روپه‌ره بوله‌دی که سونگی نیچه ییل‌ده ناتوغری حیات طرزی سبب، افغانستان ده عیاللر آره‌سیده بی‌پشت‌لیککه چیلینیش میزانی کوپه‌یگن.
