ناتو باش کاتبی ینس استولتنبرگ مذکور تشکیلات مدافعه وزیرلری نینگ آنلاین ییغینیده ایتیشیچه، چیت‌ایللیک کوچلر بیرگه‌لیکده افغانستان کیلگن و حاضر مذکور کوچلر افغانستان ده قالیشی و چیقیشی خصوصیده آمریکا و بیرلشیک‌لری بیلن بیرگه‌لیکده قرار آلیش زمانی کیلگن.
اونینگ ایتیشیچه: «افغانستان ده حضوریمیز توغریسیده بیرگه‌لیکده قرار آلگنمیز و شونینگدیک توغری زمانده افغانستان نی ترک قیلیشی‌میز خصوصیده حاضر مصلحت و اویغونلیک قیله‌میز.»
آمریکا و طالبان گروهی آره‌سیده امضالنگن کیلیشوونامه اساسیده، چیت‌ایللیک کوچلر جاری ییل ۱- می آیی گچه افغانستان نی ترک قیلیش‌لری ممکن، بیراق مذکور ییغینده ناتو باش کاتبی نینگ ایتیشیچه، افغانستان دن چیت‌ایللیک کوچلر چیقیشی بو مملکت نینگ شرایطی گه باغلیق دیر و افغانستان ده امنیتی وضعیت یخشی بولگندن کیین بو تشکیلات افغانستان نی ترک قیله‌دی.
شونینگدیک ینس استولتنبرگ نینگ ایتیشیچه، گرچند تینچلیک سوزلشوولری باشله‌نیشی بیلن زوروانلیکلر میزانی قویی کیلیشی کوتیب توریلگن ایدی، بیراق بو ایش بولمه‌گن و طالبان زوروانلیکلرنی کوپه‌یتیرگن. او طالبان تامانیدن زوروانلیکلر کمه‌یتیریلیشی نی سوره‌گن.
ناتو باش کاتبی بیاناتی نینگ باشقه بیر بولیمیده ایتیشیچه، طالبان گروهی القاعده بیلن علاقه‌لرینی کیسیش توغریسیده بیرگن وعده‌لریگه عمل قیلیب و القاعده گروهی شامل ترورچیلیک گروه‌لردن حمایت قیلیش‌لرینی توخته‌تیش‌لری کیره‌ک.
ینس استولتنبرگ افغانستان‌لیکلرارا سوزلشوولر گه اشاره قیلیب ایتیشیچه، ناتو بو پروسه‌دن حمایت قیله‌دی.
ناتو مدافعه وزیرلری بوگون چیت‌ایللیک کوچلر افغانستان ده قالیشی یا-ده چیقیشی توغریسیده بیربیراولری بیلن بحث قیلیشه‌دی.
