ناتو باش کاتبی ینس استولتنبرگ، مذکور تشکیلات ییغینی نینگ چیککه‌سیده ایتیشیچه، افغانستان ده دایمی بیر تینچلیک تأمین ایتیلگونگه قدر، بو مملکتدن حمایت قیله‌دیلر. بوگون (چهارشنبه ۲۹- دلو) و ایرته بلجیم پایتختی بروکسل ده ناتو مدافعه وزیرلری نینگ ییغینی آنلاین شکلده یولگه قوییلیشی گه قرار قیلینگن.
ناتو باش کاتبی نینگ ایتیشیچه، مذکور تشکیلات مدافعه وزیرلری بیلن صحبت اوتکزگنیدن کیین بو نتیجه گه ییتیشگنلر کیم، بو ییغینده ناتو نینگ حضوری یا-ده چیقیشی خصوصیده قرار آلمه‌سلیکلری کیره‌ک.
بروکسل ده‌گی ایرکین خبرچی لیلما سدید احمدی، ینس استولتنبرگ دن نقل قیلیب ایتیشیچه، ناتو تیزلیککه افغانستان نی ترک قیلمه‌سی ممکن. اونینگ ایتیشیچه، اولر کیره‌کلی زمان دن آرتیق افغانستان ده قالمه‌یدی؛ بیراق او زمان ییتیشگونگه قدر افغانستان نی ترک قیلمه‌یدیلر.
خانم سدید گه کوره، ناتو مدافعه وزیرلری ییغینی چیککه‌سیده، ناتو باش کاتبی میلادی ۲۰۲۴- ییل گه قدر افغانستان امنیتی کوچلرگه تعلیمات بیریش و مالی حمایت قیلیش اوستیگه اورغوله‌گن.
خانم سدید نینگ سلام‌وطندارگه ایتیشیچه، ناتو ده آمریکا ایلچی‌خانه‌سی نینگ بیر دیپلوماتی گه کوره، جناب بایدن طالبان آمریکا بیلن امضاله‌گن کیلیشوونامه گه عمل قیلگنی یا-ده قیلمه‌گنی نی انیق تیکشیریشی ممکن.
جناب استولتنبرگ افغانستان تینچلیک پروسه‌سینی سینه‌دیگن دیب و ایتیشیچه، طالبان کیلیشوونامه اساسیده ترورچیلیک گروه‌لر بیلن علاقه‌لری نینگ کیسیش‌لری و زوروانلیکلر میزانی و تینچ‌اهالی گه قرشی هجوم‌لرینی کمه‌یتیریش‌لری کیره‌ک.
مذکور ییغینده ناتو باش کاتبی نینگ ایتیشیچه، اقتصادی و اجتماعی ترقیات، سوز ایرکین‌لیگی و عیاللر حقوقی افغانستان ده ۲۰ ییل‌لیک حضورلری جریانیده قولگه کیلتیرگن یوتوق‌لردن دیر و بو یوتوقلر کوزدن چیقاریلیشی نی ایستمه‌یدیلر.
شونینگدیک آمریکا مدافعه وزیری لوید جیمز آستین، ناتو مدافعه وزیرلری ییغینی عرفه‌سیده ایتیشیچه، ناتو ییغینده بحث گه آلینه‌دیگن برچه موردلر خصوصیده قوشمه شکلده بحث اوتکزیب و قرار آلیش‌لری کیره‌ک.
ناتو و آمریکا طالبان تامانیدن زوروانلیکلر میزانی کمه‌یشی نی سوره‌گن بیرحالده، افغانستانلیکلرارا سوزلشوولر باشلنگنیدن ۵ آی اوتماقده و بو پیتده مملکتده ۱۰۰ دن آرتیق هجوم اویوشتیریلگن کیم نتیجه‌ده، یوزلرچه کیشی هلاک و یره‌لنگن. افغانستان حکومتی بو هجوم‌لرنی هردایم طالبان گروهی گه نسبت بیرگن، بیراق طالبان گروهی هم اوشبو حادثه‌لر عاملی افغانستان دولتی دیگن.
