بدخشان ولایتیده اسلام امیرلیگی مخالف گروهلرینینگ حرکتلریگه دایر تشویش بیلدیریلماقده ایکن، اسلام امیرلیگی گه کوره، بوتوغریده هیچ قندهی تشویش یوق و امنیتی کوچلر هر قندهی بیقرارلیکنی وقتیده آلدینی آلیشگه اقدام قیلهدی.
اسلام امیرلیگی سوزلاوچیسی ذبیحالله مجاهد گه کوره، ییتکرمهلرنینگ میش-میشلری و حقیقت اورتهسیده کوپ فرق بار و افغانستان خلقی ینه اوروش و ناتینچلیک طرفداری ایمس و هیچ کیمگه هم امنیتنی بوزیشگه رخصت بیریشمهیدی. او شوندهی دییدی: «بیری ییتکرمهلرنینگ میش-میشلری بار و ینه بیری هم حقیقت بار بوتوغریده تشویشیمیز یوق بونی توشونیش کیرهک کی افغانستان خلقی ینه اوروش ایستمهیدی. جای گه قرهمسدن هر قندهی بوزغونچیلیک حرکت آلدی آلینهدی و امنیتی کوچلر تینچلیک و برقرارلیکنی سقلشده جدی.»
شو بیلن بیرگه، نیچه دهه اوروش و ناتینچلیک گواهی بولگن ایریم یشاوچیلر، مملکتده امنیت و برقرارلیک سقلنیشنی سورهیدیلر.
بدخشان ولایتی فیضآباد یشاوچیسی بولگن ضیاءالدین هاشمینینگ ایتیشیچه، افغانستان خلقی سونگی تورت دههده اوروش طفیلی کوپ ضرر کورگن و ایندی اولکه بویلب صلح و امنیت طرفداری دیر. اونگه کوره: «آدملر تورت دهه کوپینچه درد و عذابلرنی باشدن کیچیردی. اولر امنیت و برقرارلیک طرفداری دیر. اوروش، ویرانگرچیلیک ییتر؛ زورهوانلیک و اوروش گه یوق دیمیز.»
کابلدن بولگن مصور هم، ایندی یشاوچیلر همه نرسهدن کوره، امنیت، تینچلیک و اقتصادی وضعیت یخشیلنیش طرفداری ایکنینی ایتهدی. او شوندهی دییدی: «افغانستان خلقی کوپینچه اوروشنی باشدن کیچیردی بیز فقط امنیت ایستهیمیز، تینچلیک و ایش بولسین همده اقتصاد رواجلنسین.»
حربی ایش بیلرمان اسدالله ندیم شوندهی دییدی: «اسلام امیرلیگی مملکتده اینگ یوقاری سیاسی و قوراللی تشکیلات حسابلنهدی، سیاست شعار همده ییتکرمهلرنینگ گپلری بیلن بیلگیلنمهیدی. سیاستنی میداندهگی قدرت بیلگیلهیدی. هر کیمنینگ کوچی بولسه غلبه اوشندن.»
۲۸ اسد/۱۹ آگست، چهارشنبه کونی اسلام امیرلیگی ایچکی ایشلر وزیری خلیفه سراجالدین حقانی، افغانستان مستقللیگینینگ ۱۰۷-ییلیگی مناسبتی بیلن اوتکزیلگن تدبیرده، چیتایلده بولگن اسلام امیرلیگی مخالفلریدن اوزلری و افغانستان یشاوچیلرینینگ ضرریگه بولگن حرکتلردن واز کیچیشلرینی سورهدی.
اسلام امیرلیگی حربی کوچلری باش قوماندانی فصیحالدین فطرت هم، افغانستانده امنیتنی بوزیش گه اورینگن کیشیلر، مدافعه کوچلرنینگ قتیق جوابی بیلن روپهره بولیشلری حقیده آگاهلنتیردی.
