نماینده‌لر کینگشی اعضالری نینگ ایتیش‌لریچه، پروموت پروژه‌سیده کینگ شکلده فساد بار و قیته‌دن تیکشیریلیشی کیره‌ک.
بوگون “چهارشنبه” نماینده‌لر کینگشی اعضالریدن بیری خان‌آغا رضایی نینگ ایتیشیچه، اوشبو پروژه‌نی تیکشیریش اوچون تیزلیک بیلن بیر خاص کمیسیون ایجاد ایتیلیشی کیره‌ک و بو پروژه ده بولگن فساد نینگ فاش قیلینیشی لازم.
نماینده‌لر کینگشی اعضالریدن باشقه بیری محمد نیسیم مدبر نینگ پروموت پروژه‌سیگه اشاره قیلیب ایتیشیچه، فساد قضیه‌سی بولگن جایده جمهور رئیس و اطرافیده‌گی کیشی‌لر دخیل دیر.
بیراق، جمهورلیک ریاستی سوزلاوچیسی نینگ اورین باسری دواخان مینه‌پال نینگ بو ادعالرنی رد قیلیب سلام‌وطندارگه ایتیشیچه، پروموت پروژه‌سی افغانستان حکومتی‌گه تیگیشلی ایمس، بلکیم اوشبو پروژه آمریکا قوشمه ایالاتی تامانیدن تمویل قیلینه‌دی.
امریکا نینگ افغانستان قیته قوریش ایشلرینی تیکشیروچی خاص اداره‌سی یا-ده سیگار قویاش ۱۳۹۷- ییلده ترقه‌تگن گزارشیده، امریکا نینگ افغان عیال‌لرنی کوچلنتیریش بولیمیده‌گی یاردمی یا-ده پروموت برنامه‌سی ناکام بولگن.
امریکا نینگ افغانستان قیته قوریش ایشلرینی تیکشیروچی خاص اداره‌سی مسؤلی جان ساپکو نینگ ایتیشیچه، اوشبو برنامه باشلنگنیدن حاضرگچه ۸۹ میلیون دالر مصرف ایتیلگن، لیکن اوشبو مدت ده یالغیز ۵۵ عیال یخشی ایشلرگه استخدام ایتیلگن.
جناب ساپکو نیویارک تایمز بیلن صحبت اوتکزیب ایتیشیچه، اوشبو برنامه گه کوره، ۲۸۰ میلیون دالر بیلن ۷۵ مینگ عیال ایش آلیش و ایش اورگه‌نیش گه یاردم بیریشده قرار آلینگن ایدی، لیکن اوشبو پروژه آمریکا نینگ ایستک‌لرینی قولگه کیلتیره آلمه‌دی و انه شوباعث ناکام بولگن.