غزنی یشاوچیلریدن قطاری، اوشبو ولایت ده دولت ادارهلریدن قطاری اوچون بیللی و دایمی جای یوقلیگی طفیلی سرگردانلیکدن شکایت قیلگنلر.
غزنی یشاوچیلرینینگ ایتیشلریچه، دولت ادارهلریدن بیر قطاری خذمت کورسهتیش اوچون مستقل و بیللی اداری بناگه ایگه بولمهی و ینگی جایلرگه انتقال تاپیشی، مراجعت قیلووچیلرنی قیینچیلیک بیلن روپهره قیلهدی.
بو توغریده غزنی یشاوچیلریدن محمد اجملنینگ ایتیشیچه: «بیر قطار بنالرنی کوچهلر و پسکوچهلرده کرایهگه آلهدیلر. مراجعت قیلووچیلر ایشلری حلی اوچون بارگنلریده، او ییردن کوچگنینی کوریب و ینگی بناسینی تاپه آلمهی، کوپ سرگردان بولهدیلر.»
غزنی یشاوچیلریدن باشقه بیری گلابالدین هم خودی شوندهی خواطرنی بیان قیلیب و ایتیشیچه، دولت ادارهلری کوچیشی اداری ایشلری عملگه آشیریلیشیده کوپینچه صرف-خرهجتلریگه سبب بولگن. «بعضا مذکور ادارهلر بیر ییردن باشقه ییرگه کوچهدیلر. حویلی کرایه قیلهدیلر و بیر مدتدن کیین یعنی بیر ییل و یا-ده بیر ییریم ییلدن کیین، باشقه جایگه کیتهدیلر.»
غزنی یشاوچیلرینینگ ایتیشلریچه، اوشبو ادارهلر اوچون مستقل بنالر قوریلیشی، اهالینینگ اداری ایشلرینی بجریش جریانیده سرگردان بولیشلری آلدینی آلالهدی.
طبیعی حادثهلرگه قرشی کورهش ادارهسیگه مراجعت قیلگنلردن محمد رضانینگ ایتیشیچه: «اقتصادی نقطهی نظریدن هم آیده تولنیلهدیگن خرهجت، شخصی بناگه ایگه بولیشگه قرهگنده کوپ دیر. ایکینچی موضوع هم خذمتلرنینگ ستندرد بولیشی دیر؛ چونکه ستندرد شکلده قوریلمهگن جایده، خذمتلر کورسهتیلیشی هم قیینچیلیک بیلن روپهره بولهدی.»
شونینگدیک غزنی ده الکترونیکی کیملیک ترقهتیلهدیگن بولیمیگه بارگنلردن جاویدنینگ ایتیشیچه: «دولت ادارهلری اوچون بیللی و دایمی بیر جای نظرگه آلینیشی کیرهک که اهالی قیینچیلیک بیلن روپهره بولمهسین. باشقه بیرتاماندن، شخصی اویلر اوچون بیریلهدیگن کرایهلر توللنیشی آلدی آلینهدی.»
طبیعی حادثهلرگه قرشی کورهش، اقتصاد، کانلر و پترولیم، صناعت و سوداگرلیک، ترانسپورتنی تنظیملش ریاستلری همده یشش محیط، خاص تعلیمات ادارهسی و الکترونیکی کیملیک ترقهتیلهدیگن بولیملر، غزنی ولایتیده بناسیز و بیللی جایگه ایگه بولمهگن ادارهلردن حسابلنهدی.
شوندهی بیرحالده، غزنی حاکمی سوزلاوچیسی عزتالله سعیدینینگ ایتیشیچه، حاضر بناسیز ادارهلر اسلامی ثقافت مرکزیده جایلشتیریلیب و کیلهسی ییللرده اوشبو ولایتدهگی دولت ادارهلریدن برچهسی اوچون بلدیه آرقهلی بویوک دولتی مجموعه قوریلیشی ممکن.
اونینگ کوپهیتیریشیچه: «ادارهلردن قطاری بناسیزلیک سبب کرایی اویلرده فعالیت قیله ایدیلر و اوشبو کرایی اویلر شهر سطحیده بولیب و مراجعت قیلووچیلر اوچون قیینچیلیکلرنی یرهتگن ایدی. مذکور ادارهلر حاضر ثقافت مرکزیگه انتقال بیریلگن.»
یشش اویلر و ستندرد بولمهگن جایلرده دولت ادارهلرینینگ فعالیت قیلیشی، بیر تاماندن اهالینینگ سرگردان بولیشی و باشقه بیر تاماندن ایسه دولتی خذمتلر کورسهتیلیشینینگ قیینچیلیک بیلن روپهره قیلهدی؛ چونکه کرایی جایلرده فعالیت قیلهدیگن ادارهلردن قطاریده، کوتیش جایلر همده ترانسپورت واسطهلری اوچون مخصوص توختهش جایلری موجود ایمس دیر.
