کاپیسا ولایتیده ایریم یاشلر پارکلر و یشیل حدودلرده چیقیندیلر توپلنیب قالهیاتگنیدن شکایت قیلیب، چیقیندی قوتیلرنینگ آزلیگی همده ایریم یشاوچیلرنینگ تازهلیکنی سقلش گه اعتبارسیزلیگی سببلی اوشبو حدودلر افلاسلنهیاتگنینی ایتهدیلر.
۳۵ یاشلی ذکیه علیزاده، بعضاً فرزندلری بیلن پارکلر گه بارهدی. او پارکلرده چیقیندیلرنینگ توپلنیشی سبب دوچ کیلهیاتگن قیینیچیلیگی حقیده شوندهی دییدی: «سونگی بیر نیچه ییل دوامیده پارک گه بارهمن، اما تازهلیک رعایت قیلینمهیدی. بو مینگه سلبی تأثیر قیلهدی. پارک گه تازه هوادن بهرهمند بولیش اوچون بارگنیمیزده، چیقیندیلر توپلمی گه دوچ کیلهمیز، حتا کونگلیمیز اینیدی. باغده چیقیندیلر توپلنیب قالسه، اولر جوده خوفلی میکروبلر منبعسیگه ایلنهدی.»
۲۵ یاشلی سنبل نادری، انده-سنده پارکلر و یشیل حدودلر گه بارهدی، بو جایلرده تازهلیک رعایت قیلینمسلیگی و یشاوچیلرنینگ بو مکانلر گه بولگن مناسبتیدن شکایت قیلیب شوندهی دییدی: «بیر آیده ایکی مرته یشیل حدودلر گه بارهمن. تازهلیک اونچهلیک یخشی ایمس. آدملر چیقیندیلرنی هر تامانگه تشلهیدی. مسئوللر بیر نیچه بار آدملر گه مراجعت قیلیب، آگاهلنتیریشدی، لیکن آدملر عموماً قولاق سالمهیدی. پارکلرده چیقیندی قوتیلری عموماً یوق. چیقیندیلر برچه آدملر گه ضرر ییتکزهدی.»
هر هفته بیر مرته دمآلیش و چرچاقنی چیقریش مقصدیده پارک گه بارهدیگن مقدسه ایوبی، پارکلردهگی تازهلیک حقیده فکر-ملاحظهسینی شوندهی بیلدیرهدی: «بعضی پارکلرده تازهلیک یخشی، اما ایریملریده چیقیندیلر اوز وقتیده ییغیشتیریب آلینمهیدی و کوپراق اعتبار طلب ایتیلهدی. بیر نیچه بار پارکلرده چیقیندیلرنی کورگنمن. بو حالت پارکنینگ کورینیشینی خُنکلشتیرهدی و مینده خواطر همده ناقولیلیک حسینی اویغاتهدی.»
شونینگدیک، عیاللر پارکلریدن بیریده آزیق-آوقت دکانی بولگن هدیه رستمینینگ ایتیشیچه: «بو ییرگه تورلی خیل آدملر کیلهدی. بعضیلری تازهلیککه جوده یخشی رعایه قیلهدی، بیراق ایریملری عموماً تازهلیکنی بیلمهیدی. تشریف بویروچیلردن بوندهی جایلر گه کیرگنلریده احتیاطکار بولیشلرینی، ترتیب گه رعایه قیلیشلرینی همده اوزلری و پارکنینگ تازهلیگیگه اعتبار بیریشلرینی سورهیمیز.»
۲۶ یاشلی عبدالله یارمل شوندهی دییدی: «پارک گه بارگنیمده، پارکنینگ او-بو بورچکلریده و یشیل حدودلرده چیقیندیلر یاتگنینی کورسم، بو مینی جوده خفه قیلهدی. چونکی پارک دمآلیش و آسایشتهلیک اوچون مولجللنگن جای. پارک محیطی افلاس بولسه بو اینیقسه بالهلر اوچون جوده ضررلی. پارک محیطینی اسرهش و سقلش گه اعتبار بیریشنی هر بیر کیشی اوز مسئولیتی دیب بیلیشی کیرهک. بو فقط شهر حاکملیگی و مسئوللرنینگ وظیفهسی ایمس.»
۲۳ یاشلی شکیب، چرچاقنی چیقریش اوچون دوستلری بیلن پارک گه باریشینی ایتیب شوندهی دییدی: «بیز ایشلهیمیز، کیین ایسه دوستلریمیز و همکارلریمیز بیلن هیچ بولمهگنده پارکلر و دمآلیش مسکنلریگه باریب، تازه محیطدن بهرهمند بولیشگه احتیاج سیزهمیز. اما آسایشته و گوزهل محیطده چیقیندیلر، افلاسلیک و اخلتلر کورسک، اوزیمیزنی یخشی حس قیلمهیمیز و بوندن جوده رنجیمیز. اگر وطنپرورلیک حسیمیز بولسه، بیز هم اوشه چیقیندیلرنی اوز جایی گه تشلشیمیز ممکن. شونده باشقهلر هم بیزدن اورنک آلهدی.»
شونگه قرهمی، اطراف-محیط بوییچه بیلرمان سیدقیوم هاشمی، چیقیندیلرنی باشقریش و کمهیتیریشنی حکومت، اطراف-محیط همده اهالی آلدیدهگی اساسی معمالردن بیری دیب بیلهدی. او شوندهی دییدی: «چیقیندیلرنی باشقریش سونگی پیتلرده اینگ کتته معمالردن بیریگه ایلنگن. بیزده چیقیندیلرنی یخشی باشقریش تیزیمی یوق و بو کیلهجکده افغانستان اطراف-محیطی اوچون کتته معما گه ایلنهدی. بونگه ایکی عامل سبب بولماقده، بیرینچی تیگیشلی مدنیت ییترلیچه شکللنمهگن، ایکینچیسی ایسه چیقیندی قوتیلر ییترلی ایمس.»
اطراف-محیط بوییچه متخصصلرنینگ آگاهلنتیریشلری و اهالینینگ خواطرلریگه قرهمی، کاپیسا شهر حاکمیتی مسئوللری بو بارهده کیتمه-کیت قونغیراقلر بیلن جواب بیرمهدی.
شو بیلن بیرگه، پارکلرده چیقیندیلرنینگ توپلنیشی نهفقط اطراف-محیطنینگ افلاسلنیشی گه بلکی یاقیمسیز هید تاپیلیشیگه، تشریف بویروچیلرنینگ آسایشتهلیگی بوزیلیشیگه، حشراتلرنینگ کوپهیشیگه و کسللیکلر ترقهلیش خوفینینگ آشیشیگه سبب بولهدی. پارکلر و یشیل حدودلرنینگ سلامتلیک، تازهلیک و گوزهللیگینی سقلش اوچون تازهلیککه رعایه قیلیش همده چیقیندیلرنی اوز وقتیده ییغیب آلیش ضرور.
