سونگی ایکی ییل دوامیده غزنی شهری ایریم حدودلریده آز سانده عمومی دمآلیش پارکلر تشکیل ایتیلگن یاکی قیته قوریلگن بولسه-ده، بیراق اوشبو مدت و اوندن آلدینگی ییللر دوامیده بو شهرده بالهلر گه مخصوص هیچ قندهی دمآلیش پارک تشکیل قیلینمهگن و اهالیسی کوپ همده حدودی کینگ بولگن بو شهر بالهلر اوچون مخصوص دمآلیش پارک یوقلیگی معماسی بیلن دوچ.
غزنی یشاوچیلریدن احمدرشاد و بشیرنینگ ایتیشلریچه، بالهلر اوچون مخصوص دمآلیش پارک یوقلیگی، بو شهردهگی بالهلرنی ایریم قیینچیلیک بیلن دوچ قیلگن و اوشبو شهرده عمومی دمآلیش پارکلر جوده آز.
احمدرشاد شوندهی دییدی: «هم کتته کانلر همده بالهلر اوچون پارک جوده آز، البته بویوکلر اوچون ایکی-اوچته پارک بار بیراق بالهلرنینگ دم آلیش پارکلری یوق. اسلام امیرلیگی اینیقسه بلدیه ادارهسیدن بالهلر اوچون دمآلیش پارکلرنی تشکیل ایتیش بارهسیده دقت قیلیشینی سورهیمیز.»
شو بیلن بیرگه بشیر هم شوندهی دییدی: «آدملر جمعه کونلری یا کی بیکارلیک پیتلریده بالهلری بیلن بیرگهلیکده ثقافت سرکیده کیلهدیلر، پارک یوقلیگی سببلی. غزنی شهری ایچیده نیچته پارک بار، افسوس بیلن بو پارکلرده بالهلرنینگ اویینچاق واسطهلری یوق.»
غزنی شهری یشاوچیلریدن بولمیش مختار احمد، ایکی بالهسینی غزنی شهری عمومی دمآلیش جایلریدن بیریگه آلیب کیلگن، موجود دمآلیش پارکلر بالهلرنینگ اویینچاق واسطهلری و زمانهوی امکانیت بیلن تأمینلنمهگن و بو ولایتدهگی بالهلر اوشبو امکانیتدن محروم لیگینی قوشیمچه قیلهدی.
او سلاموطندار بیلن صحبتده شوندهی دییدی: «مزارشریف، کابل، هرات کبی باشقه ولایتلرده زمانهوی جهازلر بیلن تأمینلنگن پارکلر بار، افسوس بیلن غزنی دهگی بالهلر بو امکانیتدن محروم دیر.»
تعلیم و تربیه بوییچه بیلرمانلر، بالهلرنینگ دمآلیش و سیاحت قیلیشینی اولرنینگ فکری اوسیشی اوچون مهم دیب، زمانهوی جهازلر بیلن تأمینلنگن دمآلیش پارکلر بالهلر و اوقووچی اوسیملرنینگ میهسی اوسیشی، اجتماعی یاندهشووی یخشیلنیشی و تشویشلردن اوزاقده بولیشیگه آلیب کیلیشینی ایتهدیلر.
بیلیم یورت استادی و تعلیم همده تربیه بوییچه فعال الفت هاشمی شوندهی دییدی: «دمآلیش پارکلر بالهلرنینگ میهسی رواجلنیشی، اجتماعی و یاندهشووی و جسمانی اوسیشیگه مثبت تأثیری بار و اولرنینگ تیز اوسیشیگه یاردم بیرهدی. میهلری اوسهدی و اینگ مهمی بالهلرنینگ فکری ییغیلیب و استرسلرینی کمهیتیرهدی.»
غزنیدهگی بو معما گه دایر، غزنی شهری بلدیهسی سوزلاوچیسی عبدالولی جلالزی گه کوره، اوشبو ییل لایحهلریده ینگی دمآلیش جایلر تشکیل ایتیلیشی، دمآلیش جایلرده بالهلر قیزیقهدیگن اویین واسطهلری قوندیریلیشی نظرگه توتیلگن. اونینگ ایتیشیچه: «قویاش ۱۴۰۴ ییلده بیش پارک تشکیل ایتیلدی یا کی قیته قوریلدی و اوشبو ییلده هم بلدیه ادارهسی ینگی پارکلرنی تشکیل ایتیش گه قرار قیلگن و بو پارکلر بالهلرنینگ اویین واسطهلری بیلن تأمینلنیشی نظرگه توتیلگن.»
حاضرگی کونده غزنی شهری و ایریم حدودلریده ۱۰ کتته و کیچیک دمآلیش پارک موجود، اولرنینگ برچهسی عمومی دمآلیش جایلر بولگن و بالهلرنینگ دستلبکی اویین واسطهلری بیلن تأمینلنمهگن و اوشبو ولایتده خصوصی سکتور حاضرگچه بالهلر اوچون مخصوص دمآلیش پارک تشکیل ایتیش گه قیزیقیش کورستمهگن.
