بیرینچی مرته، هرات سوت محصولاتلری ساتووچیلری اویوشمهسی تامانیدن بو ولایت ایکینچیلیک، سووغاریش و چارواچیلیک ریاستی همکارلیگیده سوت استعمالینینگ اهمیتی و محلی محصولاتلرنی قوللب-قوتلش حقیده خبردارلیکنی آشیریش مقصدیده، خلقارا سوت کونی نشانلندی.
محلی مسئوللرنینگ ایتیشیچه، سوت محصولاتی صناعتی ایکینیچیلیکنینگ اقتصادی مهم بولیملریدن بیری حسابلنهدی و قوللب-قوتلنگن حالده ایش فرصتلری یرهتیلیشی و چارواچیلر درآمدی آشیشیگه آلیب کیلیشی ممکن.
هرات ایکینچیلیک و سووغاریش تولیدلر اتاقی باشلیغی بشیراحمد بهادری، ایچکی تولیدلر قوللب-قوتلنیشیگه تأکید ایتهدی. او شوندهی دییدی: «بوگون اوشبو تدبیرده کوپلب مسئوللر اشتراک ایتگنیدن خورسند من. برچهمیز محلی محصولاتلرنی اینیقسه سوت و سوت محصولاتلرینی قوللب-قوتلش گه مسئول میز. چونکی هراتده هر کونی ۱۰۰ تُن دن آرتیق سوت ایشلب چیقریلهدی.»
شو بیلن بیرگه، هرات سوت محصولاتی اویوشمهسی مسئوللری، سوت استعمالینینگ اهمیتی و ایچکی تولیدلردن فایدهلنیش بارهسیده یشاوچیلر خبردارلیگی آشیریلیشی اوچون بوندهی دستورلر اوتکزیلیشیگه تأکید ایتهدیلر.
هرات سوت محصولاتی اویوشمهسی باشلیغی عبدالرحیم عثمانی شوندهی دییدی: «خلقارا سوت کونینی هرات ولایتیده بیرینچی مرته نشانلهدیک. هراتده تخمیناً ۲۰۰ ته سوت محصولاتلری دکانی موجود. ولایتده هر کونی ۱۳۰-۱۴۰ تُن سوت ایشلب چیقریلهدی. شوندن ۷۰-۸۰ تُنی هراتدهگی محلی سوت کارخانهلریده قیته ایشلنیب قداقلنهدی.»
بو امکانیتلر گه قرهمی، چارواچیلیک و سوت محصولاتلری ساحهسیده فعاللرنینگ ایتیشیچه، مذکور صناعت حلی هم ایریم معمالر گه دوچ و ینهده رواجلنیشی اوچون قوللب-قوتلش همده سرمایه کیریتلیشیگه ضرورتی بار.
افغانستان غربیده هالند کمیتهسی مسئولی محمدحامد شمس شوندهی دییدی: «چارواچیلیک و چارواچیلیک محصولاتلرینی ییغیش ساحهسیده حکومت همده تشکیلاتلر تامانیدن معیین ایشلر عملگه آشیریلگن، بیراق بو ییترلی ایمس. افسوس کی، چارواچیلیک ساحهسیگه کمراق اعتبار قرهتیلماقده، حال بوکی بو یونهلیش کوپراق اعتبار، محنت و قوللب-قوتلشگه محتاج.»
شو بیلن بیرگه، سوت محصولات ایشلب چیقروچیلردن ایریملری حکومتدن، ایچکی تولیدلر قوللب-قوتلنیشی اوچون چیت ایلدن آلیب کیلینهیاتگن سوت محصولاتلریگه چیکلاو قوییشینی سورهیدیلر.
هراتده سوت محصولات ایشلب چیقروچی کمپنیهلردن بیرینینگ باشلیغی هدایتالله احمدی شوندهی دییدی: «بیزنینگ حکومتدن طلبیمیز شو کی، محلی محصولاتلرنی قوللب-قوتلش و مستحکملش اوچون چیتدن کیریب کیلهیاتگن محصولاتلر آقیمینی چیکلهسین.»
خلقارا سوت محصولاتی کونی، هر ییلی بیرینچی جون کونی دنیانینگ تورلی مملکتلریده نشانلنهدی. اوشبو کوننی بیلگیلشدن مقصد سوتنینگ آزوقهوی اهمیتی، اونینگ جمعیت سلامتلیگیدهگی اورنی همده سوت صناعتینینگ اقتصادی اوسیش و چاروادارلر تورموشیدهگی اهمیتی حقیده جماعتچیلیک خبردارلیگینی آشیریشدن عبارت.
