خلقارا آنه سوتی بیلن آزوقلنتیریش هفتهلیگی مناسبتی بیلن افغانستان اسلام امیرلیگی ساغلیقنی سقلش وزیرلیگی، خلقارا ساغلیقنی سقلش و بیرلشگن ملتلر تشکیلاتینینگ بالهلرنی قوللب-قوتلاوچی صندیغی (یونیسف) وکیللری اشتراکیده، کابلده آنه سوتی بیلن آزوقلنتیریش اهمیتی بارهسیده خبردارلیک ییغیلیش اوتکزدی.
اوشبو ییغیلیشده ساغلیقنی سقلش وزیرلیگی مسئوللری، آنه سوتی بیلن آزوقلنتیریش کسللیکلرنینگ آلدینی آلیش، ایمنی تیزیمنی مستحکملش همده چقهلاقلرنینگ ساغلام اوسیشیگه یاردم بیریشینی بیلدیردی.
ساغلیقنی سقلش وزیرلیگینینگ طبی خذمت کورسهتیش بوییچه معینی عبدالولی حقانی شوندهی دییدی: «آنه سوتی چقهلاق اوچون تولیق آوقت، طبی حمایه واسطهسی و ضرور آزوقه حسابلنهدی. حیاتنینگ دستلبکی آلتی آییده آنه سوتی باله اوچون تولیق و ییترلی آزیق بولیب، شو بیلن بیرگه آنهنینگ سلامتلیگینی سقلش و مستحکملشده هم مهم اورینگه ایگه.»
شو بیلن بیرگه، ساغلیقنی سقلش وزیرلیگینینگ طبیات عمومی باشلیغی حیدرخان حیدر گه کوره، آنه سوتی بیلن آزوقلنتیریش نهفقط چلاق سلامتلیگینی تأمینلهیدی، بلکی آنهلرده ایریم کسللیکلر گه چلینیش خوفینی کمهیتیریشده هم مهم اهمیت گه ایگه. او شوندهی دییدی: «آنه سوتی بیلن آزوقلنتیریش آنهلر اوچون هم کوپلب فایدهلر گه ایگه. او کوکرهک بیزی سرطانی خوفینی کمهیتیریشگه یاردم بیرهدی. مملکتده اوشبو کسللیککه چلینیش حالتلری سیزیلرلی درجهده آشگنی قید ایتیلگن. شونینگدیک، آنه سوتی بیلن آزوقلنتیریش تخمدان سرطانی خوفینی هم کمهیتیریشگه خذمت قیلهدی.»
باشقه تاماندن، بیرلشگن ملتلر تشکیلاتینینگ بالهلرنی قوللب-قوتلاوچی صندیغی (یونیسف) وکیلی امین امین، افغانستانده عایلهلر احوالینی تشویشلی دیب ایتیشیچه، مهاجرلر قیتیشی، اقلیم اوزگریشلری و تورلی خیل کسللیکلر کوپهیشی عایلهلر اوستیگه باسیملرنی آشیرگن. او شوندهی دییدی: «افغانستانده هر ایکی بالهدن بیری آغیر آزیق-آوقت خوفسیزلیگی قیینچیلیگیگه دوچ. بو حالت اولرنینگ جسمانی و عقلی رواجلنیشیگه سلبی تأثیر کورستگن. حساب-کتابلر گه کوره، جاری ییلده ۵ یاشگچه بولگن قریب ۳.۷ میلیون باله اوتکیر توییب آوقتلنمسلیک خوفی آستیده قالگن. اوشبو بالهلرنینگ ۸۰ فایزدن آرتیغی ایکی یاشدن کیچیک. بو دور بالهنینگ حیاتیدهگی اینگ مهم باسقیچلردن بیری بولیب، عینن شو پیتده آنه سوتی بیلن آزوقلنتیریش و اوز وقتیده توغری قوشیمچه آوقت بیریشنی باشلش بالهنینگ آمان قالیشی، ساغلام اوسیشی و رواجلنیشیده حل قیلوچی اهمیت گه ایگه.»
مذکور ییغیلیشده، اسلام امیرلیگی ساغلیقنی سقلش وزیرلیگی سوزلاوچیسی هم، بیانیه اعلان قیلدی. اونده آنه سوتی بیلن آزوقلنتیریشنینگ اهمیتی ینه بیر بار تأکیدلنیب، حاملهدار عیاللر و ایمیزکلی آنهلرنینگ توغری همده توییملی آوقتلنیشی ضرورلیگی هم علیحده قید ایتیلگن.
ساغلیقنی سقلش وزیرلیگی سوزلاوچیسی شرافت زمانامرخل شوندهی دییدی: آنه سوتی بالهنینگ ایمن تیزیمینی مستحکملهیدی و اونی تورلی کسللیکلردن حمایه قیلهدی. باله آوقتلنیشی بیلن بیر قطارده، آنهنینگ توغری آوقتلنیشی هم علیحده اهمیت گه ایگه. شو سببلی برچه حاملهدار و ایمیزکلی آنهلر ارگانیزم احتیاجلرینی قاندیریش همده چقهلاقلری اوچون صفتلی و توییملی آنه سوتینی تأمینلش مقصدیده تورلی خیل و موازنتلی آزیق-آوقت محصولاتلرینی استعمال قیلیشلری لازم.»
خلقارا آنه سوتی بیلن آزوقلنتیریش هفتهلیگی، هر ییلی بیرینچی آگستدن ییتینچی آگستگچه دنیانینگ ۱۲۰ دن آرتیق مملکتیده نشانلنهدی. اوشبو هفته آنه سوتی بیلن آزوقلنتیریشنینگ اهمیتی حقیده جماعتچیلیک خبردارلیگینی آشیریش، ایمیزکلی آنهلرنی قوللب-قوتلش همده آنهلر و بالهلر سلامتلیگینی یخشیلش مقصدیده اوتکزیلهدی.
