بیرلشگن ملتلر تشکیلاتینینگ جمعیت صندیغی، خلقارا قابله کونی مناسبتی بیلن اعلام قیلیشیچه، افغانستان ده آنهلر و چقهلاقلر حیاتینی قوتقریش اوچون بیر میلیون قابلهنینگ تعلیم کوریشیگه نیاز بار.
بیرلشگن ملتلر تشکیلاتی جمعیت صندیغینینگ بوگون (۱۵-ثور/ ۵-می، سهشنبه)، اکس صحیفهسیده یازیشیچه، آنهلر و چقهلاقلر حیاتینی قوتقریش اوچون اینگ فایدهلی یول، قابلهلر ییتیشتیریلشی همده تعلیمی توغریسیده سرمایه یاتقیزیلیش دیر.
مذکور نهادگه کوره، قابلهلر عیاللرنینگ حاملهدارلیک دورهسیدهگی مراقبتلر، یخشی توغروق و توغروقدن کیینگی قوللب-قوتلاوچی خذمتلردن فایدهلنیش امکانیتلرینی کینگهیتیریشده مهم رول اوینهیدی.
بوندن آلدین بیرلشگن ملتلر تشکیلاتینینگ جمعیت صندیغی، افغانستان عیاللرنینگ ساغلیقنی سقلش احتیاجلریگه جواب بیریش اوچون قریب ۱۸ مینگ قابلهگه نیازی بارلیگینی معلوم قیلگن ایدی.
خلقارا تشکیلاتلر، نیچه مرته افغانستان ده آنهلر و چقهلاقلر اولیمی میزانی یوقاریلیگیدن خواطر بیلدیرگنلر. شونینگدیک افغانستان دنیا ده آنهلر اولیمی میزانی یوقاری بولگن مملکتلردن بیری حسابلنهدی.
خلقارا قابله کونی، هر ییلی ۵-می دنیا ساغلیقنی سقلش تیزیمیده قابلهلرنینگ مهم اورنی کورسهتیلیشی مقصد، نشانلنهدی. بو کون قابلهلیک خذمتلرینینگ آنهلر و چقهلاقلر اولیمینی کمهیتیریش، حاملهدارلیک دورهسیدهگی مراقبتلر، یخشی توغروق همده توغروقدن کیینگی قوللب-قوتلش خذمتلری کورسهتیلیشیدهگی اهمیتیگه تاکید قیلهدی.
