معلومات و مدنیت وزیرلیگی سرپرستی خلق‌ارا آنه تیل کونی مناسبتی بیلن اوتکزیلگن ییغیلیش ده، بو وزیرلیک افغانستان نینگ بومی تیل‌لرینی رواجلنتیریش اوچون سعی‌وحرکت قیلیشیدن ایشانچ بیردی.
معلومات و مدنیت وزیرلیگی سرپرستی خیرالله خیرخواه گه کوره، اوشبو وزیرلیک افغانستان نینگ بومی تیل‌لرینی رواجلنتیریش اوچون بیر کمیسیون ایجاد ایتگن. اونینگ ایتیشیچه: «افغانستان ده برچه ایلت‌لر نینگ فرهنگینی سقلش و برچه تیل‌لر رواجی اوچون ایشلش درکار. تیل‌لر رواجی و سقلنیشی اوچون شورا و ییغیلیش‌لر اوتکزدیک.»
معلومات و مدنیت وزیرلیگی نینگ خلق کلتوری ریاست باشلیغی سیف‌الرحمان محمدی گه کوره: «معلومات و مدنیت وزیرلیگی افغانستان برچه تیل‌لرینی رواجلنتیریش اوچون مستقل بیر کمیسیون شکللنتیریش گه قرار قیلدی و بو کمیسیون ایجاد بولگن.»
بیزلرنینگ فیسبوک صحیفه‌میزگه باش اورینگ!
بیرلشگن ملتلر تشکیلاتی نینگ تعلیم، بیلیم و مدنیت تشکیلاتی، دنیا بویلب آنه تیل‌لر گه حرمت قیلینیشی، تیل و فرهنگ رواجلنیشی مقصدیده، میلادی ۱۹۹۹ ییل ده ۲۱-فبرورینی خلق‌ارا آنه تیل کونی اوله‌راق نامله‌گن. مملکت نینگ قطار ولایت‌لریده بومی تیل‌لر متکلم‌لریدن بعضی‌لری آنه تیل‌لری گه گپیریش ساحه‌سی تاره‌یب باره‌یاتگنی و اوز تیل‌لری گه درس اوقیش زمینه‌سی یوق‌لیگی و بو تیل‌لر یوق بولیش خوفی بیلن دوچ بولگنیدن خواطر بیلدیرگن بیرحالده، افغانستان ده خلق‌ارا آنه تیل کونیدن نشانلنماقده.
آنه تیلی پشه‌ای بولگن عبدالله کلشانی گه کوره، مکتب‌لرده آنه تیل‌لریده درس‌لیک یوق‌لیگی اوچون باشقه تیل گه درس اوقیش گه مجبور دیر. اونینگ ایتیشیچه: «حکومت پشه‌ای تیل ده درس‌لیک تیارله‌گن؛ لیکن ایریم قیینچیلیک‌لر باعث بو درس‌لیک‌لر مکتب گه ییتیب بارمه‌گن.»
اشکاشمی تیل ده سوزله‌یدیگن سمندر سمندری گه کوره: «افسوس بیلن اشکاشمی تیل یوق بولیش عرفه‌سیده قرار تاپگن. معلومات و مدنیت وزیری دن بوتوغریده دقت قیلیب و بو تیل یوق بولیب کیتیش گه ایزین بیرمسلیگینی ایسته‌یمیز.»
بیزلرنینگ «ایکس» ترماغی ده هم تعقیب قیلینگ!
اوشبو تیل‌لر متکلم‌لری، معلومات و مدنیت وزیرلیگی دن افغانستان ده بومی تیل‌لر رواجی اوچون دقت قیلیب و اولرنی یوق بولیب کیتیش گه ایزین بیرمسلیگینی سوره‌یدیلر.
شغنانی تیل متکلمی اسحاق مقبل نینگ ایتیشیچه: «معلومات و مدنیت وزیرلیگی دن یوق بولیش خوفی بیلن دوچ بولگن تیل‌لر جمله دن شغنانی، نورستانی، اشکاشمی و پامیری تیل‌لر گه دقت قیلیشینی ایسته‌ی من.»
عین‌حالده تیل‌شناس‌لردن بیرقطاری نینگ ایتیشلریچه، افغانستان بومی تیل‌لری نینگ رواجی و سقلنیشی اوچون معارف و عالی اوقوو وزیرلیک‌لری عملی ریجه‌لرنی قولگه آلیش‌لری کیره‌ک.
کابل بیلیم یورتی ده تیل استادی عطامحمد پویا گه کوره: «افغانستان ده ۳۵ دن آرتیق تیل ثبت بولگن افسوس بیلن بیر قنچه تیل‌لر و لجه‌لرنی ایسدن چیقرگن‌میز. بیلیم‌لر اکادمیه‌سی و بیلیم یورت‌لر بوتوغریده دقت قیلیشی درکار.»
افغانستان بیلیم‌لر اکادمیه‌سی نینگ معلوماتی اساسیده، افغانستان ده قریب ۳۰ بومی تیل بار و تورلی ولایت یشاوچیلری بو تیل‌لر گه گپیره‌دیلر.
