مملکت یشاوچی‌لریدن بیرقطاری نینگ ایتیش‌لریچه، افغانستانده اسلامی امارت حاکم بولگنی و مرکزی بانک پولی ذخیره‌لری نینگ باغلنگنیدن سونگ، اون شامل دستلبکی ماده‌لر بهاسی نیچه برابر یوقاری کیتگن و اهالی‌گه ساتیب آلیش کوچی یوق دیر. مملکت جنوب‌شرق حوزه‌سی یشاوچیلری نینگ سلام‌وطندارگه ایتیش‌لریچه، سابق‌لرده بیر بوجی اون نینگ بهاسی ۱۶۰۰ افغانی ایدی، لیکن حاضرده ۲۴۰۰ افغانی‌گه کوپه‌یگن.
بیزلرنینگ فیسبوک صحیفه‌میزگه باش اورینگ!
پکتیا یشاوچی‌لریدن بیری علی‌شاه نینگ ایتیشیچه، « اون نینگ بهاسی یوقاری کیتگن و حاضرگه‌قدر ۲۴۰۰ افغانی‌گه ییتیشگن، کم بغل اهالی ساتیب آلیشگه قادر بولمه‌یدی. اهالی جدی قیین‌چیلیکلر بیلن روپه‌ره بولگن.»
شونینگدیک، شمالی ولایت‌لر یشاوچیلری نینگ ایتیش‌لریچه، مذکور ولایت‌لر بازارلریده ییگولیک ماده بهاسی ثابت ایمس و بیر کیچه و کوندوز ده هر بیر قلم ماده نینگ بهاسی ۲۰۰ افغانی گچه یوقاری کیته‌دی.
بلخ یشاوچی‌لریدن بولمیش تیمور نینگ ایتیشیچه، « بهالر یوقاری کیتگن. برنج، یاغ و اون نینگ بهاسی یوقاری دیر. کیچه گچه ایشله‌یمیز و نتیجه ده نان پولی‌نی قولگه کیلتیره آلمه‌یمیز. دولتدن ییگولیک ماده بهاسینی کمه‌یتیریشینی ایسته‌یمیز.»
عین‌حالده، ننگرهار ولایتی یشاوچیلری نینگ ایتیش‌لریچه، بازارلر اسلامی امارت تامانیدن کنترل قیلینمه‌یدی و انه‌شوو سبب، سوداگرلر و ساتیووچی‌لر دستلبکی ماده‌لر بهاسینی یوقاری ایلتگن.
مملکت غربی ده جایلشگن نیمروز ولایتی یشاوچی‌لریدن بیری صدیقه نینگ جاری وضعیت‌دن خواطر بیلدیریب ایتیشیچه، وضعیت بونده‌ی دوام قیلگن صورتده، اهالی نینگ حیاتده قالیش اوچون هر قنده‌ی ایش‌گه قول اوریشی ممکن.
کابل شهریده ارتزاقی ماده‌لر بیرلشمه‌سی باشلیغی کمال فرید صافی، اون شامل ییگولیک ماده‌لر بهاسی یوقاری کیتگنینی تصدیق‌لب ایتیشیچه، دالرگه نسبتن افغانی پول نینگ بهاسی کمه‌یگنی‌نی اون بهاسی نینگ یوقاری کیتیشی‌گه سبب بولگن.
بیزلرنینگ فیسبوک صحیفه‌میزگه باش اورینگ!
ییگولیک ماده‌لر بهاسی یوقاری کیتگنی چیککه‌سیده یانغولیک ماده‌لر بهاسی هم یوقاری کیتگن، لیکن اسلامی امارت حاضرگه‌قدر بازارنی کنترل قیلیش خصوصیده سعی و حرکت قیلمه‌گن.
