فاریاب، غزنی و بادغیس ولایتلردن قولگه کیلگن معلوماتلرگه کوره، اوشبو ولایتلرنینگ ۶ تومنی شدتلی آتیشمهلردن سونگ، طالبان قولیگه سقوط قیلگن. فاریاب ولایتی نینگ قیصار و دولتآباد تومنی، غزنی ولایتی نینگ آببند و جغتو تومنی و بادغیس ولایتی نینگ جوند تومنی طالبان نظارتیگه اوتگن تومنلر جملهسیدن دیر.
فاریاب ولایتیدن امنیتی بیر منبع نینگ کیملیگی سیرقالیشنی ایستهب سلاموطندارگه ایتیشیچه، اوشبو ولایت نینگ قیصار تومنیدن سونگ، دولتآباد تومنی هم طالبان قولیگه سقوط قیلگن.
منبع نینگ ایتیشیچه، امنیتی کوچلر هاموی تانکلر و حربی تجهیزاتلر بیلن اندخوی تومنیگه بارگنلر.
فاریاب ولایتی کینگش عضوی عبدالاحد ایلبیک نینگ سلاموطندارگه ایتیشیچه، اوشبو ولایت نینگ دولتآباد تومنی ۳ ییل قمراودن سونگ، بوگون “سهشنبه” ایرتهدن چاغیده طالبان قولیگه سقوط قیلگن و آتیشمه عاقبتیده، امنیتی کوچلردن ۲ تهسی هلاک و باشقه ۱۵ تهسی طالبان قولیگه اسیر بولگن.
شونینگدیک، غزنی ولایتی کینگش اعضالری نینگ ایتیشلریچه، امنیتی کوچلر اوشبو ولایت نینگ آب بند و جغتو تومنلرینی ترک قیلگنلر.
غزنی ولایتی کینگش عضوی غلامسخی زابلی نینگ ایتیشیچه، امنیتی کوچلر نیچه ساعت آتیشمهدن سونگ، آببند و جغتو تومنلرینی ترک قیلیب بوتون حربی تجهیزاتلری بیلن ناور تومنیده جایلشگنلر.
بیراق، غزنی حاکمی سوزلاوچیسی وحیدالله جمعهزاده نینگ ایتیشیچه، طالبان نینگ هجوملری امنیتی کوچلر تامانیدن کیینگه اوریلگن جغتو و آببند تومنلری امنیتی کوچلر نظارتیگه دیر.
جناب جمعهزاده گه کوره، امنیتی کوچلر آنتن گه تانیلگن بیر پوستهنی ترک قیلگنلر.
عینحالده، بادغیس ولایتی نینگ جوند تومنی رسمیلری نینگ ایتیشلریچه، اوشبو ولایت نینگ جوند تومنی طالبان قولیگه سقوط قیلگن.
جوند تومنی ولسوالی عبدالکبیر منیب نینگ ایتیشیچه، امنیتی کوچلر اوشبو تومن مرکزینی ترک قیلگنیدن سونگ، طالبان جنگریلری تومن بناسی، پولیس قومندانلیگی و تومن بازاریده کیرگنلر.
بادغیس ولایتی کینگش عضوی محمدفرید اخیزی نینگ ایتیشیچه، امنیتی کوچلر هیچقندهی آتیشمه یوز بیرمسدن جوند تومنینی ترک قیلگنلر.
عینحالده، غور محلی مسووللری نینگ ایتیشلریچه، اوتگن ۲۴ ساعتده طالبان گروهیگه کوپینچه تلفات ییتیشگن.
غور حاکمی عبدالظاهر فیضزاده نینگ ایتیشیچه، اوشبو ولایتده طالبان تامانیدن ناملنگن حاکم اورین باسری نینگ ایناغهسی شامل ۲۳ طالب هلاک و باشقه ۱۴ طالب یرهلنگن.
جناب فیضزاده نینگ کوپهیتیریشیچه، طالبان هجومی باعث، اوشبو ولایت نینگ لعلوسرجنگل تومنیده ۵ تینچ اهالی هلاک ایتیلگن.
اوشبو واقعهلر چیککهسیده سرپل، بلخ و جوزجان ولایتلری هم امنیتی واقعهلرگه گواه بولگن، بیراق مخابراتی شبکهلرنینگ فعالیتلری توخته تیلگنی سبب، بیللی معلومات قولگه یوق.
عینحالده، ملی مصالحه کینگشی اورین باسری عنایتالله فرهمند نینگ توییتر صحیفهسیده یازیشیچه، اوتگن ایکی کون جریانیده هوایی یاردم بیریلمهگنی سبب، فاریاب ولایتی نینگ قیصار و دولتآباد تومنی بوتون حربی تجهیزاتلری بیلن سقوط قیلگن.
بوتوغریده مدافعه وزیرلیگی فکرینی آلیش اوچون سعی و حرکت قیلدیک، بیراق موفق بولمهدیک، لیکن طالبان گروهی کتبی پیاملر یوباریش بیلن بیرقطار تومنلرنی اوز کنترللریگه آلگنلریدن خبر بیرگن.
شونینگدیک، انسان حقوقی ایرکین کمیسیونی، بیر اعلامیه آرقهلی، پکیتا نینگ زرمت تومنینی یمان وضعیتی، فاریاب ده آتیشمهلر شدتلنگنی و غور ده مخابراتی ترماقلر فعالیتلری توختهتیلگنیدن خواطر بیلدیرگن.
انسان حقوقی ایرکین کمیسیونی، اوروش تامانلریدن انسان حقلری خلق ارا قانونلرینی رعایت قیلیشلرینی سورهگن.