اسلامی امارت تشقی ایشلر وزیرلیگی نینگ سیاسی اورینباسری شیرمحمد عباس استانکزی نینگ ایتیشیچه، آمریکا افغانستان نینگ ایچکی ایشلری گه مداخه قیلمهیشی کیرهک. او، بوگون کابل غربیده مردمی بیر ییغینده اورغولگن که، حاضر افغانستان رهبرلری اوز سیاستی نی آلغه آلیب کیتهدی و باشقهلر تامانیدن هیچ قندهی ایستهک قبول قیلینمهیدی. اونینگ ایتیشیچه، اسلامی امارت نینگ منفعتلری گه قرشی اقدام قیلگنلر، دشمن حسابلنهدی.
تشقی ایشلر وزیرلیگی سیاسی اورینباسری نینگ ایتیشیچه، افغانستان ۴ آیدن بویان استقلالی نی قولگه کیلتیرگن و ۲۰ ییلدن کیین باشقه مملکت نینگ دخالتی بولمسدن اوزی نینگ قرار آلیش گه کوچی ییتهدی. او افغانستان نینگ پیروزلیگی و آمریکا نینگ مغلوب بولگنی نی ۲۱- قرن نینگ معجزهسی دیب و ایتیشیچه، اسلامی امارت نینگ آمریکا و ناتو برابریدهگی اوروشی تاریخی بیر یوتوق و دنیا اوروشی ایکن که افغانلر کم امکانیت بیلن غالب چیققن.
بیزلرنینگ فیسبوک صحیفهمیزگه باش اورینگ!
جناب استانکزی مملکت نینگ ایچیده بیرلیک و دنیا جماعهسی بیلن تعامل قیلیش نی، اسلامی امارت برابریدهگی ایکی قیینچلیک دیب و ایتیشیچه، مملکت نینگ اقتصادی قیینچیلیکلری نی حل قیلیش اوچون، اسلامی امارت دنیا جماعهسی بیلن یخشی رابطه قوریش نی ایستهیدی. او قوشنی مملکتلردن افغانستان یشاوچیلری یوزیگه چیگرهلری نی آچیب و ویزه صادر قیلیش پروسهسیده اولر گه سهولت فراهم قیلیش نی سورهگن.
شونینگدیک جناب استانکزی عیاللر حقلری خصوصیده تاکید قیلگن که افغان عیاللرنینگ حقلری کامل دیر؛ بیراق افغانستان مدنیتی و شریعتیده عیال حقلری نینگ قندهیلیگی غرب جماعهسی بیلن فرقلی دیر. اونینگ کوپهیتیریشیچه، قطار ولایتلرده تخنیکی قیینچیلیکلر باعث مکتبلر باغلیق قالگن و بو قیینچیلیک نی رفع قیلیش اوچون سعی و حرکتلرنینگ دوامی بار.
اسلامی امارت نینگ قدرت گه ایریشگنیدن ۴ آی اوتماقده، بیراق حاضرگچه هیچ بیر مملکت اولرنینگ رسمیت گه تانیمهگن بیرحالده، بوندهی بیانات مطرح قیلینگن. اسلامی امارت دنیا جماعهچیلیگی تامانیدن رسمیت گه تانیلیشی اوچون، همهشمول دولت تشکیل ایتیلیشی، انسان حقلری تأمینلنیشی و عیاللر و قیزلرنینگ حقوقی نظرگه آلینیشی شرط قوییلگن.