پنجشیر دن تشقری بوتون افغانستان طالبان نظارتی گه اوتگنیدن کمیده ۱۰ کون اوتماقده. طالبان و اولرگه قرشی پنجشیر ده تشکیل ایتیلگن مقاومت جبههسی تینچ بیر ییچیم یول تاپیش اوستیگه اورغولب ایتیشلریچه، ایکی تامان هیأتلری آرهسیده سوزلشوولرنینگ حاضرهم دوامی بار.
پنجشیر ده احمد مسعود رهبرلیگیده طالبان گه قرشی مقاومت جبهه اعضالری نینگ ایتیشلریچه، گرچند مذکور سوزلشوولر حاضرگچه ایجابی نتیجه بیرمهگن، بیراق تینچ بیر ییچیم یول تاپیش اوچون اونینگ دوام تاپیش اولویت گه قرار تاپگن.
طالبان گه قرشی مقاومت جبهه قومندانی احمد مسعود نینگ یقیینلریدن بیری عبدالقادر فقیرزاده نینگ ایتیشیچه، طالبان بو ولایت نی نظارت گه آلیش اوچون زوروانلیک و زوردن قوللنگن صورتده، جدی مقاومت گه روپهرو بولیشلری ممکن.
بیزلرنینگ فیسبوک صحیفهمیزگه باش اورینگ!
عین حالده، طالبان گروهی سوزلاوچیسی ذبیحالله مجاهد توییتر صحیفهسیده یازیشیچه، مذکور گروه جنگریلری پنجشیر ولایت یقیینلیگیده جایلهشیب و بو ولایت نی قمروگه آلگنلر.
بیراق اونینگ اورغولشیچه، شونینگدیک قیینچیلیکلر تینچ بیر یول آرقهلی حل ایتیلیشی اوچون سعی و حرکتلرنی دوامی بار. ایتیش کیرهک که پنجشیر طالبان قولیگه سقوط قیلمهگن افغانستان نینگ یالغیز ولایتی دیر.
احمد مسعود و مملکت سابق جمهوررئیسی نینگ بیرینچی اورینباسری امرالله صالح، کابل شامل بوتون ولایتلر طالبان نظارتی گه اوتگنیدن کیین، پنجشیر ده طالبان گه قرشی مقاومت نی اعلام قیلدی.