هرات شهری نینگ ۱۳- ناحیه‌سیگه تیگیشلی جبریل شهرچه‌سیده امنیتی کوچلر و ناقانونی قوراللی قومندان حبیب‌الله غوریانی نینگ آدم‌لری آره‌سیده ۸ ساعت‌لیک آتیشمه‌دن کیین، امنیتی کوچلر اوتگن کیچه ساعت ۱۱ اطرافیده بو قومندان نینگ اویی گه کیریش گه موفق بولگن.
ایشانچلی محلی منبعلر آتلری فاش ایتیلیشی نی ایستمه‌ی سلام‌وطندارگه ایتیش‌لریچه، حبیب‌الله غوریانی قاچیش گه موفق بولگن و ۱۲ جنگریسی نیچه آغیر و ینگیل قورال بیلن قولگه آلینگن. اوشبو منبعلرگه کوره، بو آتیشمه‌ده حبیب‌الله غوریانی نینگ آدم‌لریدن ۲ ته‌سی هلاک و باشقه ۳ ته‌سی ایسه یره‌لنگن.
هرات حاکمی سید عبدالوحید قتالی، حبیب‌الله غوریانی نینگ آدم‌لریدن قطاری نینگ اوشلب آلینگنی تصدیقلب ایتیشیچه، غوریانی نینگ هم قولگه آلیش اوچون سعی و حرکت‌لرنی دوامی بار. هرات حاکمی گه کوره، هرات یشاوچیلری نینگ قتل، آدم اوغیرلاوچیلیک، زوروانلیک و اهالی نینگ آزارلنتیریش توغریسیده‌گی اونلرچه شکایتی دن کیین امنیتی کوچلر مذکور قومندان نی قولگه آلیش اوچون عملیات یولگه قویگن.
ایشانچلی محلی منبعلرنینگ ایتیش‌لریچه، حبیب‌الله غوریانی ایکی ییل آلدین ساخته‌کارلیک جرمی بیلن محکمه آرقه‌لی بیر ییل و بیر آی حبس گه محکوم بولگن ایکن، بیراق امنیتی کوچلر اونینگ قولگه آلیش اوچون حاضرگچه موفق بولمه‌گن.
شونینگدیک هرات پولیس قومندانلیگی هم بیر خبرنامه ترقه‌تیب ایتیشیچه، حبیب‌الله غوریانی نیچه پیتدن بویان ۳۰ ته ناقانونی قوراللی کیشی و آغیر و ینگیل قورال دن فایدهلنیش بیلن مخدره ماده نی قاچاق و ساتیش، زوروانلیک و شونینگدیک اهالی نینگ آزارلنتیریب کیلماقده ایکن کیم نهایتده امنیتی کوچلر بیلن هم آتیشگن.
شونده‌ی بیرحالده، هرات ساغلیک ریاست سوزلاوچیسی محمد رفیق شیرزی نینگ سلام‌وطندارگه ایتیشیچه، جبریل شهرچه‌سیده یره‌لنگنلرنینگ سانی ۳۹ کیشی گه ییتیشگن کیم اولردن ۳ ته‌سی نینگ ساغلیک وضعیتی خواطرلی دیر.
هرات ساغلیک ریاست سوزلاوچیسی گه کوره، یره‌دارلرگه ۵ حربی، ۳ باله و بیر عیال هم شامل بوله‌دی.
محل یشاوچیلری نینگ ایتیش‌لریچه، اولرنینگ اوزلری و یشش اوی‌لریده مالی و جانی ضرر ییتیشگن.
