سلاموطندارنینگ مملکت ۸ ولایتیدن اوقیشنی دوام ایتتیریش اوچون کابل گه کیلگن ۲۰ طلبه بیلن صحبت نتیجهسی شونی کورستهدی کی، بو یاشلر حیات مصرفینی تأمینلش اوچون اقتصادی قیینچیلیکلر بیلن روپهره بولگنلر.
اوشبو گزارشده صحبت قیلگن یاشلردن ۷ نفری خصوصی بیلیم یورتلر و مهمانخانه (اتاق)لرده یشهیدی. ۱۳ نفری دولت بیلیم یورتلری و یاتاقخانهلریده یشهیدی ایتیشلریچه، احتیاجلرینی تأمینلش اوچون اقتصادی قیینچیلیکلر بیلن روپهره بولگنلر. اوشبو طلبهلر، برق، سوو ییتیشمسلیگی و کتاب اوقیش اوچون مناسب جای یوقلیگینی اساسی قیینچیلیکلردن دیگنلر. اولر، ژورنالیست، طب معالجوی، کمپیوتر ساینیس، فارمسی و انجنیرلیک فاکولتهلریده اوقیدیلر.
بدخشانلیک محمدنسیم نوری، طب معالجوی فاکولتهسیده اوقیدی ایتیشیچه، یاتاقخانه مصرفی کوپ دیر. او شوندهی دییدی: «هر آی قریب ۷ مینگ افغانی مصرف بولهدی؛ برقیمیزنی رهایشیدن تجارتی قیلدیلر؛ اتاق ایزلب کوردیک تاپمهدیک و اوی ایگهسی اجاره نرخینی آشیردی بیراق قیته شو ییرده قالیشگه مجبور بولدیک.»
فاریابلیک ۱۹ یاشلی فرزام شوندهی دییدی: «مصرف جودهیم کوپ؛ اتاقده سانلریمیز کوپ بولیشیگه قرهمی؛ اونینگ مصرفینی تولدیریش قیین؛ بیر تاماندن اجاره حقی، بیر تاماندن برق پولی و اوز مصرفیمیز.»
لوگرلیک و معالجوی طلب طلبهسی ۲۳ یاشلی احمد، یاتاقخانهده یشش اونی تورلی قیینچیلیک بیلن دوچ قیلگنینی بیلدیرهدی. اونگه کوره: «یاتاقخانهده کیلگن پیتیم بیر اتاقده ۱۰ کیشی ایدیک، شخصی نرسهمیز رعایت قیلینمهیدی، شخصی نرسهلریمیز شریک ایدی. طبی نقطهی نظردن هم بعضی قیینچیلیکلر بار ایدی.»
جوزجانلیک و ژورنالیزم طلبهسی ۲۴ یاشلی سیدبصیر سادات شوندهی دییدی: «ایکی ییل کابل بیلیم یورتی مرکزی یاتاقخانهسیده ایدیم، بیر اتاقده ۸ – ۹ کیشی ایدیک. طبی قاعده، آزیق-آوقت و شخصی نرسه اصلا رعایت قیلینمسدی و کوپینچه قیینچیلیک بیلن دوچ ایدیک.»
غور یشاوچیسی ۲۲ یاشلی مختار، اوقیشنی دوام ایتتیریش اوچون کابل گه کیلگن ایتیشیچه: «مینی بو اوزاقلیکنی تنلش گه مجبور قیلگن نرسه – مینینگ انگیزهم. مینی امیدلی قیلگن و شو ییرده اوقیشگه اوندهگن سبب ایسه سیوملی یونهلیشیم و آرزو قیلگن بیلیم یورت دیر؛ مین عینن شو ییرده تعلیم آلیشنی ایستهی من.»
تخار یشاوچیسی و طب معالجوی فاکولته طلبهسی ۲۳ یاشلی پرویز قادری، هیچ کیم تلاش قیلمسدن موفق بولمهیدی، او شو اعتقاد بیلن اوقیشنی دوام ایتتیریش گه سعی-حرکت قیلهیاتگنینی بیلدیرهدی. او شوندهی دییدی: «هیچ کیم تلاش قیلمسدن و قیینچیلیکنی اوتکزمسدن موفق بوله آلمهیدی؛ بو مینگه انگیزه بیرهدی – کوپراق تلاش قیلسم، اوقیسم و هدفیمگه ایریشسم.»
برچهسی بیلن، کابلده ییتی کیشیلیک یاتاقخانه مسئولی قدرتالله صدیقنینگ ایتیشیچه، یاشلر ولایتلردن کانکور سیناوی و اوقیشنی دوام ایتتیریش اوچون بو ییرگه کیلهدیلر. او شوندهی دییدی: «یاتاقخانهلرده ۴۵۰ و ۵۰۰ یاش یشهیدی و اولرنینگ اکثریتی جوزجان، فاریاب، بلخ، هلمند، فراه، بدخشان، هرات، غور و بامیان ولایتلریدن؛ طلبهلر شخصی اتاق (خانه)لر گه نسبتن یاتاقخانهلرده کوپراق.»
تعلیم و تربیه بوییچه بیلرمان محبالله موحد گه کوره: «یاشلر اوقیشنی دوام ایتتیریش و یخشی امکانیت اوچون کابل گه کوپراق کیلهدیلر؛ بیراق بو امکانیتلر یانیده عایلهدن اوزاقلش، اقتصادی قیینچیلیک و روحی باسیملر اولرنی قینهیدی.»
یاشلرنینگ اوقیشنی دوام ایتتیریش اوچون کابل گه کیلیشی اولرنینگ یخشیراق تعلیم امکانیتلریدن فایدهلنیش و علمی آرزولرینی آشیریش یولیدهگی سعی-حرکتلرینی افادهلهیدی. اولرنینگ کوپینچهسی عایلهدن اوزاقلیکنی قبول قیلیب، ترقیات و رواجلنیش اوچون ینگی یولنی تنلهیدی.
