اسلام عایلهوی حیاتده مصلحت قیلیش، اوز ارا توشونیش، حقوق و مجبوریتلر گه رعایه قیلیش همده یخشی معامله قیلیش گه کتته اعتبار قرهتهدی. حقوقشناسلر و دین علمالری هم ایر-خاتین اورتهسیدهگی عایلهوی حیات گه عاید مسئلهلرده مصلحت قیلیشنی عایلهوی مناسبتلرنی مستحکملش و یخشیلشگه تأثیر قیلوچی عامللردن بیری دیب حسابلهیدی.
حقوقشناس محمدیوسف یوسفی، عیال اسلامی حکملر و عملدهگی قاعدهلر دایرهسیده انسانی قدر-قیمت و موقع گه ایگه ایکنینی، اونینگ عایلهوی حیات گه عاید مسئلهلرده فکری انابت گه آلینیشی ممکنلیگینی ایتهدی. او شوندهی دییدی: «عایلهوی حیات ایر-خاتین اسلامی تماییللر گه عمل قیلگن حالده و اوزارا حرمت اساسیده عایله مسئلهلرینی بیرگهلیکده محاکمه قیلسه، ینهده برقرار بولهدی. کیلیشماوچیلیک یوزه گه کیلگن تقدیرده، عایله کتتهلری، دین علمالری و ایشانچلی کیشیلر بیلن مصلحتلشیش معمالرنی حل قیلیش و اوزارا توشونیشنی تأمینلشگه یاردم بیریشی ممکن.»
ینه بیر حقوقشناس سمیعالله بارز هم، موفقیتلی عایله مهر-محبت، اوزارا توشونیش، حرمت و عایلهنینگ هر بیر اعضاسی اوز زمهسیدهگی مسئولیتلر گه رعایه قیلیشی اساسیده قوریلیشینی تأکیدلهیدی. اونینگ فکریچه، عایله اعضالرینینگ قرهشلریگه اعتبار بیریش کیلیشماوچیلیکلرنی کمهیتیریشده ثمرهلی بولیشی ممکن. اونینگ کوپهیتیریشیچه: «ایر-خاتین عایلهوی حیات گه عاید مسئلهلرده بیر-بیری بیلن مصلحتلشیشی و اوز فکرلرینی بیلدیریشی ممکن. بیر-بیرینینگ فکریگه اعتبار بیریش توشونماوچیلیکلرنی کمهیتیریش و عایلهوی مناسبتلرنی مستحکملشگه یاردم بیرهدی. ایر و خاتیننینگ قانونی حقوقلریگه رعایه قیلیش، آته-آنهلرنی حرمت قیلیش همده عایله اعضالری اورتهسیدهگی یخشی مناسبتلرنی سقلش اوچون مهم دیر.»
باشقه تاماندن، دین عالمی قطبالدین مجتهد، اسلام عایلهوی حیاتده انسان قدر-قیمتی، حرمت، یخشی معامله و مصلحتلشوو گه رعایه قیلیشگه کتته اعتبار قرهتیشینی ایتهدی. او شوندهی دییدی: «حنفی فقهده عیالنینگ اوزیگه خاص موقعی و حقوقلری موجود بولیب، او عایلهوی حیات گه عاید مسئلهلرده اوز فکری و مصلحتلرینی بیلدیریشی ممکن. ایر و خاتیننینگ عایلهوی مسئولیتلری اسلامی حکملر دایرهسیده بجریلیشی کیرهک. اولرنینگ اوزارا مصلحتلشووی و کیلیشووی عایلهوی ایشلرنی یخشیراق باشقریشده ثمرهلی بولیشی ممکن.»
شو بیلن بیرگه، سلاموطندار صحبت قیلگن بیرقطار عیاللرنینگ حکایهلری شونی کورستهدی کی، ایریم عایلهلرده حیاتنینگ مهم مسئلهلری بوییچه قرارلرنی کوپراق ایر یا کی عایله کتتهلری قبول قیلهدی. اولرنینگ ایتیشیچه، اولر اویدهگی کوندهلیک ایشلرده مهم رول اوینهیدی. بیراق عایلهوی حیات گه عاید ایریم اساسی قرارلرده اوز فکرلرینی بیلدیریش امکانیتی کمراق بولهدی.
عیاللردن بیری عایلهسیده ایریم مهم مسئلهلر جملهدن ییر و قیمتبها بویوملرنی ساتیب آلیش بوییچه قرارلر اساساً ایری و عایله کتتهلری تامانیدن قبول قیلیینیشینی، بعضی حاللرده عیاللرنینگ فکریگه کمراق اعتبار بیریلیشینی ایتهدی. او شوندهی دییدی: «بیزنینگ اوییمیزده برچه کتته قرارلرنی ایریم و قیناتهم قبول قیلهدی. اگر فکریم بولسه ایتهمن، بیراق آخر-عاقبت قرارنی اوزلری قبول قیلیشهدی. بعضاً عیاللرنینگ فکری کوپراق تینگلنسه، کوپلب معمالر کمهیردی دیب اویلهیمن.»
ینه بیر عیال، سلاموطندار گه اوی-روزغار ایشلریده فعال اشتراک ایتیشینی، بیراق ایریم مالیهوی مسئلهلر و مهم عایلهوی قرارلرده یکونی قرارنی کوپراق ایری قبول قیلیشینی بیلدیرهدی. اونگه کوره: «بعضاً ایریم مسئلهلرده میندن مصلحت سورهلهدی، اما یکونی قرارنی ایریم قبول قیلهدی. مینیمچه اگر ایر-خاتین حیاتدهگی مهم مسئلهلر یوزهسیدن کوپراق مصلحتلشیب، اوزارا توشونیشگه اینتیلسه، بو مناسبتلرنی یخشیلش و عایلهده ینهده کوپراق خاطر جمعلیکنی تأمینلشگه یاردم بیرهدی.»
ایر-خاتیننینگ عایلهوی حیات گه عاید مسئلهلرده فکرلریگه اعتبار بیریش و اوزارا مصلحتلشیشی توشونماوچیلیکلرنی کمهیتیریش، عایلهوی مناسبتلرنی مستحکملش و عایلهوی حیاتده ینهده قولی محیط یرهتیشده ثمرهلی بولیشی ممکن. اسلام شریعتی نقطهی نظریدن هم مصلحتلشوو، اوزارا توشونیش، یخشی معامله قیلیش همده اوز ارا حقوق و مجبوریتلر گه رعایه ایتیش عایلهوی حیاتنینگ مهم تمایللریدن حسابلنهدی.
