خبرچیلر مصونیت کمیتهسی، ۳-می، خلقارا ییتکرمهلر ایرکینلیک کونی مناسبتی بیلن اعلام قیلیشیچه، ییتکرمهلر اقتصادی قیینچیلیگی سبب، افغانستان عیال خبرچیلر حضوری ۲۹ فایز کمهیگن.
اوشبو کمیتهنینگ برنامهلر مسئولی حسیبالله فرارون، اوچینچی مینی نشانلش مناسبتی بیلن بولگن دستورده ایتیشیچه، میلادی ۲۰۲۴-ییلده افغانستان ییتکرمهلریده ۸۹۳ خبرچی عیالنینگ فعالیتی بولگنی بیرحالده، بیراق بو رقم ۲۰۲۵-ییلده ۶۳۴ کیشیگه کمهیگن.
اونینگ کوپهیتیریشیچه: «۲۰۲۵-ییلده افغانستان بویلب ۶۳۴ عیال خبرچی فعالیت قیلماقده که قریب ۲۹ فایز کمهیگنینی کورستهدی. اوندن بیر ییل آلدین ۸۹۳ کیشی ییتکرمهلرده فعالیت قیلهردی. اوشبو کمهیشنینگ اینگ مهم سببی، ییتکرمهلرنینگ اقتصادی قیینچیلیگی دیر.»
خبرچیلر مصونیت کمیتهسی مسئوللری، تیریک موجودلردن عکس آلیش تقیقلنگنی و معلومات گه قول تاپیش چیکلاولرینی، افغانستان دهگی ییتکرمهلرنینگ اینگ مهم قیینچیلیکلریدن دیگنلر.
شوندهی بیرحالده، مذکور دستورده حضوری بولگن ییتکرمهلر مسئوللریدن قطاری، اسلام امیرلیگیدن حبسدهگی خبرچیلرنینگ کیچیریلیشینی سورهگنلر.
«طلوعنیوز» خصوصی ترماغی باشلیغی فریدالله محمدینینگ ایتیشیچه: «اسلام امیرلیگیدن قربان هییت بیرمی مناسبتی بیلن حبسدهگی خبرچیلرنینگ شفقتنی نظرگه آلیش بیلن قوییب یوباریشلرینی سورهیمیز که هییتنی عایلهلری یانیده اوتکزسینلر.»
شونینگدیک «آریانانیوز» خصوصی تلویزیون باشلیغی مجیبالرحمان بهیر هم خبرچیلر آزاد بولیشینی ایستهگن. «حبسده بولگن خبرچیلر آزاد بولسین، هییت بیرهمی کونلرینی عایلهلری یانیده اوتکزسینلر.»
شوندهی بیرحالده، اسلام امیرلیگی معلوماتومدنیت وزیرلیگی مسئوللرینینگ ایتیشلریچه، اوتگن قویاش ییلده، تتکرمهلردن حمایت قیلیش اوچون افغانستان ده ۱۴۴ ییتکرمه گه فعالیت جوازی بیریلگن.
اوشبو وزیرلیک نشرات معیتی حیاتالله مهاجر فراهینینگ ایتیشیچه: «ییتکرمهلرنینگ ۱۱۱ ته قاعده بوزرلیک موردی کوریب چیقیلیب و اولرگه ییچیم یول تاپیلگن. شونینگدیک خبرچیلرنینگ ۲۶ مورد قیینچیلیگی معلوماتومدنیت وزیرلیگیگه یوباریلیب و حل بولگن.»
۳-می ۱۹۹۳-ییلده، بیرلشگن ملتلر تشکیلاتینینگ عمومی مجمعسی آرقهلی ییتکرمهلر ایرکینلیگی اهمیتی توغریسیده آگاهیلیک بیریش همده سوز ایرکینلیگی حرمتیگه دولتلر سوزینی ایسلهتیش مقصد، خلقارا ییتکرمهلر ایرکینلیک کونی صفتیده ناملنگن.
