افغانستان عیال خبرچیلر نهادی مسئوللری، اوتگن کون (یک‌شنبه، ۵-قوس)، کابل ده یولگه قوییلگن بیر برنامه‌ده افغانستان ده سونگی ایکی ییل‌ده عیال خبرچیلر وضعیتی، اولر برابریده‌گی موجود قیینچیلیکلر، عیال خبرچیلر برابریده اوتگن ایکی ییل‌ده اورته گه چیقگن اوزگریشلر و قیین‌چیلیک‌لردن چیقیش یوللری حقیده اوشبو نهاد نینگ نظر سوره‌ش نتیجه‌سی نی اعلام قیلگنلر.
مذکور برنامه‌ده افغانستان عیال خبرچیلر نهادی مسئولی مینه حبیب نینگ ایتیشیچه، اوشبو نظر سوره‌ش گه مملکت بویلب ۲۰۰ خبرچی شرکت قیلگن که، اولردن ۹۰ فایزی حاضر هم میدیالرده ایش بیلن شغللنگن دیر. اونینگ کوپه‌یتیریشیچه: «موجود قیینچیلیکلر خصوصیده، شرکت قیلگنلردن ۴۵ فایزی خبرچی عیال‌لر نینگ ایش‌سیزلیگی، ۱۰ فایزی معلومات گه قول تاپه آلمسلیک، ۷ فایزی میدیالرده روحی و ایش امنیتی گه ایگه بولمه‌سلیک نی، اینگ بویوک قیین‌چیلیک عنوان قیلگنلر و شونینگدیک ۲ فایزی حجاب نی رعایت قیلیش و ماسک تاقیش‌نی یره‌تیلگن چیکلاو دییشگن.»
بیزلرنینگ «ایکس» ترماغی ده هم تعقیب قیلینگ!
افغانستان عیال خبرچیلر نهادی مسئوللری، بو نظر سوره‌ش نی یولگه قوییلگنی‌دن مقصد، عیال خبرچیلر برابریده‌گی قیینچیلیکلر نی بیان قیلیش و اولر گه حل یول اختریش عنوان قیلگنلر. افغانستان عیال خبرچیلر نهادی مسئولی نینگ سلام‌وطندار گه اورغولشیچه: «بو نظر سوره‌شدن مقصدی‌میز، قیینچیلیکلر نی تاپیش ایدی که، اوشبو نهاد اونینگ حلی اوچون اقدام قیلسین. عیال خبرچیلردن کوپینچه‌سی اقتصادی یامان وضعیت‌دن شکایت قیلگن ایدیلر، چونکه اولر بو اوزگریشدن زیان کوره‌دیگن قشر ایدیلر. شونینگدیک دولت و تشقی نهاد‌لر همکارلیگی بیلن اولردن حمایت بولسین.»
بو نظر سوره‌ش گه شرکت قیلگنلر، مالی حمایت، میدیالرده جنسیتی تبعیض حل بولینیشی و اولر گه کوپراق ایش فرصت‌لری یره‌تیلیشی نی، اولر برابریده‌گی موجود قیین‌چیلیک‌لردن چیقیش یوللری عنوان قیلگنلر. عیال خبرچیلر کوپینچه قیینچیلیکلر نی اوز ایشلری برابریده توسیق عنوان قیلگنلری بیرحالده، بیراق بو کبی نظر سوره‌شلر نینگ یولگه قوییلیشی نی نتیجه‌‌‌سیز بیله‌دیلر.
بو توغریده عیال خبرچیلردن بیری هاجره نینگ سلام‌وطندار گه ایتیشیچه: «قیینچیلیکلر کوپ دیر، عیال‌لر معلومات گه قول تاپه آلمه‌یدی که انه شوو سبب، ایشلرینی درست انجام بیره آلمه‌یدی و آیلیک‌لری کمه‌یتیریله‌دی و باشقه بیر تاماندن بو رقم برنامه‌لر و آمار و ارقام ارایه‌سی هیچ درد نی دوا قیلمه‌یدی و اونچه نتیجه بیرمه‌یدی.»
بیزلرنینگ فیسبوک صحیفه‌میزگه باش اورینگ!
شونینگدیک عیال خبرچیلردن باشقه بیری زرغونه نینگ ایتیشیچه: «۱۴ ییل‌دن بیری میدیاده‌مین. سونگی ایکی ییل‌ده بودجه یوقلیگی سبب، ایش گه آلمه‌یدیلر که انه شوو سبب، آیلیک‌سیز ایشله‌یمیز. بو نظر سوره‌ش نتیجه‌سی نینگ فایده‌لی بولیشی نی کوتیب تورگن‌میز.»
بوندن آلدین میدیالردن حمایت قیلووچی نهاد‌لر، اوزگریشلردن کیین، میدیالرده ۲ مینگ ۷۵۰ فعال عیال‌دن، یالغیز ۵۴۵ ته‌سی نینگ حاضر فعالیت قیلیشی و اولر ارا ۲۸۸ ته‌سی نینگ خبرچی بولگنی نی اعلام قیلگن ایدیلر.
