بدخشان معلومات و مدنیت ریاست رئیسی معزالدین احمدی نینگ ایتیشیچه، اوشبو ریاست بوگون (شنبه، ۱۳-جوزا)، ناشرلر بیرلشمه‌سی هماهنگ‌لیگی‌‌ده کتاب هفته‌سی مناسبتی بیلن مذکور ولایت مرکزی و تومن‌لریده ایکی کون‌لیک کتاب کورگزمه‌سی نی یولگه قوییگن.
بدخشان معلومات و مدنیت ریاست رئیسی نینگ کوپه‌یتیریشیچه: «عامه کتاب‌خوان‌لیک کورگزمه‌لری نی مرکز و تومن‌لرده یولگه قوییش خصوصیده سعی و حرکت قیله‌میز. بو کبی برنامه‌لریمیز بولگنی پیتده، تومن‌لرده هم کورگزمه یولگه قویه‌میز. اوشبو برنامه ایکی کون‌لیک دیر. حقیقتا بو کبی برنامه‌لر نینگ یولگه قوییلیشی ناشرلر و کتاب‌ساتووچیلر اوچون فایده‌لی دیر.»
بیزلرنینگ فیسبوک صحیفه‌میزگه باش اورینگ!
بدخشان ناشرلر بیرلشمه مسئولی احمد‌نبیل قاضی‌زاده نینگ ایتیشیچه، یولگه قوییلگن اوشبو کتاب کورگزمه‌سیدن مقصد، ییگیت‌لر آره‌سیده کتاب اوقیش نینگ رواجلنیشی دیر.
جناب قاضی‌زاده نینگ کوپه‌یتیریشیچه: «کتاب هفته‌سی مناسبتی بیلن، بو کورگزمه نی یولگه قوییدیک. اوشبو کورگزمه ایکی کون‌گچه دوام تاپه‌دی. افغانستان ده کرونا ویروسی ترقه‌لگنی‌دن حاضرگچه، کتاب اوقیش کمه‌یگن. بو کبی پروسه‌لر نینگ دوام تاپیشی نی ایسته‌یمیز، عکسینچه‌سی کتاب ساتیله‌دیگن دکان‌لر نینگ یاپیلیشی ممکن.»
بدخشان نینگ فیض‌آباد شهری و ارگو، کشم، بهارک و شکی درواز تومن‌لریده یولگه قوییلگن اوشبو کورگزمه‌ده، دینی، سیاسی، اجتماعی، فرهنگی و فلسفی بولیم‌لرده مینگ‌لرچه جلد کتاب نمایش گه قوییلگن.
شونده‌ی بیرحالده، مذکور کتاب کورگزمه‌سی گه شرکت قیلگن احمد‌صدام ایوبی نینگ ایتیشیچه، بو کبی کورگزمه‌لر نینگ یولگه قوییلیشی جماعه‌ده کتاب اوقیش فرهنگی نینگ رواجلنیشی گه سبب بوله‌دی.
بیزلرنینگ توییترده هم تعقیب قیلینگ!
جناب ایوبی نینگ کوپه‌یتیریشیچه: «بو برنامه نینگ کورگن کیشی‌لردن کتاب و مطالعه قیلیش‌لری نی ایسته‌یمن. چونکه بو رقم جماعه پیشرفت قیله‌دی. بدخشان ده بو کبی کورگزمه‌لر نینگ یولگه قوییلیشی بیلن باشقه ولایت‌لرده هم یولگه قوییلشی نی ایسته‌یمیز.»
باشقه بیر تامان‌دن، بدخشات ده‌گی مدنیت‌چیلردن قطاری بو کبی کورگزمه نینگ یولگه قوییلگنی‌دن خورسند‌لیک بیلدیریب و ایتیش‌لریچه، کورگزمه نینگ بیرینچی کونیده اهالی نینگ حضوری کم‌لیگی، کتاب اوقیش خصوصیده اهالی علاقه‌سی کمه‌یگنی نی کورسته‌دی.
بدخشان مدنیت‌چیلریدن بیری عبدالبصیر وثیق، قیزلر یوزیگه مکتب‌لر و بیلیم یورت‌لر ایشیگی یاپیلگنی نی، کتاب اوقیلیشی کمه‌یگنی گه سبب بولگن دیگن.
ایتیش کیره‌ک که، اوتگن ییل‌لرده کتاب کورگزمه‌لری‌ده ییگیت‌لر و قیزلر نینگ حضوری کوپ بولگنی بیرحالده؛ بیراق بدخشان ده‌گی اوشبو کورگزمه، قیزلر نینگ حضوری بولمه‌گنی بیلن یولگه قوییلگن.
