اسلام امیرلیگی صناعت و سودا وزیری نورالدین عزیزی، ترمذ ایکینچی ییغیلیشیده، مرکزی و جنوبی آسیا باغلنیشی بارهسیده، افغانستاننینگ بوتوغریدهگی رولی مهملیگینی بیلدیردی.
عزیزی، بوگون (۱۴ جوزا/۴ جون، پنجشنبه) اوشبو ییغیلیشدهگی آنلاین نطقیده افغانستان اوزینینگ استراتیژیک جایلشووی طفیلی مرکزی و جنوبی آسیانی باغلشده مهم رول اوینشی ممکنلیگینی ایتدی.
او، «افغان-ترانس» لایحهسینی منطقهوی باغلنیشنینگ اینگ مهم لایحهلریدن بیری دیب اتهگن و بو لایحهنینگ عملگه آشیریلیشی منطقهده سودا رواجلنیشی، ترانزیت جریانلرینینگ یینگیللشووی همده اقتصادی همکارلیکلرنینگ کوچهیشیگه یاردم بیریشینی قوشیمچه قیلگن.
صناعت و سودا وزیری، شونینگدیک قوشمه اقتصادی منفعتلر منطقهده برقرار تینچلیک، اوزارا ایشانچ و برقرارلیکنی تأمینلش اوچون اساس بولیشی ممکنلیگینی تأکیدلهگن.
شو بیلن بیرگه، اقتصاد شناسلردن بیرقطارینینگ ایتیشیچه، افغانستاننینگ مرکزی آسیا مملکتلری بیلن اقتصادی و ترانزیت علاقهلرینی کینگهیتیریش صادرات حجمینی آشیریش و منطقه بازارلریگه تاوارلرنی ییتکزیب بیریش خرهجتلرینی کمهیتیریشده مهم رول اوینشی ممکن.
اقتصاد شناس عبدالظهور مدبر شوندهی دییدی: «افغانستان تورلی مملکتلر اینیقسه مرکزی آسیا دولتلری بیلن سودا علاقهلرینی کینگهیتیریشگه محتاج. افغانستان و پاکستان اورتهسیدهگی سیاسی کیسکینلیکلر همده یقین شرق دهگی بیقرارلیک سبب ایریم سودا یوللری چیکلنگن. بوندهی شرایطده مرکزی آسیا دولتلری، چین و روسیه افغانستاننینگ منطقه همده اروپا بازارلریگه چیقیشی اوچون مهم یونهلیشلر بولیشی ممکن.»
مرکزی و جنوبی آسیا اورتهسیدهگی باغلنیش مسئلهسیگه بغیشلنگن ترمذ ایکینچی ییغیلیشی منطقه دولتلرینینگ یوقاری لوازملی رسمیلری، بیرلشگن ملتلر تشکیلاتی و اروپا اتفاقی وکیللری اشتراکیده اوزبیکستان پایتختی تاشکینتده اوتکزیلگن.
