افغانستان تینچلیگی بوییچه روسیه خاص نماینده‌سی ضمیر کابلوف نینگ ایتیشیچه، کیلگوسی کون‌لرده آمریکا، روسیه، چین و پاکستان نماینده‌لری افغانستان تینچلیگی حقیده سوزلشه‌دی.
جناب کابلوف روسیه نینگ اسپتونیک خبرگزارلیگی بیلن اوتکزگن خاص سوزلشوویده، بونده‌ی بیانات بیرگن. ضمیر کابلوف نینگ ایتیشیچه، مذکور سوزلشوو قطر پایتختی دوحه شهریده صورت تاپه‌دی و بو سوزلشووده افغانستان تینچلیک پروسه‌سی و تامان‌لرنی سوزلشووگه حاضر قیلیش حقیده بحث قیلینه‌دی.
ضمیر کابلوف نینگ کوپه‌یتیریشیچه، مذکور ییغین‌لرده قرار آلینمه‌یدی و یالغیز تامانلر بحث اوتکزیش‌لری اوچون تشویق قیلینه‌دی. افغانستان تینچلیگی بوییچه روسیه خاص نماینده‌سی نینگ اورغولشیچه، افغانستان دولتی و طالبان گروهی آره‌سیده سوزلشوو یولگه قوییلمه‌سدن باشقه هیچ بیر یول یوق.
عین حالده، ضمیر کابلوف طالبان گروهی نینگ بهاری و تابستانی اوروشی باشله‌نیشی و مذکور اوروش‌لرنینگ افغانستانلیکلرارا سوزلشوولر اوستیده‌گی تأثیری خصوصیده خواطر بیلدیریب ایتیشیچه، بهار و تابستان فصل‌لریده طالبان نینگ اوروش‌لری باشله‌نیشی سوزلشوولر اوستیده سلبی تأثیر قویه‌دی. اونگه کوره، طالبان سوزلشوولردن واز کیچمه‌یدی.
افغانستان تینچلیگی بوییچه روسیه خاص نماینده‌سی بیاناتی نینگ باشقه بیر بولیمی ده ایتیشیچه، ایکی تامان آره‌سیده‌گی سوزلشوولر معنالی بولیشی کیره‌ک و تامانلر واحد بیر آجندا اوستیگه کیلیش‌لری کیره‌ک.
باشقه بیر تاماندن ضمیر کابلوف، طالبان نینگ اسلامی امارت اورته گه کیلیشی خصوصیده اورغوله‌گنی گه اشاره قیلیب ایتیشیچه، مذکور گروه رهبرلیگی بیله‌دی که مذکور تیزیم اورته گه کیلیشی افغانستان اهالیسی و دنیا جماعه‌چیلیگی تامانیدن قبول قیلینمه‌یدی.
شونده‌ی بیرحالده، افغانستان تینچلیگی توغریسیده استانبول ییغینی ۲۴- جاری آیده یولگه قوییلیشی گه قرار قیلینگن ایدی، بیراق مذکور ییغین نی یولگه قویه‌دیگنلر طالبان نینگ حاضر بولمه‌گنی باعث بو ییغین فطر بیره‌می دن کیین یولگه قوییلیشی نی اعلام قیلدی.