اسلام امیرلیگی باش وزیرینینگ اداری اورین باسری عبدالسلام حنفی، کابل شهریده ترقیاتی لایحهلر ایشی توگهشی بیلن بو شهر سیماسی سیزیلرلی درجهده اوزگریشینی بیلدیردی.
او، بوگون (9-جدی/30-دسمبر، سهشنبه) کابل ولایتی مقامی حاکملیگی قرشیسیده «هوایی کوپریک» قوریلیشی مناسبتی بیلن اوتکزیلگن تدبیرده بوندهی بیانات بیردی.
حنفی جنابلری، قویاش 1404-ییل اوچون قریب 8 میلیارد 113 میلیون افغانی ترقیاتی بودجه نظرگه توتیلگن و اونینگ عملگه آشیریلیشی بیلن کابل شهری سیماسی سیزیلری درجهده اوزگریشینی قوشیمچه قیلدی.
اونگه کوره، قویاش 1404-ییلده کابل شهری بلدیهسی تامانیدن ایریم ساحهلرده 258 ترقیاتی لایحه عملگه آشیریلماقده و کابل بلدیهسی اوتگن تورت ییل دوامیده 350 کیلومتر سرکنی قوریب وفایدهلنیشگه تاپشیرگن.
عبدالسلام حنفی سوزلری دوامیده، کیلهجکده اشاره و ترافیکی لوحهلرنی قوندیریش، پارکینگ قوریش، شهر کورکملیگی، میترو، تراموای و سرکلرنی قوریشده بیآرتی نظرگه توتیلیشی، شونینگدیک کابل شهری مقیاسیده کتته پارکلر تشکیل ایتیلیشی، یشش محیط ستندردلری نظرگه توتیلیشی اوچون سعی-حرکت قیلینماقدهلیگینی بیلدیردی.
شونینگدیک او، یشاوچیلردن شهر تازهلیگی و کورکملیگی اوچون دولت بیلن همکارلیک قیلیشلرینی سورهدی.
کابل ولایتی مقامی حاکملیگی قرشیسیده 426 میلیون افغانی عوضیگه «هوایی کوپریک» قوریلیشی، بوگون اسلام امیرلیگی باش وزیرینینگ اقتصادی اورین باسری ملا عبدالغنی برادر و باشقه ییریک عملدارلرنینگ حضوری بیلن باشلندی.
بو کوپریک، 235 متر اوزونلیک، 18 متر کینگلیک و 6.8 متر بلندلیکده قوریلهدی.
اوشبو کوپریک، یشاوچیلرنینگ باریب-کیلیشیگه قولیلیک یرهتیش مقصدیده قوریلهدی و ایشی 15 آی دوامیده توگهشی ایتیلگن.
