خلق ارا کیچیریم تشکیلاتی نینگ ایتیشیچه، طالبان گروهی هلمند ولایتیگه هجوم قیلگنی و امنیتی کوچلر و طالبان گروهی آره‌سیده، آتیشمه‌لر دوام ایتیب کیلگنی باعث برچه قتناویوللر تینچ‌اهالی یوزیگه یاپیلگن.
اوشبو نهاد بوگون ( پنج شنبه ۲۴- میزان) بیر اعلامیه ترقه‌تیب، طالبان گروهی لشکرگاه شهریگه هجوم اویوشتیرگنیدن بویان کمیده ۳۵ مینگ کیشی اوی – جایلرینی ترک قیلیشگن. خلق ارا کیچیریم تشکیلاتی نینگ اییشیچه، تینچ‌اهالی لشکرگاه شهرینی ترک ایتیش اوچون اوروش تامان‌لری رخصت بیریش‌لری کیره‌ک.
اوشبو تشکیلات تامانیدن ترقه‌تیلگن گزارش گه کوره، لشکرگاه شهریده‌گی تینچ‌اهالی نینگ وضعیتی جوده یمان دیر و هلمند ولایتیده اوروش کمه‌یشی خصوصیده هیچ بیر نشانه کوریلمه‌گن و آواره سانی کونسایین کوپه‌یماقده.
خلق ارا کیچیریم تشکیلاتی نینگ کوپه‌یتیریشیچه، هلمند ولایتی نینگ اوروشیده آواره بولگنلر ساغلیک خدمتلر، آذیق-آوقات و باشقه انسان سیورلیک یاردم گه احتیاجی بار.
عین حالده، بیرلشگن ملتلر تشکیلاتی نینگ اورین‌باسرلیک دفتری هم بیر اعلامیه ترقه‌تیب، افغانستانده‌گی اوروشلر تیزلیککه توخته‌تیلیشی نی سوره‌گن.
یوناما نینگ ایتیشیچه، جاری هفته‌ده‌گی آتیشمه‌لر باعث هلمند ولایتی نینگ مینگ‌لرچه اهالیسی اوی – جایلرینی ترک قیلیش گه مجبور بولگن. ۶ کون آلدین هلمند ولایتیده اوروش باشلندی و اوروش دوام تاپگنی باعث حاضرگچه ۵ مینگ عایله اوی – جایلرینی ترک قیلیشگن. حاضر هلمند ولایت مرکزی لشکرگاه شهری نینگ بولان منطقه‌سیده اوروش نینگ دوامی بار. خوفسیزلیک حربیلر نظارتدن چیققن منطقه‌لر اینیقسه نادعلی تومنی نینگ چاه انجیر منطقه‌سینی قیته‌دن نظارتگه آلیش اوچون سعی و حرکت قیلماقده‌لر.
خوفسیزلیک کوچلردن قطاری، نظارتدن چیققن ایریم منطقه‌لرنی قیته‌دن نظارت گه آلگن‌لرینی ایتگن.
هلمند ولایتی حاکمی سوزلاوچیسی عمر زواک نینگ ایتیشیچه، آتیشمه‌لر جریانیده ۷ تینچ‌اهالی اولیب و ۲۳ تینچ اهالی یره‌لنگن. زواک جنابلری نینگ کوپه‌یتیریشیچه، اوتگن کیچه یوزبیرگن آتیشمه‌لر نتیجه‌سیده، بیر حربی هلاک و ۵ حربی یره‌لنگن. هلمند ولایت حاکمی سوزلاوچیسی نینگ ایتیشیچه، اوتگن کیچه خوفسیزلیک کوچلر هلمند ولایتی نادعلی ولسوالیگی نینگ چاه‌انجیر منطقه‌سی و هلمند – کندهار قتناو یولی اوستیگه هوایی هجوم اویوشتیرگن کیم نتیجه‌ده، ۳۶ طالب اولیب و ۱۱ طالب یره لنگن.
هلمند ولایتی نینگ عامه‌ساغلیک ریاستی تامانیدن ترقه‌تیلگن گزارش گه کوره، اوتگن کونی تینچ‌اهالی شامل ۱۹ جسد و ۱۵۰ یره‌دار ایمرجنسی کسلخانه‌سیگه انتقال بیریلگن.
هلمند ولایتی نینگ مهاجرلر ریاستی باشلیغی محمد رامین، اوتگن کون گچه اوی و جایی نی ترک قیلگن ۵۱۰۰ عایله قید ایتیلگنیدن خبر بیرگن.
