روان‌شناسلرنینگ ایتیشیچه، اوز-اوزینی اولدیریش عادت‌ده بیته عامل‌نینگ نتیجه‌سی ایمس؛ بلکی روحی قیینچیلیک‌لر، کوچلی امیدسیزلیک، عاجزلیک حسی، تروما تجربه‌لر و حیات‌ده‌گی آغیر باسیملر اوز-اوزینی اولدیریش گه آلیب کیله‌دی.
اولر، خُلق-اتوارده‌گی اوزگریش‌لر، یالغیزلنیش، امیدسیزلیک، اولیم یا کی حیات‌نینگ معناسیزلیگی حقیده گپیریش اعتباردن چیتده قالدیریلمسلیگی کیره‌ک بولگن بیلگیلر ایکنینی ایته‌دیلر. عایله کمکی و اوز وقتیده متخصص‌دن یاردم آلیش اوز جانیگه قصد قیلیش‌نینگ آلدینی آلیشده ثمره‌لی بولیشی ممکن.
بیراق هر بیر انسان حیاتیده‌گی قیینچیلیک‌لر و روحی باسیملر تورلیچه نمایان بوله‌دی. سلام‌وطندار حیاتی گه یکون یسه‌گن ایکی عیال همده اوز-اوزینی اولدیریش گه قصد قیلیب و قوتقریلگن عیال عایله‌لری بیلن صحبت قیلگن.
دایکندی ولایتی نیلی شهری یشاوچیسی بولگن زینب‌نینگ ایتیشیچه، اونینگ ۲۰ یاشلی سینگلیسی بیر ییل اول اوز جانیگه قصد قیلیب، حیات‌دن کوز یومگن. اونینگ سوزلریگه کوره، سینگلیسی وفاتیدن آلدینگی آی‌لر دوامیده استه-سیکین روحی و خلق-اتوار جهتیدن اوزگره باشله‌گن؛ قوناق (شاد) قیزدن اوزینی چیت گه تارته‌دیگن انسان گه ایلنگن، اویقوسی بوزیلگن و کوپ وقت خواطرده یورگن. او شونده‌ی دییدی: «او تاباره جیم و گوشه‌گیر بولیب بارردی، اویقوسی یخشی ایمسدی و کیله‌جگیدن جوده امیدسیز ایدی. بعضی دردلرینی مین بیلن بولیشر، چرچاق، حیاتی‌نینگ معناسیزلیگی و کیله‌جککه امید یوقلیگی حقیده گپیرردی. بیز ایسه اونی شونچه کی خفه دیب اویلردیک و وقت اوتیشی بیلن احوالی یخشیلنه‌دی، دیب امید قیلردیک. ایندی آرتگه قره‌سم، بیز جدی قبول قیلمه‌گن بیلگیلر بولگنینی کوره‌یپمن.»
سمنگان ولایتیدن بولگن سمیعه (مستعار) هم ۱۶ یاشلی سینگلیسی تخمیناً سکیز آی اول اوز جانیگه قصد قیلگنینی ایته‌دی. اونینگ سوزلریگه کوره، سینگلیسی‌ده اونشتیریلیشیدن آلدین هیچ قنده‌ی روحی معما بولمه‌گن، بیراق اونشتیریلگنیدن سونگ تورموش قوریشگه قرشی چیققن و اوزینی چیتگه تارتیب، تجاوزکار بولیب قالگن. او شونده‌ی دییدی: «معماسی اونی اونشتیریشگنیدن کیین باشلندی. اوشه کونلرده او بیر نیچه بار آنه‌مگه بو اونشتیرو گه راضی ایمس‌لیگینی ایتگن. اما بیز بو گپ‌لرنی جهلی چیققن پیتده ایتیلگن سوزلر دیب اویله‌دیک و کیینچه‌لیک فکری اوزگره‌دی دیب کوتدیک. افسوس کی اونینگ گپلرینی جدی قبول قیلمه‌دیک»
باشقه بیر حالتده ایسه، ۳۵ یاشلی بدخشان‌لیک نازی، فرزندی وفات ایتگنیدن سونگ اوزینی آدملردن چیت گه آله باشله‌گنینی، کوپینچه ییغله‌گنینی، اوی‌دن چیقمه‌گنینی و اوغلی‌نینگ بویوملرینی کورگنده ینه کوچلی روحی باسیمنی باشدن کیچیرگنینی ایته‌دی. بو حالت بیر نیچه آی دوام ایتگن و آخر-عاقبت عاجزلیک حسی کوچه‌یگنی سببلی او اوز جانیگه قصد قیلیشگه اورینگن. بیراق، او اوز وقتیده شفاخانه گه ییتکزیلیب، حیاتی سقلب قالینگن. اونینگ ایتیشیچه: «ایکی ییل یگانه اوغلیم وفات ایتگنیده استه-سیکین اوزیمنی یوقاته باشله‌دیم. دستلبکی ایکی آی‌ده احوالیم جوده آغیرلشدی. باشقه‌لر گه بقریب-چقیرردیم و بوتونلی روحیم توشیب قالدی. بیر کونی فرزندیمدن ایریلیش عذابی گه باشقه چیده‌ی آلمه‌ی، اوز جانیمگه قصد قیلیشگه اوریندیم و اوی‌ده بار دارولرنینگ همه‌سینی ایچدیم. یخشی‌یمکی مینی اوز وقتیده شفاخانه گه آلیب باریشدی و آچ‌قازانیمنی یوویشدی. شوندن سونگ ایریم مینی روان‌شناس گه آلیب باردی. شفاکار مصلحتی بیلن کوندن-کونگه احوالیم یخشی‌لندی و تخمیناً بیش آی ایچیده بوتونلی حیات گه قیتدیم.»
روان‌شناس زحل امیرزاده، روحی معمالرنینگ اوزی یالغیز حالده اوز جانیگه قصد قیلیشگه آلیب کیلیش‌لیگینی، بیراق اولر کوچلی امیدسیزلیک و عاجزلیک حسی بیلن بیرگه کیلگنده، خوف آشیشینی ایته‌دی. او شونده‌ی دییدی: «روحی معما اوز-اوزیدن اوز جانیگه قصد قیلیشگه اونده‌یمه‌یدی، بیراق اوز جانیگه قصد قیلیش فکرلری بیلن چمبرچس باغلیق بولگن ایریم بوزیلیش‌لر بار. جمله‌دن آغیر توشکونلیک و انسان باشدن کیچیرگن ترومالرنی ایتیش ممکن.»
باشقه تاماندن، روان‌شناس شرف‌الدین عظیمی، ایسه عایله‌نینگ حکم قیلمسدن قوللب-قوتلشی، خوفلی وضعیتده‌گی انسان‌نی یالغیز قالدیرمسلیک، اونی زودلیک بیلن شفاکار یا کی روان‌شناس گه مراجعت قیلدیریش، روحی معمالرنی بهالش و دوالش همده خوفلی واسطه‌لردن فایده‌لنیش امکانیتینی چیکلش اوز جانیگه قصد قیلیش‌نینگ آلدینی آلیشده‌گی مهم چاره‌لر ایکنینی تأکیدله‌یدی. او شونده‌ی دییدی:«عایله انسان‌نی حکم قیلمسدن تینگلشی، او خوفلی حالتگه توشگنیده اونی یالغیز قالدیرمسلیگی و قوللب-قوتلشی کیره‌ک. اوز جانیگه قصد قیلیش فکرلری یا کی اورینیش‌لری موجود بولسه، انسان‌نی امکان قدر تیزراق روان‌شناس شفاکار گه آلیب باریش ضرور بولسه، کلینیک‌ده نظارت آستیده سقلش کیره‌ک.»
شو بیلن بیرگه، ۱۰ سپتمبر جهان اوز جانیگه قصد قیلیش‌نینگ آلدینی آلیش کونی. بو سنه اوز جانیگه قصد قیلیش حقیده خبردارلیک‌نی آشیریش، روحی سلامت‌لیککه اعتبار قره‌تیش و اونینگ آلدینی آلیش مهم‌لیگینی تأکیدلش مقصدیده نشانلنه‌دی.
