قطر ده افغانستان‌لیکلرارا تینچلیک سوزلشوولری باشلنگنیدن کمیده ۳ هفته اوتماقده؛ بیراق حاضرگچه مذکور سوزلشوولر خصوصیده بیر یوتوق قولگه کیلمه‌گن. بوگون حکومت مذاکره قیلووچی هیأتی بیر توییت آرقه‌لی ایتیشیچه، تینچلیک سوزلشوولرنی کیچیکتیریش اوچون قطار کیشیلر بهانه قیلیشه‌دی.
قطرده افغانستان مذاکره قیلووچی هیأت اعضاسی غلام فاروق مجروح نینگ ایتیشیچه، سوزلشوولرنینگ بیرینچی دوریده بعضن طالبان هیأتی اَیریم بهانه‌لر بیلن سوزلشوولرگه حاضر بولمه‌یدی ایدی.
جناب مجروح گه کوره، طالبان هیأتی آره‌سیده اَیریم قیینچلیکلر بارلیگی باعث اولر سوزلشوولرنینگ آرتده قالیشی اوچون بهانه قیلیب توره‌دی ایدی.
تینچلیک سوزلشوولری نینگ آرتده قالیشی نماینده‌لر کینگش اعضالری نینگ جدی تنقیدلری بیلن روپه‌رو بولگن.
نماینده‌لر کینگش اعضاسی سید صدیق حسن‌زاده نینگ ایتیشیچه، حکومت مذاکره قیلووچی هیأت اعضالریدن بیر قطاری نینگ سوزلشوولر تفصیلاتی حقیده خبری یوق. او، سوزلشوولرنینگ آرتده قالگنیدن تنقید قیلیب ایتیشیچه، ایکی تامان دستلبکی کیلیشووگه قول تاپمه‌سدن آلدین، مذاکره میزی گه حاضر بولدی و حاضر بو پروسه نینگ آرتده قالدیریش اوچون بهانه قیلیشه‌دی.
نماینده‌لر کینگشی نینگ باشقه بیر اعضاسی عبدالقادر قلاتوال نینگ ایتیشیچه، تینچلیک سوزلشوولری باشلنگنیدن بویان، اوروش میزانی قویی کیلگنی اورنی گه یوقاری کیتگن.
مذکور تنقیدلر، نماینده‌لر کینگشی ده تینچلیک خصوصیده ریجه توزه‌تیش بیر کمیسیون ایجاد ایتیلیشی گه سبب بولدی.
نماینده‌لر کینگش باشلیغی میررحمان رحمانی نینگ ایتیشیچه، تینچلیک خصوصیده ریجه توزه‌تیش اوچون نماینده‌لر کینگش باشلیغی نینگ ییتکچیلیگیده ۲۰ کیشی‌لیک بیر کمیسیون ایجاد ایتیله‌دی.
جناب رحمانی گه کوره، حکومت نینگ ۲۱ کیشی‌لیک هیأتی‌دن یالغیز ۳ کیشی نینگ سوزلشوولر خصوصیده معلوماتی بار و باشقه‌لر سیل و سیاحت قیلیب یورگن.
