افغانستان ده اسلامی امارت حاکمیتیدن بیر ییل اوتر ایکن، افغان خاتین قیزلری نینگ تقدیری حاضرگه قدر نامعلوم. بشر حقوقی کوزه‌تووچیسی نینگ ایتیشیچه، اوتگن بیر ییل افغانستان خاتین قیزلری اوچون دهشتلی بیر ییل حسابلنه‌دی.
سلام‌وطندار بیلن صحبت اوتکزگن بشر حقوقی کوزه‌تووچیسی خاتین قیزلر بولیمی مدیری نینگ اورین باسری هیدربار گه کوره، اوتگن بیر ییل ده اسلامی امارت نینگ ایشلری گه قره‌گنده، خاتین قیزلر نینگ عمومی مکان‌لرده جای‌لری یوق‌لیگینی اثباتله‌دی. اونگه کوره، خاتین قیزلر اسلامی امارت حاکمیتیده برچه بشر حقوقی دن محروم بولگنلر. او اسلامی امارت سرپرست حکومتیدن تنقید قیلیب ایتیشیچه، اسلامی امارت خاتین قیزلر برابریده‌گی فکرلرینی اوزگرتیریش گه اصلا تیار ایمس‌لر.
اونینگ ایتیشیچه: «اسلامی امارت نینگ نظری گه کوره، عمومی مکان‌لرده خاتین قیزلر گه جای یوق دیر، عیاللر اوچون یالغیز جای اوی و فرزند دار بولیش دیر، بو خلق‌ارا قانون_قاعده‌لرگه قرشی دیر.»
بیزلرنینگ فیسبوک صحیفه‌میزگه باش اورینگ!
برچه‌سی بیلن، افغانستان نینگ منحل بولگن بشر حقوقی مستقل کمیسیون باشلیغی شهرزاد اکبر که حاضر چیت ایل ده فعالیت قیلماقده سلام‌وطندار گه ایتیشیچه، اوتگن بیر ییل ده افغانستان نینگ معاصر تاریخیده افغان خاتین قیزلری اوچون قیین بیر ییل بولگن.
خانم اکبر اسلامی امارت سرپرست حکومتیده عیاللر گه یره‌تیلگن چیکلاولر گه اشاره قیلیب ایتیشیچه، خاتین قیزلر اسلامی امارت نینگ دستلبکی بیر ییل‌لیک حکومتیده، تعلیم، ایش و اجتماع ده‌گی ییغین‌لرگه قتنه‌شیش دن محروم بولگنلر. اونینگ ایشانچی گه کوره، اسلامی امارت افغانستان بویلب عیاللر نینگ وضعیتی یخشی‌لنیشی مقصدیده هیچ بیر ایش قیلگنی یوق دیر.
باشقه تاماندن، عیال حقوقی فعال‌لریدن قطاری نینگ سلام‌وطندار گه ایتیشلریچه، عیاللر اوتگن بیر ییل ده صحنه دن حذف بولیب و سونگی ییل‌لرده‌گی یوتوق‌لری یوق ایتیلگن. اولر اسلامی امارت نینگ بیر ییل‌لیک حاکمیتیده خاتین قیزلر نینگ عمری تباه بولیشی عنوان قیله‌دیلر. اولر نینگ ایشانچی گه کوره، اسلامی امارت تامانیدن یره‌تیلگن چیکلاولر عیاللر اوستیگه سلبی تاثیر قیلیب و اولردن قطاری افسرده‌لیککه چلینگنلر. عیال حقوقی فعاللری، افغانستان خاتین قیزلری نینگ کیله‌جگینی قرانغو و امیدسیزلیک عنوان قیله‌دیلر.
خاتین قیزلر گه یره‌تیلگن چیکلاولر خصوصیده عین‌حالده سوز یوریتیلماقده که، اسلامی امارت اوشبو ییل حمل آیی ده، آلتینچی صنف دن یوقاری قیزلر نینگ مکتب‌لرینی آچیشی کوتیلر ایدی، بیراق ۳ حمل ده معارف وزیرلیگی نینگ سوزلاوچیسی عزیزاحمد ریان میدیالر بیلن اوتکزگن صحبتیده، کیینگی امرگچه قیزلر نینگ مکتبی یاپیق قالیشیدن خبر بیردی.
اوشبو چیکلاولر دوامیده، اسلامی امارت امر معروف و نهی منکر وزیرلیگی، عیاللر و ایرکک‌لر بیرگه لیکده دم آلیش پارک‌لر گه بارمسلیک اوچون ۷ حمل ده بیر دستور صادر ایتدی. اوشبو دستوردن بیر کوندن سونگ، اسلامی امارت سوزلاوچیسی ذبیح‌الله مجاهد از توییتری ده، محرم‌سیز عیاللر خارج گه سفر قیله آلمسلیگینی بیلدیردی.
بیزلرنینگ توییترده هم تعقیب قیلینگ!
شونینگدیک، اوشبو ییل نینگ ۱۷ ثور ده اسلامی امارت حجاب گه عاید باشقه بیر دستور صادر ایتدی. اوشبو دستور گه بناً، خاتین قیزلر عمومی جای‌لرده یوزلرینی یاپیشی کیره‌ک. مذکور دستوردن یالغیز بیر نیچه کون اوتگچ باشقه بیر دستور صادر بولدی. ۲۹ ثور ده صادر ایتیلگن اوشبو دستور ده عیال نطاق‌لری تلویزیونی دستورلرده یوزلرینی یاپیشی امر بولدی.
اسلامی امارت، حاکمیتی بیرینچی کون‌لریده خاتین قیزلر وزیرلیگی نی امر معروف و نهی منکر وزیرلیگی گه اوزگرتیردی و عیال حقوقی فعاللری، اسلامی امارت نینگ بو قراری گه مناسبت بیلدیریب، مذکور وزیرلیک حذف ایتیلیشینی، اجتماع دن خاتین قیزلر نینگ حذف ایتیلیشی و عیاللر گه قرشی اسلامی امارت تامانیدن یره‌تیلگن چیکلاولرنی، علنی ظلم عنوان قیلدیلر.
عیال حقوقی فعاللری نینگ ایشانچی گه کوره، اسلامی امارت تامانیدن یره‌تیلگن چیکلاولر باعث، عایله‌وی جنجل‌لر کوپه‌یگن.
بوتوغریده اسلامی امارت رسمی‌‌لری نینگ فکر_ملاحظه‌سینی اورگه‌نیشنی ایسته‌دیک، لیکن اوتگن نیچه کون ده کیتمه_کیت قونغراق‌لریمیز بیلن اولر نینگ فکرینی اورگنه آلمه‌دیک.
افغانستان بویلب اسلامی امارت ایکینچی مراتبه قدرت نی آلیشی دن کیین، افغانستان مقیاسیده خاتین قیزلردن حمایت قیلووچی برچه نهادلر لغو بولدی و یا ده مذکور نهادلرده خاتین قیزلر نینگ قیینچیلیکلری تیکشیریلمه‌یدی.
ایتیش کیره‌ک که، افغانستان مقیاسیده خاتین قیزلر نینگ قیینچیلیکلرینی تیکشیریش اوچون هیچ بیر نهاد یوق دیر.
۱۴۰۰_ییل ۲۴ اسد ده افغانستان اسلامی جمهورلیک تیزیمی قوللب و افغانستان اسلامی امارت حاکمیت نی قولگه آلدی.
