کابل شهری ۱۳-ناحیهسیده بیر کونلیک کوچت ایکیش کمپاینی، بوگون (۱۹-حمل، چهارشنبه)، بلدیه مسئوللری و محل یشاوچیلری حضوری بیلن باشلنگن.
کابل غربیده آقسقاللر کینگش باشلیغی محمداسحاق صفدرینینگ ایتیشیچه، اوشبو کمپاین یشیللیک کوپهیشی و هوا افلاسلیگی کمهیشی مقصد، اوتکزیلگن. «کوچت ایکیلیشی یشش محیط چیرایلیگی و یشیللیککه سبب بولهدی. ساغلیق نقطهی نظریدن هم اکسیجن تولید بولیشیگه یاردم بیرهدی و بیر صدقهی جاریه حسابلنهدی.»
مذکور کمپاین گه شرکت قیلگنلر، کوچتلرنی ایکیش بیلن یشاوچیلردن یشش محیط وضعیتی یخشیلنیشی و شهر گوزهللیگیگه حصه قوشیشلرینی سورهگنلر.
کابل غربی بوییچه دارو و ساغلیقنی سقلش مرکزلر بیرلشمهسی باشلیغی روحالله یوسفنینگ ایتیشیچه: «یشاوچیلردن قطاری اکسیجن کملیگی بیلن روپهره دیر، چونکه یشیل فضا محیطیمیزده آز دیر. کوچت ایکیشیمیز و اونینگ سقلهنیشیده سعیوحرکت قیلیشیمیز کیرهک.»
کابل شهری ۱۳-ناحیه اورینباسری محمدخان ایوبینینگ ایتیشیچه، اوشبو کمپاینده قریب ۲ مینگ کوچتنینگ ایکیلیشی ممکن. اونگه کوره، مذکور کوچتلر اهالینینگ شخصی پولی بیلن ساتیب آلینیب و بو ناحیه یشیللیگیده مهم اورینگه ایگه بولیشی ممکن.
شوندهی بیرحالده، کابل بلدیهسی مسئوللری یشاوچیلردن ایکیلگن کوچتلر سقلهنیشیده همکارلیک بولیشینی سورهگنلر. کابل بلدیهسی انسجام اورینباسری عبدالعلی یاسینزینینگ ایتیشیچه: «بیر کوچت ایکیلیشی بیر نیچه دقیقه وقت آلهدی، بیراق اونی اسرهش اوچون ییل دوامیده توجه قیلیش ضرور. نفوذلی کیشیلردن کوچتلر سقلهنیشیده آگاهیلیک بیریش برنامهلری اوتکزیلیشینی سورهیمیز.»
کابل بلدیهسینینگ معلوماتی اساسیده، جاری قویاش ییلده کابل شهرینینگ ۲۲ ناحیهسیده بیر میلیون کوچت ایکیلیشی ممکن.
