پایتخت یشاوچیلریدن قطاری، سونگی کون‌لر قوراللی اوغریلیکلر کوپه‌یگنی خصوصیده خواطر بیلدیریب ایتیشلریچه، ناتانیش کیشی‌لر یشاوچیلر نینگ تیلیفون، نقدی پول و باشقه نرسه‌لری نی اوغیرله‌یدیلر.
شونده‌ی بیرحالده، کابل شهری تایمنی منطقه یشاوچیسی بولمیش مینه نینگ ایتیشیچه، نیچه کون آلدین اونینگ تیلیفونی اوغیرلنگن. اونینگ کوپه‌یتیریشیچه: «تایمنی بازاری گه بارگن ایدیم، تیلیفونیم نی اوغیرله‌دیلر؛ فکرمچه بیر عیال اوغیرله‌گن. بو رقم وضعیت، اهالی نینگ قیمت‌راق نرسه یا-ده کوپراق پول نی یانیده انتقال بیره‌‌آلمه‌یشی گه سبب بولگن.»
شونینگدیک اوغریلیک واقعه‌سی گه شاهد بولگن کابل شهری نینگ شهرنو یشاوچیسی فواد، اسلام امیر‌لیگی‌دن، اوغریلیکلر نینگ آلدی آلینیشی نی ایسته‌گن. اونینگ کوپه‌یتیریشیچه: «بو رقم کیشی‌لر مسلکی بوه‌دی. دولت بو رقم کیشی‌لر گه جزا بیریشی کیره‌ک. بو کیشی‌لر قولگه آلینیب و قیته قویبیریلگن‌لریدن کیین، ینه هم بو ایشلر نی انجام بیره‌دیلر. بو کیشی‌لر نینگ حبس گه آلینیشی کیره‌ک.»
بیزلرنینگ فیسبوک صحیفه‌میزگه باش اورینگ!
باشقه بیر تامان‌دن، ایکی کون آلدین کابل شهری نینگ اوچینچی خوفسیزلیک حوزه حدودلریده ۲۳ کیشی، موتر، نقدی پول، تیلیفون و باشقه نرسه‌لر نینگ اوغیرلش عیبی بیلن قولگه آلینگن.
کابل شهری نینگ امنیه قوماندانلیگی آرقه‌لی ترقه‌تیلگن بیر ویدیو‌ده، اوچینچی خوفسیزلیک حوزه آمری شیرعلی جندالله نینگ ایتیشیچه، قولگه آلینگن کیشی‌لر آره‌سیده ایکی عیال هم شامل دیر.
کابل شهری اوچینچی خوفسیزلیک حوزه آمری نینگ کوپه‌یتیریشیچه: «ایکی کون ایچیده بو کیشی‌لر قولگه آلینگن و بیر موتر نینگ اوغیرلنگنی قضیه‌سیده ایکی کیشی نینگ قولی بار ایکن که، اولردن بیری قولگه آلینیب و باشقه‌سی ایسه قاچگن دیر. مذکور کیشی‌لردن بیر قطاری تیلیفون اوغیریله‌گن، بیر قطاری موتر و بیر قطاری ایسه باشقه نرسه‌لر نی اوغیرلنگنلر که، اولر نینگ دوسیه‌لری تیارلنیب و تیکشیرو اوچون یوباریلگن.»
شونینگدیک قولگه آلینگن کیشی‌لر اوز جرم‌لری گه اعتراف قیلگنلر. اولردن بیری نینگ ایتیشیچه: «شاکر و مصطفی بیلن بیش‌ته موبایل نی اوغیرلگن ایدیم، اوچینچی حوزه پولیسی آرقه‌لی قولگه آلیندیک.»
مذکور اوغریلردن باشقه بیری نینگ ایتیشیچه: «بیر کیشی پیچاقله‌دیم. اوچینچی خوفسیزلیک حوزه مجاهدلری مینی قولگه آلدیلر.»
بیزلرنینگ توییترده هم تعقیب قیلینگ!
شونده‌ی بیرحالده، ایچکی ایشلر وزیرلیگی مسئوللری نینگ ایتیشلریچه، مملکت بویلب اینیقسه کابل‌ده، کونده اونلب کیشی اوغریلیک سبب، قولگه آلینه‌‌دی.
اوشبو وزیرلیک سوزلاوچیسی بسم‌الله حبیب نینگ سلام‌وطندار گه ایتیشیچه: «پولیس کوچلری اهالی امنیتی نینگ تامین‌لنیشی و جنایی جرملر گه قرشی کوره‌ش خصوصیده کیچه و کوندوز تلاش قیله‌دی. قولگه آلینه‌دیگن کیشی‌لر گه جزا بیریله‌دی و قانون گه تاپشیریله‌دی.»
کابل شهری نینگ امنیه قوماندانلیگی دایم یشاوچیلردن اوغریلر نینگ قولگه آلینیشی خصوصیده اسلام امیرلیگی کوچلری گه خبر بیریب و اولر بیلن همکارلیک قیلیش‌لری نی ایسته‌گنی بیرحالده، پایتخت یشاوچیلری اوغریلیک کوپه‌یگنی خصوصیده خواطر بیلدیرگنلر.
