بیرلشگن ملتلر تشکیلاتینینگ بالهلرنی قوللب-قوتلش صندیغی (یونیسف)، افغانستان جنوبشرقیده چیگره توقنشوولری نتیجهسیده بیجا بولگن عایلهلردن قطاریگه، ساغلیقنی سقلش و کیرهکلی نرسهلرنینگ ترقهتگنینی معلوم قیلگن.
افغانستان ده یونیسف باشلیغی تاجالدین اویوالهنینگ بوگون (۸-حمل/ ۲۸-مارچ، شنبه)، اوز اکس صحیفهسیده یازیشیچه، اوشبو نهاد افغانستان ده اوروشلر طفیلی بیجا بولگنلرگه یاردم بیریش توغریسیده سعیوحرکت قیلماقده.
اونینگ کوپهیتیریشیچه، یونیسفنینگ مقصدی خوست، پکتیکا و پکتیا دهگی بیجا بولگن قریب ۵ مینگ ۵۰۰ عایلهگه یاردم ییتکزیش دیر. شونینگدیک اویوالهنینگ اورغولشیچه، «بالهلرنینگ دایم حمایه بولیشی کیرهک.»
شونینگدیک بوندن آلدین ناروی قاچقینلر کینگشی، پاکستان و افغانستان اسلام امیرلیگی آرهسیدهگی توقنشوولر مینگلب عایلهنینگ بیجا بولیشی و مذکور عایلهلرنینگ دایمی یاردملرگه نیازی بارلیگینی معلوم قیلگن ایدی. اوشبو نهاد دنیا همجمعیتیدن بو وضعیت برابریده بیفرق بولمسلیگینی ایستهگن ایدی.
بالهلرنی قوللب-قوتلاوچی صندیغینینگ معلوماتی اساسیده، مذکور توقنشوولر نتیجهسیده افغانستان شرقیده کمیده ۶۸ مینگ باله بیجا بولیب و قریب ۸ مینگ باله مکتب باریشدن محروم بولگن.
اسلام امیرلیگی و پاکستان آرهسیدهگی توقنشوولر ۳-حوتدن، ننگرهار و پکتیکانینگ بیر قطار بولیملریگه پاکستان آرقهلی هجوم اویوشتیریلیشی بیلن باشلهنیب و حاضرگچه دوامی بار.
